جىر باسى وڭتايلى ءساتىڭ تۇسپەگەن، جازاتىن تولعاپ جىرىم ەڭ. تات باسپاس سەن ءبىر مىس شەگە، تولعانتىپ كەلگەن ءپىرىم ەڭ. ايقاسىپ جاۋمەن كورۋگە، جورىققا شىققان شەرۋباي. ەركىندىك ءۇشىن ولىمگە، باسىڭدى تىككەن ەرىم-اي! جارالدىق نەدەن سور قاباق، كيەلى بابام شەرۋباي. ايتىلماي كەلگەن قورعالاپ، اقتاردىم ىشكى شەرىمدى-اي. اعىزىپ قاندى تەرىڭدى، قايراتىڭدى الىپ زورلادىڭ. سارىارقا سىندى جەرىڭدى، كوزىڭدەي كورىپ قورعادىڭ. تاعدىرىڭ ايداپ جىبەردى، تاۋەلدى بولماق مۇنشا كىم. نامىسقا قايراپ جىگەردى، پەيىشكە باتىل جۇمسادىڭ. جاۋجۇرەك تۋعان ءوزىڭ دە، جارالعان ەدىڭ ەلدىككە. قاستاندىق قالاي كەزىندە، جولىققان جومارت ەرلىككە؟... كوڭىلىنە جۇرتتىڭ توق بولعان، قاسيەتتى اڭعال ەرىم-اي. جازىمىشقا وسال تاپ بولعان، قاپىدا ولگەن جەرىڭ-اي. قاراكەلەردىڭ اۋلەتىن، سەبەبسىز جاۋدىڭ قورلاعان. رۋلى ەل، جەر داۋلەتىن، شەرۋباي ەدىڭ قورعاعان. يەسى وزىق اقىلدىڭ، جولىققان جانعا جولداس ەڭ. ويتپەسەڭ قاراكە باتىردىڭ، نەمەرە ۇلى بولماس ەڭ. اكەسى دە الىپ بايبولدى، جارالعان ابزال سانادان. تۋىلماس ەدىڭ ايشاداي، اجارلى ارۋ انادان. قايسارلىعىڭا جان بۇققان، اتا ماڭىزدى تەكتى ەدىڭ. شىرقىمدى بۇزىپ سوندىقتان، ويىما ورناپ كەتپەدىڭ. 1. سۇعاناقتاعان سۋماڭداپ، جوڭعارلار ءامىر تاپتىرماي. ارانىن اشىپ قۇماڭداپ، جاۋلادى كىرپىك قاقتىرماي. قاسىدى اۋزىن جارانىڭ، كورمەگەن ەدىڭ وزبىردى. قالماقتار شاشىپ قاھارىن، ەلىڭدى بەيعام توزدىردى. اياۋسىز قىرىپ جاۋىزدار، كوشپەلى قازاق قان جۇتتى. جالاڭداپ قورقاۋ اۋىزدار، تارىداي شاشىپ قاڭعىتتى. دۇشپانعا كىرگەن باسىنعان، جول ەمەس نامىس بەرۋ جاي. بەساسپاپ قارۋ اسىنعان، اتتاندى باتىر شەرۋباي! تىلەنىپ كەلىپ جورىققا، كورسەتكەن ءوزى ەرلىگىن. اتىسقان جاۋمەن تورىقپاي، باعالامايدى ەردى كىم. قانكەشتى بولعان كۇرەسىن، جانكەشتىلەرمەن ءبولىسىپ. ءوزىنىڭ قوستى ۇلەسىن، بەرىسكەن سەرتكە كەلىسىپ. قانجىعالى بوگەنباي، قاسىنا باۋلىپ ەرتىپ ەد. قاراكەرەي قابانباي، ەركەلەپ بەرگەن ەسىم ەد. ەرجۇرەكتىكتەن باتىلدى، “حاسباتىر بالا” اتانعان. بوگەنبايدىڭ العىسىن، قابانبايدان باتا العان. اڭىراقايدىڭ شايقاسى، بولماعان وڭاي ايتارعا. ءبىتىرىپ جوڭعار ايقاسىن، ەلىنە باتىر قايتاردا. ايلانىپ قاراپ توساڭسىپ، بەرگەن سوڭ شىركىن الاڭداي. ەڭ سوڭعى ءسوزىن بوساڭسىپ، تاپسىردى جولدا قابانباي. - باتىرعا ساقتىق بەكەمدىك، بەرىك بول ءىنىم!، - دەگەن-دى. قاھارمان بالا ەكەن دەپ، ەرەكشە قامىن جەگەن-دى... جورىققا باپتاپ باۋلىعان، قۇشاعىنا الىپ قاپسىرىپ. شىعارىپ سالدى اۋلىنا، امانات ەتىپ تاپسىرىپ. 2. شەرۋبايدىڭ دا اۋلىندا، بولماعان ءسىرا تىنىشتىق. بەرمەيتىن مازا جاۋ مۇندا، وتىرعان كەزدە تىنىس قىپ. جوڭعارلار تالاپ اراشا، جاتقاندا ەلدى توزدىرىپ. باتىستان قالماق تالاسا، باستاپتى لاڭ قوزدىرىپ. كەلتىرمەك ەكەن رەتىن، شەرۋبايدى اڭدىپ ويقاستاپ. جۇرگەنىن ولار بىلەتىن، اڭىراقايداعى شايقاستا. سۇعاناق يتشە اڭدىعان، ىرگەدەن تىعىپ تۇمسىعىن. تىمىسكىلەپ قاڭعىعان، قادادى قالماق تىم سۇعىن. ايلانا قورىپ سۋماڭداپ، قايىرشىلانىپ تورىدى. قالمادى ساۋ جەر بۇل ماڭدا، جاۋلاردىڭ بولدى قورىعى. اۋىلدى تەكتەپ تەكسەرىپ، تۇنىمەن كەزىپ جورتاتىن. كەلىپ قالسا!... دەپ سەسكەنىپ، شەرۋبايدان تەك قورقاتىن. شەرۋباي دەسەڭ توسىننان، زارەسى قالماي ۇشاتىن. كەزىندە جامان شوشىنعان، ىشىپ-جەگەنىن قۇساتىن. مەكەنىن توناپ ارىستان، شاپسا دا قىرىپ تويمادى. بولجاعان داندەپ الىستى، اڭدىعان دۇشپان قويمادى. بۇركىتتى تاۋدان وتكەندە، جالتارىپ ءىزىن جاڭالاپ. قارامۇرىنعا جەتكەندە، شەرۋبايدى الدى قامالاپ. جارالعان سۇستى جىگەرمەن، تالايىن سوعىپ جايراتتى. حاسباتىر دا ەسە جىبەرمەي، جۇمسادى سوڭعى قايراتتى. سەمسەرگە باسىن قاققىزىپ، قايتارىپ كەرى قاستىعىن. قاعىنعان جاۋدى جاتقىزىپ، جاستاندىردى جاستىعىن. قاتەرلى قىرسىق شالدى ما، جالعىزدىڭ كۇنى قارالى. كوز جۇمدى جەتە اۋلىنا، قانسوقتا بولىپ جارالى. بولماعان سەرىك قاسىندا، جۇرەكتە كەكتى دەرت تولدى. بويىندا توپار، توسىندا، شەرۋباي باتىر مەرت بولدى. ورتەدى اۋىلى وزەگىن، اللا ءبىر ءساتىن بەرمەدى. بويىنا نۇرا وزەننىڭ، ۇلدارىن جىلاپ جەرلەدى. قايراندا قالار ەستىگەن، قاسىرەت ەدىڭ و، قانداي! اۋىلى قالدى وكسىگەن، جەڭىستىڭ كۇنى تويلانباي. سەرىكسىز باتىر اڭعالىن، جىبەرىپ جاۋعا قازاعىم. كۇڭىرەنتىپ نۇرا اڭعارىن، تىنبادى سان جىل ازالى ءۇن. قايىڭعا سۇيەپ ارقاسىن، كۇيزەلدى كۇيرەپ دوستارىڭ. ورمەلەپ وسكەن جارتاسىڭ، جوقتادى ولگەن اسقارىن. تەنتەك وزەنى ەڭىرەپ، كوزىنىڭ اششى توكتى ۋىن. تۇنەرگەن بوزاڭ توڭىرەك، ىركىلدى اقپاي كوكسۋىڭ. الاپات سوعىپ دولدانىپ، اۋناتىپ تاستى جەل ۇردى. لىقسىپ كولدەر جالدانىپ، كەمەردەن اسىپ ەلىردى. تاسىعان شاقتا سارقىراپ، قۇياتىن وراپ ۇراعا. تولاستاپ اقپاي ارقىراپ، قايىستى توقتاپ نۇرا دا. قۇمادىر سۋسىپ قۇلادى، سۇلۋ-مادينە سۇلادى. تاسسۋات ءزامزام بۇلاعى، مولدىرەپ ءمولت-مولت جىلادى. بالىقتى كولدىڭ سۇڭقىلداپ، اققۋى قايتتى كيەلى. بۇعىلى بۇركىت مۇڭ تىڭداپ، اق بۇلتقا باسىن سۇيەدى. وكىنىپ مىسال كەلتىردىك، ءوتىپتى عۇمىر جىراقتا. ەركىندىك قۇرىپ، ەل تىرلىك، ۇرپاعىڭ جەتتى مۇراتقا! 3. تاۋەلسىز ءانىن شىرقادىم، ب ا ق قونباس استە ەرلىكسىز. كوتەرىپ بيىك جىر تاعىن، باسىمىزدى ءيىپ بەردىك ءبىز. قيىن دا قىستاۋ كەزىندە، قاستەرلەپ ارىس ەسىلىن. شەرۋباي-نۇرا وزەن دەپ. تىركەگەن حالىق ەسىمىن. ارمانداپ جىرىن اقىندار، ارناعان بۇگىن ورەنگە. سەرۋەن قۇرىپ جاتىڭدار، شەرۋباي-نۇرا بوگەنگە. زامانعا وتكەن كۇيىندىك، ماقساتقا بەرىك تۇيىندىك. قاسيەتىڭە سىيىنىپ، جاراتىلىسىڭا سۇيىندىك. جازىلىپ جەرگە ەسىمىڭ، كىتاپقا ايقىن قالماعان. كۇيرەتكەن شىندىق ەسىگىن، ۇستەمدىك ەكەن جالماعان. قيالعا باتىپ ويلاعان، ويىمدى جىكتەپ سان تۇنگى. تەرەنگە تارتىپ بويلاعان، اسىردىق اسقاق داڭقىڭدى. ارۋاعىڭدى اتاپ ۇرانعا، اقوردا كوتەردىك اسىڭا. اتىڭدى ءتۇسىرىپ قۇرانعا، قۇلپىتاس قويدىق باسىڭا. اڭىز عىپ جەلى باتىرىن، شەرلى كۇي شەرتىپ تولقىندى. جۇرەكتى تەربەپ اقىرىن، شەرۋباي اتتى كول تۇندى. جىرلادىم مەن دە اسقاقتاي، ساۋىتتى ەرىن حالىقتىڭ. بوگەندە جۇزگەن قاسقاقپاي، قورعاعان ءبىزدى بالىقسىڭ. ءقادىرلى جۇرتقا ەسىمىن، قالدىرعان جەرگە اتىڭدى. شەرۋباي سىندى ەسىلىم، قاستەرلاپ وتەم زاتىڭدى. تاۋەلسىز بولىپ عاسىردان، عاسىرعا استىق ءبىر بەلەس. سارىارقا سىندى دالاڭا، استانام قوندى ىرگەلەس. قازاعى، كەلگەن باسىلىپ، تالپىنىپ عىلىم بىلىمگە. ايىعىپ تۇمان اشىلىپ، سويلەدى انا تىلىندە. جىر سوڭى ەلىم باي، بايتاق جەرىم باي، ەركىندىك قۇرعان بار ورتام. قورعاعان ەرىڭ شەرۋباي، جاساي بەر جاسا، سارىارقام! اينالىپ تورىپ تورلاعان، جاۋلارىڭ ءدايىم بولماسىن. بابالار ۇلى جولداعان، قاسيەتتى ارۋاق قولداسىن! جىرىقتان اڭساپ ورالعان، مەن دە ءبىر اقىن تۇلەگىڭ. حالقىما قايسار جارالعان، بەرەكە-بىرلىك تىلەدىم!

سولداتحان ورايحان ۇلى، قازاقستان جازۋشىلار وداعىنىڭ مۇشەسى، اقىن