جۋىردا رەسەي تەليەۆيزياسىنداعى ەڭ داۋلى باعدارلامالاردىڭ بىرىنە قاتىسقان پەتروپاۆلوۆسكىلىك انار بايماولدينا ەسىمدى ايەل ەشكىم كۇتپەگەن مالىمدەمە جاساعان. بۇل تۋرالى "قامشى" پورتالى "پۋست گوۆاريات" باعدارلاماسىنىڭ الەۋمەتتىك پاراقشاسىنا سىلتەمە جاساي وتىرىپ حابارلايدى.
33 جاستاعى انار بايمولدينا سولتۇستىك قازاقستاننىڭ پەتروپاۆلوۆسكى قالاسىنىڭ تۇرعىنى بولىپ شىقتى. ول رەسەيلىك "پۋست گوۆاريات" باعدارلاماسىنىڭ كەيىپكەرى بولعان باشقۇرتستان رەسپۋبليكاسى نيكولايەۆكا اۋىلىنىڭ تۇرعىنى سەرگەي بەلوۋسوۆقا باعدارلاما ۇستىندە عاشىق بولىپ، ءتىپتى تۇرمىسقا شىعۋعا دا دايىن ەكەنىن ايتقان.
وقيعا تومەندەگىدەي وربىگەن، جاقىندا ەڭ داۋلى توك-شوۋ - "پۋست گوۆارياتقا" 33 جاستاعى سەرگەي بەلوۋسوۆ ەسىمدى كوپبالالى اكە كەيىپكەر بولىپ كەلەدى.
"5 بالاسىن جالعىز ءوزى ءوسىرىپ وتىرعان باتىر اكەنىڭ ەرلىگىنە ءتانتى بولعان باعدارلاما قوناقتارى قۇر قاراپ وتىرا المادى. سەرگەيدىڭ قاجىرلىلىعى مەن ەرلىگى كوپكە ۇلگى بولارلىق ەدى. ءتىپتى، ءبىزدىڭ سايتىمىزعا سەرگەيدىڭ اتىنا كوپتەگەن حاتتار كەلىپ ءتۇسىپ جاتىر. ولاردىڭ ىشىندە، قازاقستاننان، ۋكراينادان، رەسەيدەن، ءتىپتى، اقش-تان دا حاتتار كوپ. ءبىزدىڭ سايتىمىزدان سەرگەي تۋرالى اقپاراتتاردى الىپ، قازاقستاننان انار بايمولدينا ەسىمدى ايەل كەلىپ، سەرگەيگە ءسوز سالدى. انار سەرگەي ەكەۋى تاعدىرلاس ەكەن. انار دا 4 بالانى جالعىز تاربيەلەپ وتىرعان باتىر انا ەكەن"،-دەيدى باعدارلاما جۇرگىزۋشىسى اندرەي مالاحوۆ.
"بىرىنشىدەن، ول ماعان ەركەك رەتىندە، باتىر اكە رەتىندە ۇنادى. مەنىڭ ومىردەگى ارماندارىمنىڭ ءبىرى - مەنى ەمەس، بالالارىمىزدى جاقسى كورەتىن ەركەك جولىقتىرۋ ەدى. مەن بالالارىمدى جالعىز تاربيەلەپ وتىرعان مىقتى ايەلمىن. ءبىراق، مەنىڭ جانىمدا مەنەن دە مىقتى ەركەك بولسا دۇرىس دەپ ويلايمىن"،-دەگەن انار بايمولدينا.
ونىڭ ايتۋىنشا مەملەكەتتەر اراسىنداعى شەكارا، ونىڭ سەزىمىنە توسقاۋىل بولا المايدى ەكەن.
"مەن ءوزى ەلىمنىڭ اسقان ءبىر پاتريوتى ەمەسپىن. مەنىڭ ومىرىمدەگى جەكە باقىتىمنىڭ جولىندا رەسەي مە؟ الدە قازاقستان با؟ ماعان ايىرماشىلىق جوق. مەن رەسەيگە كوشىپ كەلە الامىن"،-دەيدى انار بايمولدينا.
ال باعدارلاما كەيىپكەرى بولىپ وتىرعان سەرگەي بەلوۋسوۆ بولسا قازاقستاندىق جەسىر ايەلدىڭ بۇل ۇسىنىسىن قابىلداماي قويعان.
نۇرزات توعجان
