ەلىمىزدە 26 ساۋىردە وتەتىن كەزەكتەن تىس پرەزيدەنت سايلاۋىنا "جۇلدىزدار وتباسى" مەن "اڭىز ادام" جۋرنالدارىنىڭ باس رەداكتورى جارىلقاپ قالىباي مىرزانىڭ قاتىساتىنى تۋرالى اقپاراتتى "قامشى" پورتالىندا جازعان ەدىك. باس رەداكتور جارىلقاپ مىرزا ق ر پرەزيدەنتتىگىنە ۇمىتكەر رەتىندە 12 ناۋرىز كۇنى ءوتىنىش بەرگەن. ول مەملەكەتتىك ءتىل سىناقتارىن ءساتتى تاپسىرىپ، وسك-نىڭ لينگۆيستيكالىق كوميسسيا مۇشەلەرىن تاڭ قالدىرعان. ءتىپتى، لينگۆيستيكالىق كوميسسيا ءتوراعاسى مىرزاتاي جولداسبەكوۆتىڭ ءوزى جارىلقاپ قالىبايدىڭ مەملەكەت باسشىسىنان كەيىنگى قازاق ءتىلىن جەتىك مەڭگەرگەندىگىمەن كوميسسيا مۇشەلەرىن تاڭ قالدىرعان ەكىنشى ادام ەكەندىگىن ايتقان ەدى. بۇگىندە قازاق ءتىلىنىڭ جوعىن-جوقتاپ، مۇڭىن-مۇڭداپ جۇرگەن جارىلقاپ قالىباي ۇلت جاناشىرلارىنان كومەك سۇرايدى. ق ر پرەزيدەنت سايلاۋ دوداسىنا ءوزىن-وزى ۇسىنعان جارىلقاپ قالىباي مىرزاعا مەملەكەتتىك سىناقتاردان سۇرىىنبەي وتكەنىمەن از عانا ۋاقىتتىڭ ىشىندە - 23 ناۋرىزعا دەيىن ق ر اۋماعىنداعى سايلاۋشىلاردىڭ 93 مىڭ قولىن جيناۋ جۇكتەلگەن. ال وسى مەجەگە جەتۋ ءۇشىن جارىلقاپ قالىبايدىڭ جاقتاستارى قىزۋ كىرىسىپ كەتكەن سياقتى. ول دا ءجون. اۋەبيكەشىنە "قازاقشا سويلە" دەگەنى ءۇشىن باسى داۋعا قالىپ، گيتلەردى "عاسىر قاسىرەتى" دەپ جازعانى ءۇشىن سوتتى بولعان جارىلقاپ قالىبايدى قاراپايىم قازاق شىن سىيلايتىنى انىق. سوندىقتان بولسا كەرەك، جارىلقاپ مىرزانىڭ ءوزى دە جۇرتشىلىقتان قولداۋ سۇراپ حات جازىپتى:
"قۇرمەتتى ۇلت جاناشىرلارى
مەن – «جۇلدىزدار وتباسى» مەن «اڭىز ادام» جۋرنالدارىنىڭ باس رەداكتورى قازاقستان رەسپۋبليكاسى پرەزيدەنتتىگىنە ۇمىتكەر رەتىندە تىركەلدىم. ەل ىشىندە ۇلتىما، مەملەكەتىمە قالاي قىزمەت ەتسەم دەپ جۇرگەن ۇلتجاندى، مەملەكەتشىل، ويلى ازاماتتار وتە كوپ. مەنىڭ بۇل سايلاۋ دوداسىنا قاتىسۋداعى باستى ماقساتىم – وسى مۇمكىندىكتى پايدالانىپ، قاراپايىم حالىقتىڭ مۇڭ-مۇقتاجى مەن تالاپ-تىلەگىن، سول ويلى ازاماتتاردىڭ بۇگىنگى قوعامداعى قوردالانىپ قالعان پروبلەمالارعا كوزقاراسى مەن ونى شەشۋ جولدارىن، بولاشاقتا قازاقستان قانداي ەل بولۋى كەرەك ەكەنىن، كەلە جاتقان داعدارىسقا قالاي قارسى تۇرامىز، ودان شىعۋ جولدارى قانداي دەگەن ۇسىنىس-پىكىرلەرىن بيلىككە جەتكىزۋ. سونىمەن قاتار ۇلت پاتريوتتارى مەن ۇلتشىل ازاماتتاردىڭ ۇلت مۇددەسى ءۇشىن الدىنا قويعان باعىت-باعدارلاماسىن حالىققا جەتكىزۋ. بۇل ماقساتىمدى جۇزەگە اسىرۋ ءۇشىن 23 ناۋرىزعا دەيىن قازاقستان رەسپۋبليكاسى اۋماعىنداعى سايلاۋشىلاردىڭ 93 مىڭ قولىن جيناۋ قاجەت بولىپ تۇر. سول ءۇشىن ءار وبلىستىڭ، اۋداننىڭ، اۋىلدىڭ ۇلتجاندى ازاماتتارى وسى شاراعا ءبىر كىسىدەي اتسالىسۋلارىن سۇرايمىن" دەلىنگەن حاتتا.
ارينە، قازاقستان بيلىگىن شيرەك عاسىردان بەرى ۇستاپ كەلە جاتقان پرەزيدەنت نۇرسۇلتان نازاربايەۆپەن باسكەلەس بولۋ قيىن. دەگەنمەن، كەز كەلگەن تالانتتى قازاق ۇرپاعىنىڭ ءوز ەلىن باسقارۋعا قۇقىقتى، لايىقتى ەكەنىن اركەز ەستەن شىعارماعان ءجون.
نۇرگەلدى ءابدىعاني ۇلى
پىكىر قالدىرۋ