ۇلتتىق ارنانىڭ اۋقىمدى ۇلتتىق جوباسى بيىل دا جالعاسىن تابادى، دەپ حابارلايدى Qamshy.kz اقپارات اگەنتتىگى ءتىلشىسى.  

كورەرمەن كوز ايىمىنا اينالعان «مەن قازاقپىن» حالىقارالىق بايقاۋدىڭ جالپى ىرىكتەۋ كەزەڭى اياقتالىپ، تەليەۆيزيالىق نۇسقاسىنىڭ العاشقى اينالىمىنىڭ ءتۇسىرىلىمى بۇگىن مارەسىنە جەتتى. 

قازاقتىڭ ءداستۇرلى ءان ايتۋ، تەرمە، كۇي تارتۋ ونەرىن ناسيحاتتاۋ جانە ءداستۇرلى ونەر جاناشىرلارىنىڭ مارتەبەسىن كوتەرۋ، ۇمىت بولعان ۇلتتىق ونەردى جارىققا شىعارۋ، الەم قازاقتارىنىڭ مادەني بايلانىسىن نىعايتۋدى ماقسات ەتكەن مەگاجوباعا بيىل ىرىكتەۋ كەزەڭىندە 2 مىڭنان استام ۇمىتكەر تىلەك ءبىلدىرىپ، 800-دەن اسا ونەرپاز قاتىسقان. 

قاتىسۋشىلاردان زاماناۋي نەمەسە اۆتورلىق شىعارمالاردى ەمەس، ءداستۇرلى حالىق ءان، كۇي، تەرمەلەرىن ورىنداۋدى تالاپ ەتىلەدى. بايقاۋدىڭ العاشقى اينالىمىنا 54 ونەرپاز قاتىسقان، ونىڭ ىشىندە موڭعوليادان - 3، رەسەيدەن - 2، جاپونيادان - 1 قوناق قاتىسۋشى، قالعانى ءوز ەلىمىزدەن. بۇگىنگى كەلەسى كەزەڭگە جولداما الاتىن 32 ۇمىتكەردىڭ ەسىمى بەلگىلى بولادى.  

«ىرىكتەۋ كەزەڭى بەلگىلى جۇيە بويىنشا اۋىل، اۋدان، وبلىس، ال ودان شىققاندار رەسپۋبليكالىق تەليەۆيزيالىق تۇسىرىلىمگە جولداما الدى. ودان بولەك، حالىقارالىق ىرىكتەۋ بولدى. قاتىسۋشىلاردىڭ سانىمەن قاتار، ساپاسى دا جوعارى دەپ ايتۋعا بولادى. بۇل - ءادىلقازىلاردىڭ ءسوزى»، - دەيدى «مەن قازاقپىن» جوباسىنىڭ اۆتورى جانە باس پروديۋسەرى قۋانىش سۇلەيمەنوۆ.  

بايقاۋ شارتى بويىنشا 18 بەن 40 جاس ارالىعىنداعى ءداستۇرلى ءانشى، كۇيشى، تەرمەشىلەر ب ا ق سىناۋدا. قازىلار القاسى قۇرامىندا مەملەكەت جانە قوعام قايراتكەرى مىرزاتاي جولداسبەكوۆ باستاعان باسقا دا ونەر مايتالماندارى بار. 

«حالىقارالىق جوبانىڭ بيىلعى دايىندىق جۇمىسى دا ەرتە باستالدى. مونعوليادا ىرىكتەۋ جۇمىستارىن مەملەكەتتىك مەرەيتويدىڭ ۇستىنەن ءتۇسىپ، جايلاۋدا وتكىزدىك. ال، رەسەيدەن ىرىكتەۋدى استراحان وبلىسىنان جاسادىق. قىتايدان وكىنىشكە وراي ساياسي جاعدايعا بايلانىستى ونەرپاز شاقىرا الماي وتىرمىز. ىرىكتەۋ جۇمىستارى تۋرالى كۇندەلىك حابار قىركۇيەك ايىنان باستاپ مەگاجوبامەن بىرگە كورسەتىلەدى. باعدارلاما قورىتىندىسى تۋرالى جەلتوقسان ايىندا گالاكونسەرت وتەدى»، - دەيدى باعدارلاما پروديۋسەرى ەرجان قوجابەكوۆ. ونىڭ ايتۋىنشا باعدارلاماعا قاتىسۋعا قىزىعۋشىلار سانى وتە كوپ. حالىقارالىق جوبا كەلەسى جىلى دا جالعاسىن تابۋى مۇمكىن. وعان تۇركيادان، وزبەكستاننان دا ونەرپازدار شاقىرىلىپ، اۋقىمى ءتىپتى دە كەڭەيە تۇسپەك. 

ەستەرىڭىزگە سالساق، باعدارلاما قىركۇيەك ايىنان باستاپ دەمالىس كۇندەرى كەشكى ۋاقىتتا كورسەتىلەدى.