ايتپاقشى، ناۋىرىز كەلدى. باسقا قالانى قايدام؟ الماتىدا دىبىس جوق. 1 قاڭتاردى ءبىر اي بۇرىن الاۋلاتىپ، جالاۋلاتىپ باستايتىن احمەتجان مىرزانىڭ اينالاسى ءۇنسىز.

ءبىز قالا كوشەلەرىن ارالاپ، ناۋرىز مەيرامىنا بايلانىستى الدەقانداي ادەمى بەزەندىرۋلەردى كورەمىز بە دەپ ەدىك... كوزىمىزگە تۇسپەدى. سوسىن «ءاي، وسى ءبىز كورمەي جاتقان بولۋىمىز كەرەك» دەپ اكىمشىلىك قىزمەتكەرلەرىنەن ءمان-جايدى بىلمەك بولدىق.

اۋەلدە سانجار ومار ۇلى بوقايەۆ مىرزا باسشىلىق ەتەتىن الماتى قالالىق  ىشكى ساياسات باسقارماسىنا قوڭىراۋ شالدىق. حاتشى قىز "اعاي ءقازىر جينالىستا. كەش شىعادى. ءسىزدىڭ سۇراقتارىڭىزعا تولىق جاۋاپتى وسى كىسىلەر بەرەدى" دەپ، قوعامدىق-ساياسي جۇمىس ءبولىمىنىڭ باسشىسى اسحات وسەربايەۆقا سىلتەدى. سودان اسەكەڭ: "ىشكى ساياسات باسقارماسى ناۋرىز مەرەكەسىن وتكىزۋگە، ونىڭ يدەولوگيالىق  ءمانىنىڭ ۇلكەندىگىنە بەي-جاي قارامايدى. جاقىندا ب ا ق بەتتەرىندە ءبىز بيىلعى ناۋرىز مەيرامىن جىلداعىداي ورتالىق الاڭدا ەمەس، م.گوركيي اتىنداعى ورتالىق ساياباقتا اتاپ وتەتىنىمىز تۋرالى اقپارات تاراتقان بولاتىنبىز. كەيبىر باسىلىمدار مۇنى ساياسي تۇرعىدان بۇرمالاپ اكەتىپتى. نەگىزى، وسى ۋاقىتقا دەيىن ورتالىق ساياباق جەكە تۇلعالاردىڭ مەنشىگىنە تيەسىلى ەدى. بىلتىردان باستاپ ساياباق قالالاق اكىمشىلىكتىڭ بالانسىنا ءوتتى. ەندى ءارى تىنىش، ءارى جايلى ورىندا ناۋرىز مەرەكەسىن وتكىزۋدى داستۇرگە اينالدىرۋ ءۇشىن بيىلدان باستاپ، مەيرامدى سول جەردە تويلايتىن بولامىز. ال مەيرامعا دايىندىق شارالارىنا جاۋاپتى كىسىلەر ءارى ءسىزدىڭ ساۋالدارىڭىزعا تولىق جاۋاپ بەرەتىن – قالالىق مادەنيەت باسقارماسى. سول جاققا حابارلاسىڭىز"، - دەدى. سودان الماتى قالالىق مادەنيەت باسقارماسىنا قوڭىراۋ شالعان ەدىك، ونداعى حاتشى قىز "بۇعان جاۋاپتى شىعارماشىلىق جانە ءبىلىم بەرەتىن جوبالاردى ۇيىمداستىرۋ ءبولىمى" دەپ، قاسىموۆا راۋشان نۇرقاسىمقىزىنا باعىتتادى. ول جاقتان تەلەفون كوتەرگەن اراي ىبىكەنوۆا ەسىمدى حاتشى قىز ءبىزدى باسشىسىمەن بايلانىستىرۋعا اسىقپادى. ارى-بەرى قيپىقتاپ، ترۋبكانى راۋشان حانىمعا ارەڭ جالعادى. "جاۋاپ بەرەتىن جان تابىلدى" دەپ قۋانا بەرگەنىمىز سول-اق ەكەن، باسشى حانىم بار بالەنى PR جانە جارناما بولىمىنە يتەرگەندەي بولدى.

ءتول مەرەكەمىز تۋرالى ءبىر عانا سۇراققا ماردىمدى جاۋاپ تابا الماي، ەندىگى جەردە ساندالعان بەتى راشيدا ەسىمدى قىزعا تەلەفون شالۋعا ءماجبۇر بولدىق. راشيدا حانىم جاڭاعى PR جانە جارناما بولىمىندە جۇمىس ىستەيدى ەكەن. ءبىراق، بۇل جولعى ارەكەتىمىز دە ءساتسىز شىقتى. راۋشان نۇرقاسىمقىزىنا قايتا بايلانىسقا شىقتىق. بۇل جولى راكەڭ اكىمدىكتىڭ باسپا ءسوز قىزمەتىن نۇسقادى. اقىرى اينالىپ كەلىپ، ايبار قاينار ۇلى ولجاي مىرزانىڭ بولىمىنە بايلانىسقا شىقتىق.  ايبار مىرزا ءبىر دەگەننەن: «ناۋرىز مەيرامىنا دايىندىق شارالارى 8 ناۋرىزدان سوڭ باستالادى، ناۋرىز ايىنداعى ۇيىمداستىرىلاتىن بارلىق شارالاردى مىنا كەستەدەن تاباسىزدار"، - دەپ ايلىق جوسپارىن ۇسىندى. وعان دا ءتاۋبا دەستىك.

الماتى قالالىق اكىمدىگىنىڭ بولىم-بولىمدەرىن تەلەفون ارقىلى كەزىپ ءجۇرىپ ۇققانىمىز -   قانداي دا ءبىر سۇراققا جاۋاپ ىزدەسەڭىز كەمىندە جەتى ءبولىمنىڭ الدىنان وتەتىن سياقتىسىز. ءتىپتى «ناۋىرىز مەرەكەسىنىڭ» بولاتىنىنان حابارسىز سياقتى...

سۇراعىمىزعا جاۋاپ ىزدەگەندەگى حابارلاسقان بولىمدەردىڭ كارتاسى تومەندەگىدەي بولدى:

ال ايبار مىرزادان العان الماتى قالاسىنىڭ ناۋىرىز ايىنداعى ءىس-شارالار جوسپارى مىناۋ: