يۋنۋس ەمرە اتىنداعى تۇرىك مادەني ورتالىعىنىڭ ۇيىمداستىرۋىمەن جانە تۇركيانىڭ قازاقستانداعى ەلشىلىگى مەن  قازاقستان رەسپۋبليكاسىنىڭ ۇلتتىق مۋزەيىنىڭ قولداۋىمەن 2018 جىلعى 15 مامىر كۇنى ساعات 15.00-دە «وسمانلى مەملەكەتى مەن ورتا ازيا حاندىقتارى قارىم –قاتىناستارىنىڭ قۇجاتتارى» اتتى كورمەنىڭ اشىلۋ سالتاناتى وتەدى.

اتالعان كورمە «رۋحاني جاڭعىرۋ» باعدارلاماسى اياسىندا ۇيىمداستىرىلادى.  كورمەگە وسمانلى مەملەكەتى مەن ورتا ازيا حاندىقتارىنىڭ قارىم-قاتىناستارىن باياندايتىن 40  قۇجات قويىلادى. ولاردىڭ بارلىعى تۇركيا مەملەكەتىنە قاراستى وسمانلى مۇراعاتىنان الىنعان. قۇجاتتار اراسىندا قازاق حانى مۇحاممەت قايىپ حان مەن وسمانلى سۇلتانىنىڭ 1713 جىلى جازىلعان حاتتارى سياقتى دەرەكتەر قازاقستان حالقىنا تۇڭعىش رەت ۇسىنىلادى.

اتاپ وتەتىن بولساق، كورمەگە قويىلاتىن حاتتاردىڭ ىشىندە

- قازاق حانى قايىپ مۇحاممەدكە جولدانعان سۇلتاننىڭ حاتىنىڭ كوشىرمەسى (1713 جىلعى 21 تامىز)؛

- قازاق حانى قايىپ مۇحاممەد  جولداعان ون بولەك سىي-سياپات تىركەلگەن داپتەردىڭ كوشىرمەسى (1713 جىلعى  21 تامىز)؛

-قازاق حانى قايىپ مۇحاممەتتىڭ ەلشىسى سەيىت مۇحاممەدقۇل بەي تاپسىرعان حاتتىڭ اۋدارماسىنىڭ كوشىرمەسى (1714 جىل 16 قاڭتار)؛

- قازاق حانى قايىپ مۇحاممەدتىڭ  ەلشىسى مۇحاممەد قۇلدىڭ اۋىزشا سالەمىنىڭ قاعازعا تۇسىرىلگەن نۇسقاسى (1714 جىلعى 16 قاڭتار)؛

-قازاق حانى قايىپ مۇحاممەدتەن كەلگەن حاتتىڭ كوشىرمەسى (حاتتا وسمانلى مەملەكەتىنىڭ شىنايى دوسى ەكەندەرى، ءار دايىم دۇعا ەتەتىندەرى تۋرالى جازىلعان، 1716 جىلعى  14 جەلتوقسان)؛

-  م. لەسساردىڭ ورتا ازيا ساياحاتى تۋرالى «Central Asia No1» دەپ اتالاتىن راپورتىنىڭ تانىستىرىلىمى (1883 جىل)؛

-  تۇركىستان ايماعىنىڭ بەرليندە باسىلعان كارتاسى (1862 جىل) ءتارىزدى ماڭىزدى قۇجاتتار بار.

سونداي-اق بۇحارا، حيۋا جانە قوقان حاندىقتارى مەن وسمانلى مەملەكەتىنىڭ قارىم -قاتىناستارىن كورسەتەتىن باسقا حاتتار، ماڭىزدى دەرەكتەر مەن كارتالار دا كورمەگە قويىلادى.

ەكسپوناتتاردىڭ اراسىندا تۇركيا مەملەكەتتىك ءارحيۆىنىڭ تارتۋى رەتىندە  قازاقتاردىڭ تۇركياعا كوشىنە قاتىستى قوسىمشا قۇجاتتار دا بار.  

كورمە اشىلاردان ءبىر كۇن بۇرىن 14 مامىردا قازاقستان ۇلتتىق مۇراعاتىندا وسمانلى مۇراعاتىنىڭ تانىستىرىلىمى وتەدى. جيىندا تۇركيا رەسپۋبليكاسى پرەمەر-مينيسترلىگىنە قاراستى مەملەكەتتىك مۇراعاتتار باسقارماسىنىڭ باس ديرەكتورى، پروفەسسور ۋگۋر ءۇنال،  قازاقستاندىق ارحيۆ قىزمەتكەرلەرى  مەن تاريحشىلار باس قوسادى.

«وسمانلى مەملەكەتى مەن ورتا ازيا حاندىقتارى قارىم–قاتىناستارى قۇجاتتارىنىڭ» كورمەسى 20 مامىرعا دەيىن جالعاسادى. كورمە ۇلتتىق مۋزەيدىڭ اتريۋم زالىندا وتەدى.

مەكەن-جايى: استانا ق.، قازاقستان رەسپۋبليكاسىنىڭ ۇلتتىق مۋزەيى، تاۋەلسىزدىك داڭعىلى 54، 2 بلوك، 2 قابات، اتريۋم حولل