كۇنى كەشە پورتالىمىزدا "اسەت يسەكەشيەۆ پەن دينارا ءساتجان "ولكەتانۋ" وقۋلىعىنا ەندى" دەگەن اقپارات سالعان ەدىك. ىلە-شالا "الماتىكىتاپ باسپاسىنا" حابارلاسىپ، جاۋاپتى ماماننىڭ تۇسىنىكتەمە بەرگەنىن قالادىق. مۇنداي اقپارات اتالمىش وقۋلىقتىڭ قانداي بەتىندە ەكەنىن، ول ءبولىمنىڭ اۆتورى كىم ەكەنىن بىردەن ايتا الماعان "الماتىكىتاپ باسپاسى" بىرنەشە ساعاتتىق ۇزاق ويلانۋدان كەيىن ۋادە ەتكەندەي پوشتامىزعا جاۋاپ بەرمەي، ءوز فەيسبۋك پاراقشالارىندا تۇسىنىكتەمە بەرىپتى. وعان دا شۇكىر. اسەت يسەكەشيەۆ پەن دينارا ءساتجان سياقتى يگى جاقسىلاردىڭ فەيسبۋك پەن ينستاگرامدا قانشا مىڭ جازىلۋشىسى بار ەكەندىگى جايلى مالىمەت 5-7 سىنىپ وقۋشىلارىنا قاجەتتى ەمەس دەپ ءتۇيىن تۇيگەن "الماتىكىتاپ باسپاسى" ۇجىمىنا باسىمىزدى يزەي وتىرىپ العىسىمىزدى ايتامىز. ەندەشە، وقىرمان قاۋىم، ءسۇيىنشىڭىزدى دايىنداي وتىرىپ، تومەندەگى تۇسىنىكتەمەگە ءمان بەرۋلەرىڭىزدى سۇرايمىز.

ءبۇي دەيدى: "5-7-سىنىپتارعا ارنالعان «ولكەتانۋ. استانا» وقۋلىعى «رۋحاني جاڭعىرۋ» اياسىندا جازىلىپ جاتقانى بارشاڭىزعا ءمالىم. قازىرگى تاڭدا تالقىعا تۇسكەن وقۋلىقتىڭ جوباسىنا بلوگەرلەر تۋرالى مالىمەتتى راسىندا دا اۆتورلار ۇجىمى العاشىندا «تۋعان ولكە پۋبليسيستيكا بەتتەرىندە» ايدارىمەن ۇسىنعان بولاتىن. پۋبليسيستيكانىڭ ءبىر ەلەمەنتى رەتىندە قازىرگى تانىمال بلوگەرلەردى كورسەتكەن اۆتورلىق ۇجىمنىڭ جوباسى، الايدا، وقۋلىقتىڭ سوڭعى نۇسقاسىنا كىرگەن جوق. «ولكەتانۋ» وقۋلىقتارى بويىنشا شىلدە ايىندا وتكەن مەملەكەتتىك ساراپتامادا ساراپشىلاردىڭ ۇسىنىسىمەن وقۋلىقتان بلوگەرلەر تۋرالى مالىمەت الىنىپ تاستالعان. 
باسپا ءسوز كونفەرەنسياسىندا جۋرناليستەرگە ۇسىنىلعان بىرنەشە نۇسقانىڭ ىشىندە نازارعا ىلىنگەنى - بلوگەرلەر سياقتى مالىمەتتەرى اۋىستىرىلاتىن، ازداعان وڭدەۋدى قاجەت ەتەتىن نۇسقاسى. 
وقۋلىقتاردى باسىلىمعا دايىنداۋ جۇمىسى الداعى قىركۇيەك ايىندا مارەسىنە جەتەدى دەپ جوسپارلاپ وتىرمىز. سۋرەتتە وقۋلىقتىڭ العاشقى نۇسقاسى جانە سوڭعى نۇسقاسى".

ءبىر ايتا كەتەتىنى، مۇنداي تۇككە تۇرعىسىز اقپاردى وقۋلىقتىڭ ىشىنە كىرگىزە وتىرىپ، ۇيدەي بالەگە تاپ بولاتىنىن بىلەتىن "الماتىكىتاپ باسپاسىنىڭ" و باستاعى كوزدەگەنى نە ەكەندىگى بىزگە جۇمباق بولىپ قالا بەرەتىندىگى.