بۇگىن مەملەكەت باسشىسى جۇمىس ساپارىمەن پاۆلودار قالاسىنا باردى، دەپ جازادى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

ساپارى بارىسىندا ەلباسى ءبىرقاتار ونەركاسىپ ورىندارىن ارالادى. بۇعان قوسا نازاربايەۆقا جاڭادان اشىلعان مارالدى دەمالىس ورتالىعى تانىستىرىلدى. اتالعان ورتالىق قالانىڭ تۋريستىك الەۋەتىن دامىتۋ ماقساتىندا اشىلعان.

الايدا پرەزيدەنتتى مارالدىداعى جاعدايعا كوڭىلى مۇلدە تولمادى. وبلىس اكىمى بولات باقاۋوۆقا «مۇنداي ماسقارانى ەشكىمگە كورسەتپە» دەپ بۇيىرىپ سالدى.

«ءقازىر بولات مارالدى دەمالىس ورتالىعىمەن تانىستىردى. بۇل ماسقارا عوي! ۇيات! ادامدار اياقتارىنان تىك تۇرىپ ءجۇر، وتىراتىن ورىن جوق. جينالعان جۇرتتى كوردىڭ بە؟ قوناق ۇيلەر تۇگىلى وتىراتىن ورىن دا جوق قوي؟ ءتىپتى شاتىر دا جوق. بۇل ناعىز ماسقارا! ادامداردىڭ كوڭىلىن اۋلايتىن ورىن كورىپ تۇرعان جوقپىن»، - دەدى مەملەكەت باسشىسى.

وسىعان وراي نازاربايەۆ مارالدىعا ينفراقۇرىلىم جۇرگىزۋ كەرەكتىگىن ەسكەرتتى.

«وندا اپاراتىن جولدى جوندەپ، بايلانىس ورناتىپ، كادىمگى بيزنەس جاساۋعا بولادى. سوندا ادامدار دا كوپتەپ جينالادى. نەگە پاۆلودارلىقتار ول جەردە ەكى قاباتتى كوتتەدجدەر، كىشىگىرىم قوناق ۇيلەر سالمايدى؟ قازاقستان بويىنشا ينفراقۇرىلىمدى نە ءۇشىن دامىتىپ وتىرمىن؟ ينفراقۇرىلىم ءۇشىن قوردان 9 ملرد دوللار ءبولدىم. قازاقستانداعى 5،5 مىڭ شاقىرىم جول جوندەلۋ كەرەك. بەس جىل ىشىندە 4،5 مىڭ شاقىرىم جول سالدىق، ءالى 5 مىڭ شاقىرىم جول بار. الەمنىڭ قارجىلىق ينستيتۋتتارى بىزگە سەنىپ، قاراجات بەرىپ وتىر.

مىنە، ءقازىر استانادان پاۆلودارعا دەيىن 3 ساعاتتا جەتىپ باراسىڭ. ءارى قاراي باياناۋىلعا جەڭىل جەتەتىندەي جول سالىنادى. مۇنىڭ ءبارى حالىق ءۇشىن»، - دەدى پرەزيدەنت.

مارالدى ەرتىس الابىنداعى تۇزدى كول. ونىڭ باتپاقتارى بىرنەشە دەرتكە داۋا. ايتا كەتەرلىگى، ريەۆماتيزم مەن بۇلشىق ەت اۋرۋلارىن جازادى.