رەسەيدەگى ومبى قالاسىنىڭ تۇرعىنى ۇلتى قازاق ەلۋباي باقتىبايەۆ ەسىمدى اقىن ءبىر سوزدەن تۇراتىن كىتابىن شىعاردى. كىتاپ تارالىمى – 1000 دانا.

بۇل تۋرالى “سۋپەر ومسك” باسىلىمى جازدى. كىتاپ شىنىندا دا ءبىر عانا سوزدەن تۇرادى. “ال سودان سوڭ ءسوز بولدى” (“ا پوسلە بىلو سلوۆو”) دەپ اتالاتىن جيناقتا “ءيا-ا-ا-ا…” (“دا-ا-ا-ا-…”) دەگەن ءبىر-اق ءسوز بار. ال وعان دەيىن جانە كەيىن اۆتوردىڭ ءالعىسوزى مەن تۇسىندىرمەسى بەرىلگەن. “مەن مۇنى ۇزاق زەرتتەدىم، سوسىن جۇرتتىڭ وسى ءسوزدى قالاي ايتاتىنىن بايقاي باستادىم. الدەقانداي ءبىر جەردە الدەبىر نارسە بولا قالسا، ولار ويلانىپ الىپ، “ءيا” دەگەندى ايتادى. بۇل – قىپ-قىسقا ءسوز، ءبىراق ول تۇتاس ءبىر اڭگىمەنى، تاقىرىپتى تولىق الماستىرا الادى. ەگەر ونى الدەبىر جەردە ەستي قالساڭ، ايتىپ تۇرعان ادامنىڭ نە ويلاپ تۇرعانىن ويلانىپ قالاسىڭ دا، الدىن وراپ كەتەسىڭ”، — دەيدى باقتىبايەۆ. وسى ادەبي تۋىندىنى جازۋ يدەياسى ومبىلىق اقىنعا ۇلى وتان سوعىسى مايدانىندا شايقاسقان اكەسىمەن سويلەسىپ وتىرعاندا كەلگەن ەكەن. ول ءجۇرىپ وتكەن ءومىر جولدارىن ەسكە الىپ وتىرعاندا، ءار جولى ويلى قالىپتا ءدال وسىلاي: “ءيا-ا-ا-ا…” دەيتىن كورىنەدى. ەلۋباي باقتىبايەۆ اقىندىقپەن اينالىسادى. ونىڭ شىعارمالارى ينتەرنەتتە جاريالانىپ ءجۇر. ال 2009 جىلى ولەڭدەرى مەن قاناتتى سوزدەردەن تۇراتىن “كوككە قۇلاق تۇرگەندە” (“سلۋشايا نەبو”) دەگەن كىتابىن شىعارىپتى. ەگەمەن قازاقستان