جاقىندا بەلگىلى پروفەسسور مىرزانتاي جاقىپ كتك تەلەارناسىنا بەرگەن سۇحباتىندا: "جوعارى وقۋ ورنىندا تەگىن وقۋ مۇمكىندىگى تالانتتى جاستارعا ەمەس، ساباققا مۇلدە كەلمەيتىن جۇلدىزدارعا ۇلەستىرىلەدى"، - دەپ ايدى اسپانعا ءبىراق شىعاردى. ونىڭ ايتۋىنشا، ساحنادان عانا كورىنەتىن ستۋدەنتتەرگە ۇستازدار جوعارى باعا قويۋعا ءماجبۇر ەكەن.  

ال گۋميليەۆ اتىنداعى ەۇۋ وقىتۋشىسى، ايتىسكەر اقىن سەرىكزات دۇيسەنعازين «جۇلدىزدار تالانتتى جاستاردان گرانتتارىن تارتىپ الدى» دەگەن پروفەسسوردىڭ سوزىنە ۇزىلدى-كەسىلدى قارسى. بۇل تۋرالى اقىن Qamshy.kz اقپارات اگەنتتىگىنىڭ تىلشىسىنە بەرگەن سۇحباتىندا ايتتى. 

ۋنيۆەرسيتەتتە ساباق بەرەتىن ءھام ونەر جۇلدىزدارىمەن جاقسى ارالاساتىن دۇيسەنعازين پروفەسسور مىرزانتاي جاقىپتىڭ بۇل ارەكەتىن قۇقىقبۇزۋشىلىققا بالادى.

«گرانت بۇكىل قازاقستاندىقتارعا ورتاق. قاراپايىم ادامدارعا نەمەسە جۇلدىزدارعا دەپ بولىنبەيدى. باعى بار ادام ول گرانتتى الادى. سول سەبەپتى دوسەنتتىڭ ايتقانىن مۇلدەم قۇپتامايمىن»، - دەپ اشىعىن ايتتى دۇيسەنعازين.

ونىڭ سوزىنشە، جوو-دا حالىققا قىزمەت ەتىپ جۇرگەن ازاماتتارعا جەڭىلدىك جاسالادى. ول ادامنىڭ مىندەتتى تۇردە ءانشى بولۋى شارت ەمەس، قازاقتىڭ تۋىن كوككە كوتەرىپ جۇرگەن وليمپيادا چەمپيوندارى دا ماگيستراتۋرادا وقيدى.

«ماڭىزدى شارالار نەمەسە وليمپيادالار شىعىپ قالىپ جاتسا، «بارمايسىڭ، پارتادا وتىر!» دەپ ايتا المايسىڭ عوي»، - دەيدى سەرىكزات دۇيسەنعازين.

بۇعان قوسا، اقىن مىرزانتاي جاقىپتىڭ «انشىلەر ساباققا مۇلدەم قاتىسپاي ءجۇرىپ ديپلوم الادى» دەگەن سوزىنە شۇيلىكتى.

«ساباققا قاتىسپايدى دەپ ايتاتىنداي ول كىسىنىڭ دالەلى بار ما؟ ءوزىم بىلەتىن مەيرامبەك بەسپايەۆ 100 پايىز بولماسا دا، ساباققا قاتىسىپ جۇرۋگە تىرىستى. سەبەبى مادەنيەتتانۋ فاكۋلتەتى – وعان كەرەك سالا. ديپلوم جۇمىسىنىڭ تاقىرىبى – «التىنبەك قورازبايەۆتىڭ قازاق مادەنيەتىندەگى ورنى». تاقىرىبى بويىنشا ءوزى زەرتتەۋ جۇمىستارىن جۇرگىزدى، ءوزى قورعادى. ال قورعاۋ كەزىندە مىرزانتاي جاقىپ قاتىستى ما؟ جوق. وندا نەگە قۇر سويلەيدى؟ مەنىڭشە، ول كىسىنىڭ ماسەلەسى انشىدە ەمەس. كىمگە سوقتىعارىن بىلمەي جۇرگەن سەكىلدى. نە قوعامعا، نە بيلىككە قاپالى»، - دەدى اقىن.

سەرىكزات دۇيسەنعازين ماگيستراتۋرادا ەڭ كوبى 2-3 تانىمال ادام عانا وقيتىنىن ايتادى. ءتىپتى، جىلىنا ءبىر-اق جۇلدىز تۇسەتىن جاعدايلار بولادى ەكەن. ال مۇنداعى ۋنيۆەرسيتەت باسشىلىعىنىڭ ماقساتى – بەلگىلى تۇلعالاردى جۇرت كورسىن، قورعاۋىنا قاتىسسىن، سۇراقتارىن قويسىن، سوۆەت ۇكىمەتى كەزىندەگىدەي ءبارى اشىق ءوتسىن دەگەن نيەت.

«مەنىڭشە، مۇنىڭ ەش سوكەتتىگى جوق. قازاقستاندا «جۇلدىزدار ماگيستراتۋرادا وقىماسىن» دەگەن زاڭ بار ما ەدى؟! ولار دا ءبىلىم الۋعا قۇقىلى. ەرتەڭ وزدەرى دە ستۋدەنتتەرگە ساباق بەرۋى ءۇشىن جان-جاقتى بولۋى ءتيىس. بۇعان بولا داۋ شىعارۋ ورىنسىز»، - دەپ قورىتىندىلادى ءسوزىن سەرىكزات دۇيسەنعازين.

ايتا كەتەيىك، مىرزانتاي جاقىپتىڭ تاققان ايىبىنا مەيرامبەك بەسبايەۆ تا جاۋاپ بەرگەن بولاتىن. ءانشى ءوزىنىڭ بىرنەشە وقۋ ورنىن بىتىرگەنىن ايتىپ، داۋلى جاعدايعا «عالىمنىڭ ءىشتارلىعىن» كىنالادى.