وسىدان بىرنەشە ساعات بۇرىن الەۋمەتتىك جەلىدە الىمجەتتىك جاساعان وقۋشىلار تۋرالى بەينەكورىنىس تاراعانى بەلگىلى. وسىعان بايلانىستى تۇركىستان قالاسىنداعى مەكتەپ وقۋشىلارىنىڭ الىمجەتتىك ماسەلەلەرى بويىنشا  قالالىق ءبىلىم ءبولىمى ارنايى بريفينگ وتكىزدى. اتالمىش بريفينگكە تۇركىستان قالالىق ءبىلىم ءبولىمىنىڭ باسشىسى اقمارال باتىربەكوۆا، وبلىستىق ىشكى ىستەر دەپارتامەنتى تەرگەۋ ءبولىمىنىڭ باسشىسى بولات ەلمۇرزايەۆ جانە قالالىق ارداگەرلەر كەڭەسىنىڭ ءتوراعاسى جارقىنبەك قۇلبايىمبەتوۆ قاتىستى. بۇل تۋرالى تۇركىستان قالالىق اكىمىنىڭ باسپا ءسوز قىزمەتى اقپارات تاراتتى.
–بۇگىن الەۋمەتتىك جەلىدە تاراعان مەكتەپ وقۋشىلارىنىڭ اراسىنداعى الىمجەتتىك بارلىعىمىز ءۇشىن كۇتپەگەن جاعداي بولىپ وتىر. توبەلەسكە قاتىسۋشىلارى تولىق انىقتالىپ، پوليسيا تاراپىنان تەرگەۋ جۇمىستارى باستالىپ كەتتى. وقيعا قالامىزداعى مەكتەپتىڭ 9-سىنىپ وقۋشىلارى اراسىندا ساباقتان تىس ۋاقىتتا وتكەن. ياعني كەشكى ساعات 17:00-لەر شاماسىندا ورىن الىپ وتىر. ورىنسىز جايدىڭ الدىن الۋعا جۇمىس جاساماعان ادامداردىڭ تارتىپتىك جاۋاپكەرشىلىگى قارالادى. تەرگەۋ بارىسىندا اتا-انالاردىڭ، مەكتەپ باسشىلارىنىڭ جانە يۋۆەنالدى پوليسيا توبىنىڭ جاۋاپكەرشىلىكتەرى قارالۋدا، –دەدى اقمارال باتىربەكوۆا. 
اتالعان جايت، وبلىستىق ءبىلىم باسقارماسىنىڭ، وبلىستىق پوليسيا دەپارتامەنتىنىڭ قاتاڭ باقىلاۋىندا.
­–قازىرگى تاڭدا تۇركىستان قالالىق پوليسيا باسقارماسى، قالالىق ءبىلىم ءبولىمى تۇركىستان قالاسىنىڭ ءۇش مەكتەبىنىڭ 9-سىنىپ وقۋشىلارى اراسىنداعى قۇقىقبۇزۋشىلىق ارەكەتتەر جاساعانىن انىقتاپ، تەرگەۋ جۇمىستارى جۇرگىزىلۋدە. ءمان-جايى قوسىمشا حابارلانادى. بۇل ىسكە بايلانىستى جابىرلەنۋشىلەردىڭ دەنساۋلىقتارى قالىپتى، ساباققا تۇراقتى قاتىسۋدا، –دەپ حابارلادى تۇركىستان قالالىق اكىمىنىڭ باسپا ءسوز قىزمەتى.

سونىمەن قاتار، اكىمشىلكتىڭ باسپا ءسوز قىزمەتى «قۇقىقبۇزۋشىلىققا قاتىستى قوزعالعان ءىستى تۇركىستان وبلىستىق ىشكى ىستەر دەپارتامەنتى تىكەلەي وزىنە الدى. جاۋاپكەرشىلىكتەن مەكتەپ، مەكەمە جەتەكشىلەرى جانە اتا-انالار دا تىس قالمايدى. باستىسى كۇش قولدانىلعان وقۋشىلار ءدىن امان، ساباققا قاتىسۋدا.  قاتىگەزدىكتى كورسەتەتىن مۇنداي ۆيدەولاردى تاراتپاعاندارىڭىز ورىندى بولادى» دەگەن اقپارات تاراتتى.

بۇل وقيعاعا قاتىستى ىشكى ىستەر مينيسترلىگى دە جاۋاپ قاتتى.

–«بۇزاقىلىق ارەكەتكە قاتىسۋشىلارىنىڭ بارلىعى انىقتالدى. قازىرگى ۋاقىتتا ق ر قك 293-بابى 2- تارماعىندا قاراستىرىلعان قىلمىس بەلگىلەرى بويىنشا سوتقا دەيىنگى تەرگەۋ امالدارى جۇرگىزىلۋدە"، - دەدى ىشكى ىستەر مينيسترلىگىنىڭ رەسمي وكىلى.