دەنساۋلىق ساقتاۋ ءمينيسترى ەلجان ءبىرتانوۆ سەنات ءتوراعاسى قاسىم-جومارت توقايەۆتىڭ مەنينگيت جايلى پىكىرىنە جاۋاپ بەردى.

«ءيا، تۇرعىندارمەن باياۋ جۇمىس ىستەپ جاتىرمىز، ونىمەن كەلىسەمىز. سەبەبى قوعاممەن قارىم-قاتىناستا بولۋ فورماتى قاتتى وزگەرگەن. قازىرگى ۋاقىتتا حالىقپەن الەۋمەتتىك جەلى ارقىلى جۇمىس ىستەۋ ۇيرەنىپ جاتىرمىز»، - ءبىرتانوۆ.

بۇعان قوسا، ەپيدەمياعا قارسى شارالار دەنساۋلىق ساقتاۋ مينيسترلىگىنىڭ حاتتامالارى مەن ستاندارتتارىنا ساي جۇزەگە اسادى.

«مەديسينالىق كومەك كورسەتۋ ۇيىمدارىنا كەلەر بولساق، ءبىز ءبارىن مويىندايمىز. بۇل كەمشىلىكتەردىڭ ءبارىن رەتتەيمىز»، - دەدى ءبىرتانوۆ.

سەيسەنبىدە وتكەن ۇكىمەت وتىرىسى بارىسىندا ءبىرتانوۆ سول كۇنى-اق مەنينگوكوكك ينفەكسياسى كەڭ تارالعان الماتى قالاسى مەن الماتى وبلىسىنا جول ءجۇرۋدى جوسپارلاپ وتىرعانىن مالىمدەدى. سونىمەن قاتار مينيستر مەديسينالىق كومەك كورسەتەتىن ۇيىمداردى دا تەكسەرەتىنىن ايتتى.

مەنينگيت سالدارىنان قازا تاپقانداردىڭ جاقىندارى مەن تۋىستارىنا كوڭىل ايتىپ، ساپارى بارىسىندا ولارمەن كەزدەسۋى مۇمكىن ەكەنىن مالىمدەدى.

ايتا كەتەيىك، قازاقستاندا جىل باستالعالى 13 ادام كوز جۇمدى. ولاردىڭ التاۋى 14 جاسقا تولماعان بالالار. ال ينفەكسيادان كوز جۇمعانداردىڭ كوبى الماتىدا.