بيىل بۇتكىل تۇركى ءدۇنياسىندا ماعجان جىلى دەپ اتالعانى بەلگىلى. ونىڭ مەرەيتويى ماۋسىمنىڭ 22 مەن 25ء-ى ارالىعىندا «اقىنىڭ اقىنى»  دەپ اتالعان ماعجان جۇمابايەۆتىڭ ءوزىنىڭ تۋعان ءوڭىرى قىزىلجار ولكەسىندە 125 جىلدىق مەرەيتويى حالىقارالىق جوعارى دارەجەدە وتكىزىلدى.

الدىمەن 22ء-ى كۇنى ءسابيت مۇقانوۆ اتىنداعى وبلىستىق سازدى دراما تەاترىندا اقىننىڭ «شولپاننىڭ كۇناسى» اتتى حيكاياتى بويىنشا ساحنالىق كورسەتىلىم بولدى. ەرتەڭىنە توي اقىننىڭ تۋعان اۋىلى سارى توماردا جالعاستى.

ماعجاننىڭ قىزىلجاردا اشىلعان ەسكەرتكىشىنىڭ الدىندا سولدان وڭعا قاراي: باقىتجان توباياقوۆ، تىنىشتىقبەك ابدىكاكىموۆ، عالىم جايلىباي

وعان الىس-جاقىن شەتەلدەن، اتاپ ايتقاندا، تۇركيادان، ازەربايجاننان، قىرعىزستان مەن وزبەكستاننان، رەسەيدەن كەلگەن قوناقتار، ماعجان اقىننىڭ ولەڭدەرىن اۋدارعان اقىندار قاتىستى. وبلىس اكىمى قۇمار اقساقالوۆ، تۇرىكسويدىڭ باس حاتشىسى دۇيسەن قاسەيىنوۆ، قازاقستان جازۋشىلار وداعى باسقارماسىنىڭ ءتوراعاسى ۇلىقبەك ەسداۋلەت مازمۇندى ءسوز سويلەپ، عالىمدار باياندامالار جاسادى. 

قوناقتار ونىڭ ەرتەڭىندە قىزىلجار شاھارىنداعى مۇراجايدا اقىن شىعارمالارىمەن تانىسىپ، ن. پوگودين اتىنداعى ورىس دراما تەاترىندا «ماعجاننىڭ سوتى» اتى تراگەديانى  كوردى. سولتۇستىك قازاقستان مەملەكەتتىك ۋنيۆەرسيتەتىندە اقىن تۋرالى قورىتىندى كونفەرەنسيا وتكىزىلدى. وندا  ماعجانتانۋشىلارعا سىي-سياپات كورسەتىلدى. اتاپ ايتقاندا، عالىمدار سەرىك نەگيموۆقا، تۇرسىن شاڭبايعا، ەربول تىلەشوۆكە، حانگەلدى ءابجانوۆقا، قادىر وماروۆقا، جازۋشى جاراسباي سۇلەيمەنوۆكە، اقىن باقىتجان توباياقتەگىنە ماعجان جۇمابايەۆتىڭ مەدالى تاپسىرىلدى.

سونىمەن قاتار، رەسەيدىڭ لەرمونوۆ كوميتەتى اتىنان اسكەر دودۋيەۆ بالكار اقىندارى قايسىن قۇلييەۆتىڭ، وتاروۆتىڭ  اۋدارماشىسى، قازاق اقىنى باقىتجان توباياققا قايسىن قۇلييەۆ مەدالىن تاپسىردى.

 باقىتجان توباياقوۆ