ەل ىشىندە شىرقالىپ جۇرگەن حيت اندەردىڭ اۆتورى جالىندى جاس اقىن قىز نازەركە سەمەي اۆتورلىق قۇقىق پەن قالاماقى، اينالىپ كەلگەندە ادامگەرشىلىك تۇرعىسى جايىندا ءوزىنىڭ فەيسبۋك پاراقشاسىندا جازبا جاريالاپتى. "Qamshy.kz" اقپارات اگەنتتىگى ەركىن وي-پىكىر الاڭى ەكەندىگىن ەسكەرە وتىرىپ، نازەركەنىڭ جازباسىن قالىڭ وقىرمان نازارىنا ۇسىنامىز.

"وسى كۇنگە دەيىن «ءاننىڭ اۆتورلارى نەگە تاسادا قالا بەرەدى؟»، «نەگە انشىلەر وسى سازگەر-اقىن-وڭدەۋشى ەڭبەگىن دۇرىس باعالامايدى؟»، «نەگە ولاردى تەك انشىلەردىڭ ءوزى عانا تانيدى، حالىق تانىمايدى؟» دەپ تالاي جازبا شىعارىپ، شىرىلداعانمىن. شىنى كەرەك، جازعانىمدى ەلەگەن جان تابىلمادى. پاۆلودار قالاسىندا ءتىپتى داۋىسىمدى رۇقساتىمسىز پايدالانىپ جۇرگەندەر جايلى ەستىپ، وتە قاتتى كۇيىندىم. وسى ماسەلە حاقىندا بيبىگۇل داۋلەتبەكقىزىنان «وسىنداي ۇرىلارمەن قالاي كۇرەسۋگە بولادى؟» دەپ كومەك سۇراعانىم راس. ول كىسى بىردەن جاۋاپ بەرىپ، نومىرىنە حابارلاسۋىمدى سۇرادى. اڭگىمەمىز بارىسىندا كوزىمە جاس كەلدى، جۇرەگىم سىزدادى. 
اڭگىمەمىز «اگۋگاي، قۇربىم» ءانىنىڭ توڭىرەگىندە بولعان سوڭ، بيبىگۇل حانىم بىردەن «سالتانات باقايەۆا وسى ءماتىندى جازعانىڭ ءۇشىن قانشا قالاماقى بەردى؟» دەدى... وتىرىك ايتا المادىم. ءاندى اۋەننىڭ اۆتورى ەرحان الدانازاروۆ ارقىلى جازعان بولاتىنبىز. ءان شىققان سوڭ، حيت بولعان سوڭ دا، بەينەبايانى شىققاننان كەيىن دە سالتانات حانىم ءوزى «وسى ءانىمىز حيت بولدى، قالاماقىڭدى بەرەيىن» دەپ حابارلاسا ما دەپ كۇتتىم. سەبەبى مەنىڭ سانامدا «قالاماقىنى سۇرامايدى، قالاماقىنى بەرەدى» دەگەن باياعى اتا-بابالارىمىزدان قالعان تۇسىنىك قالىپتاسقان-دى. ولاي ويلاۋىم قاتە ەكەنىن تىم كەش ءتۇسىندىم. سالتانات حانىمنان قالاماقى سۇراماعانىم ءۇشىن مەن كىنالىمىن بە، الدە ريزاشىلىعىن ءبىلدىرىپ ءوزى ۇسىنباعان ول كىنالى مە – بۇل مەن ءۇشىن سۇراق. دەسە دە، «اگۋگاي، قۇربىم» انىنەن كەيىن سالتانات باقايەۆامەن ەرحان الدانازاروۆ ارقىلى تاعى ءبىر ءان جازاتىن بولدىق. بۇل جولى ۇزاتۋعا ەمەس، قىزدى ورتاعا الىپ شىعۋعا ارنالعان ءان. قالاماقى سۇرايتىنىمدى سازگەرگە بىردەن ەسكەرتتىم. اۋەندى تىڭداپ، وعان «ادەمى-اي» دەپ ات قويدىم. ونداعى ويىم «اگۋگاي» سوزىمەن كەلىستى بولسىن دەگەنىم. ءسوزدى جازدىم. سازگەر دە، سالتانات باقايەۆا دا ءسوزدى ۇناتتى. سول كەزدە عانا سالتانات حانىم تەلەفون نومىرىمە حابارلاستى. ونداعى ويى قالاماقى سوماسى جايلى كەلىسۋ. مەنىڭ ايتقان قالاماقى مولشەرى – 50 مىڭ، ونىڭ ۇسىنعانى – 20 مىڭ. كەلىسە المادىق. ول انگە ءماتىندى باسقا اقىنعا جازدىردى. مەن قارسى بولمادىم. ءبىراق ءان شىققان سوڭ عانا «ادەمى-اي» دەگەن اتى قالىپ قويعانىن ءبىلدىم. اۆتوماتتى تۇردە مەنىڭ جازعان ءماتىنىم دالادا قالدى. 4 جىلدا كوپ انشىمەن جۇمىس جاسادىم. كەيدە ءماتىندى ۇناتپايدى. ەڭبەك زايا كەتپەسىن دەپ، ول ماتىندەردى باسقا سازگەرلەرگە جىبەرىپ، ءان جازامىز. ال بۇل ماتىنمەن ونى دا جاساي المادىم. سەبەبى، قىز ۇزاتۋعا ارنالعان، ءارى اتى «ادەمى-اي» دەگەن تاعى ءبىر ءان شىقسا، مەن پلاگيات جاساعان بولار ەدىم. قانداي جامان، ءا؟ سول كەزدە ۇنجىرعامنىڭ قالاي ءتۇسىپ، قالاي جىلاعانىمدى كورسەڭىزدەر عوي... سەبەبى ماتىنگە بىرنەشە كۇنىمدى سارپ ەتتىم. «نەگە ءدال ءقازىر شىرىلداپ وتىرسىڭ؟» دەرسىزدەر. ايتايىن. و كەزدە جاس بولدىم، نە بارى 21 جاستا ەدىم. سولاي بولۋ كەرەك ەكەن عوي دەپ ويلادىم. مەن بىردەڭە دەسەم، «قويشى، دىم تانىمالدىلىعى جوق مىنا قىز نە ىستەي الادى؟» دەپ بىردەن اۋزىمدى جاۋىپ تاستاي ما دەپ ويلادىم. قولدايتىن ادام تابىلمادى، ءارى 19 مىڭ شاكىرتاقى الاتىن 4 كۋرس ستۋدەنتىنىڭ نەندەي قورعاۋشىسى بولار دەيسىز؟! 

كۇنى كەشە پاۆلوداردا ءتىپتى وسى انگە جازىلعان داۋىسىمدى بەيتانىس بىرەۋلەر پايدالانىپ جۇرگەندەرىن كورگەندە، شىدامىم تاۋسىلدى. «وسى جولى ۇندەمەسەڭ، ەرتەڭ ولەڭدەرىڭنىڭ اۆتورى باسقا بىرەۋ دەپ تە شىعار، سول كەزدە جىلايسىڭ!» دەدىم وزىمە. شىنى كەرەك، بيبىگۇل حانىم جازعانىمدى وقيدى دەپ تە ويلامادىم، ءبىراق ءبىر ءۇمىت بولدى. اللاعا شۇكىر، ءۇمىتىم اقتالدى! بيبىگۇل حانىمعا جولداعان ۆيدەوم تەك مەنىڭ عانا ەمەس، ءانشىنىڭ كولەڭكەسىندە قالاتىن، ءتىپتى انشىلەردىڭ ءوزى دە ەلەمەيتىن «سازگەر-اقىن-وڭدەۋشى» ۇشتىگىنىڭ الداعى شىعارماشىلىق جولىندا شىراق بولادى دەگەن سەنىمدەمىن".