پوليسيا ايالدامادا ەر ادامعا سەبەپسىز شابۋىلداعان جاسوسپىرىمدەرگە قانداي شارا قولدانىلعانىن ايتتى. ەسكە سالايىق، بۇل وقيعا بىرنەشە كۇن بۇرىن استانادا بولعان ەدى، ونىڭ ۆيدەوسى ينتەرنەتتە جاريالاندى. وقيعاعا قاتىستى "بۇزاقىلىق" بابى بويىنشا قىلمىستىق ءىس قوزعالدى.
پوليسەيلەر جابىرلەنۋشىنى تاپقان، ول بۇزاقىلاردىڭ ۇستىنەن شاعىم ءتۇسىردى. استانا ءىىد باسپا ءسوز حاتشىسى سوفيا قىلىشبەكوۆانىڭ حابارلاۋىنشا، 39 جاستاعى جەرگىلىكتى تۇرعىننىڭ شاعىمى سوتقا دەيىنگى تەرگەۋدىڭ ءبىرىڭعاي رەەسترىنە الىندى. جابىرلەنۋشى ەر ادام سولتۇستىك قازاقستاندا تۋعان، استانادا جۇمىس ىستەيدى.
"قاجەتتى تەرگەۋ ارەكەتتەرى جۇرگىزىلدى. سوتقا دەيىنگى تەرگەۋ ماتەريالدارى سوتقا جولداناتىن بولادى"، - دەدى قىلىشبەكوۆا. ونىڭ ايتۋىنشا، بۇزاقىلىق جاساعان ءۇش ءجاسوسپىرىمنىڭ ءاتى-جونى انىقتالدى، ولاردىڭ ەكەۋى كامەلەتكە تولماعان، سوعان قاراماستان، ولار ءۇشىنشى ايىپتالۋشىمەن بىرگە سوت الدىندا جاۋاپ بەرەتىن بولادى. ولار قوماقتى ايىپپۇل تولەۋى نەمەسە بوستاندىقتارىنان ەكى جىلعا دەيىن ايىرىلۋى مۇمكىن. ءقازىر بۇزاقىلار ەشقايدا كەتپەۋ تۋرالى قولحات قالدىرعان.
ەسكە سالايىق، بۇل وقيعا تۇسىرىلگەن ۆيدەو "ۆكونتاكتە" جەلىسىندە جاريالانعان ەدى. ۆيدەودان ەكى جاس جىگىتتىڭ ايالدامادا وتىرعان ەر ادامعا تيىسە باستاعانىن كورۋگە بولادى. ەر ادام بالالاردىڭ سۇراعىنا جاۋاپ بەرمەيدى. سول كەزدە كوك كۇرتەسى بار ءجاسوسپىرىم قالتاسىنان پىشاق الىپ شىقتى. كەيىن كوپ سوزگە بارماي، ەر ادامدى تەپكىلەي باستايدى. بۇل كەزدە ۆيدەوعا ءتۇسىرىپ تۇرعان ادامنىڭ كۇلگەنى ەستىلەدى. روليك اۆتورى مەن باسقا دا جاسوسپىرىمدەر الەۋمەتتىك جەلىلەردەن ءوز اككاۋنتتارىن ءوشىرىپ تاستادى. كەيىن پوليسيا ءۇش بۇزاقىنىڭ دا ۇستالعانىن حابارلادى.
پىكىر قالدىرۋ