كۇنكورىستىڭ قامىمەن قازاقستاندا ءجۇرىپ، سوسىن قىرعىزستان اسقان قاراقالپاق ازاماتى باعداتباي يسمايلوۆ وزبەكستاننىڭ پرەزيدەنتى شاۆكات ميرزەيەۆكە الەۋمەتتىك جەلى ارقىلى ۇندەۋ جاريالادى (تولىق نۇسقاسى تومەندە-رەد).

–مەن وزبەكستانداعى قاراقالپاق اۆتونوميالىق رەسپۋبليكاسىنىڭ قاراوزەك اۋدانىنداعى قاراوزەك سوۆحوزىنىڭ ازاماتىمىن. ۇلتىم - قاراقالپاق. ءاتى-جونىم –باعداتباي يسمايلوۆ. مەن قاراقالپاقستاندا جۇمىستىڭ جوقتىعىنان 2010 جىلى قازاقستانعا بالا-شاعامدى الىپ كەتۋگە ءماجبۇر بولدىم.  ويتكەنى ءبىزدىڭ ەلدە جۇمىس جوق. كۇن كورۋ قيىن. 2017 جىلعا دەيىن قازاقستاننىڭ قوقىس پوليگونىندا  جۇمىس ىستەدىم. 2017 جىلى ول ەلدە ءجۇرۋ مۇمكىن بولماعاننان كەيىن قىرعىزستان استىم. ءقازىر وسى ەلدەمىن. قىرعىزستاندا قاشىپ ءجۇرمىن،  بالا-شاعام قازاقستاندا قالدى.

شاۆكات ميرزيەيەۆ، مىنا ومىرگە ءبىز قاشۋ ءۇشىن كەلگەنىمىز جوق قوي. قاراقالپاقستاندا جۇمىس جوق. ال سەن اۋىلعا بارىپ «مىنانى ىستەپ جاتىرمىن» دەپ، وتىرىك ايتىپ، سايرايسىڭ.تۇك ىستەپ جاتقان جوقسىڭ! سەن حالىقتى كەدەي ەتىپ، قاراقالپاقستاننان قاڭعىرتىپ جىبەردىڭ. مەن ەندى تۋىپ وسكەن وتانىما بارا الماي وتىرمىن. بارسام، ءىس قوزعايدى. مەن ەركىن ازاماتپىن! ەركىن ءومىر ءسۇرۋىم كەرەك، شاۆكات! مىناۋ نە دەگەن سۇمدىق، نە دەگەن جاعداي شاۆكات! ۇردىڭىز، ءولتىردىڭىز، ءبارىن... ەندى نامىسىمىزعا ءتيىپ جاتىرسىز! ەتتەن ءوتىپ، سۇيەككە تىرەلدى... جەتەر! ءبىز قاي زاماندا ءومىر ءسۇرىپ جاتىرمىز؟! سەن بولساڭ، وتىرىك ايتىپ بىلشىلدايسىڭ. بولدى توقتات، شىدامنىڭ دا شەگى بار شاۆكات! شارشاتتىڭ، توزدىق ءبىز. مەنىڭ تۇرىمە قارا، 37 جاستامىن. 50 جاستاعى ادام سياقتىمىن. بولدى، شاۆكات! قاشانعا دەيىن حالىقتى قورلايسىڭ! سەنى اعا دەۋگە بولاتىن ەدى، ءبىراق وعان دا تۇرمايسىڭ. شەشەم 55 جاسىندا پەنسياعا شىقتى. پەنسياسى – 200 مىڭ سوم (9100 تەڭگە-رەد). بۇل نەگە جەتەدى، شاۆكات! ءوزىڭ شامالى ويلانشى، ول نەگە جەتۋى مۇمكىن؟! سەنىڭ رەستورانعا بارىپ، ءبىر وبەد ىشۋىڭە دە جەتپەيدى. شىدامنىڭ دا شەگى بار، شاۆكات. ءبىز دە ادامبىز! تۋىپ وسكەن ەلىمىزگە بارا الماي قالدىق.  ديۋانا بولدىق قوي، شاۆكات! وزبەكستان ءبىزدى ديۋاناعا اينالدىردى. وتىرىك ەمەس، اقيقات بۇل! بىزگە قاراقالپاقستاننىڭ ازاتتىعى، تاۋەلسىزدىگى كەرەك. ءسوز بوستاندىعى كەرەك!».

قاراقالپاق ازاماتىنىڭ پرەزيدەنت شاۆكات ميرزەيەۆكە ارناعان ۇندەۋىن  جان تەبىرەنبەي تىڭداۋ مۇمكىن ەمەس. راسىندا دا بۇل وزبەكستانداعى قازىرگى قوعامنىڭ شىنايى كورىنىسى. باسقا بەرمەسىن. جانىڭ، جۇرەگىڭ اۋىرادى.

...مۇمكىن ونىڭ جانايقايىن ءسىز دە تىڭداپ كورەرسىز!