بەلگىلى الماتىلىق فوتوگراف ولەگ يونوۆ Esquire پورتالىنىڭ تىلشىسىنە ەرەكشە سۋرەتى جايلى بايانداپ بەردى. سۋرەتتەن مۇز ۇستىندەگى گالوش كيگەن اقساقال مەن شومىلۋ كيىمىندەگى جاس قىزدى بايقايسىزدار. فوتوگراف الگى اقساقالدى مۇز ايدىنىنا الىپ شىعۋعا قالاي كوندىردى؟ شومىلۋ كيىمىمەن كونكي تەۋىپ جۇرگەن جاس قىز كىم؟ ەرەكشە سۋرەتتىڭ تاريحى جايلى فوتوگرافتىڭ وقيعاسىن Qamshy.kz اقپارات اگەنتتىگى قازاق تىلىنە اۋدارىپ، وقىرمان نازارىنا ۇسىنىپ وتىر.

80 جىلداردىڭ اياعىندا «مەدەۋ» مۇز ايدىنى تۇرعىنداردىڭ سۇيىكتى دەمالىس ورنىنا اينالدى. تۋريستەر ۇزىلمەيتىن، دەمالىس سايىن قالانىڭ جاستارى جينالاتىن ەدى. قالانىڭ كۇيبەڭ تىرشىلىگىنەن بىر-بىرىمەن كەزدەسۋگە مۇمكىندىكتەرى بولمايتىن تانىس-جاراندار دەمالىس كۇندەرى مەدەۋدە بايقاۋسىزدا كەزدەسىپ قالاتىن. سول كۇنى مەن مۇز ايدىنىندا «درۋجنىە رەبياتا» گازەتىندە بىرگە قىزمەت اتقارعان ارىپتەسىم، جاس جۋرناليست الەنا وستروۆسكايانى كەزدەستىردىم. ءوزى اقجارقىن، ادەمى، كوڭىلدى قىز ەدى. كۇن اسپاندا شاقىرايىپ تۇر، ال الگى جۋرناليست شومىلۋ كيىمىمەن كونكي تەۋىپ ءجۇر. اۋا رايى كەرەمەت بولدى، نەگە سولاي جۇرمەسكە... مەن ادەپكى ادەتىمە باسىپ، ورىندىققا وتىرىپ، فوتواپپاراتىمدى الىپ شىقتىم. الەنا قاسىما كەلىپ وتىردى. جانىمىزداعى ورىندىقتا اۋىلدان كەلگەن ءبىر توپ دەلەگاسيا وتىر ەدى، ولار «مەدەۋگە» كونكي تەبۋ ءۇشىن ەمەس، قالانىڭ كورىكتى جەرلەرىن تاماشالاپ جۇرگەن كورىنەدى.  سونداعى اۋىلدىڭ قۇرمەتتى اقساقالىنا باردىم دا: «ءسىزدى جاس قىزبەن سۋرەتكە ءتۇسىرىپ السام قالاي؟» دەپ سۇرادىم. ونەردىڭ مەن قادىرلەيتىن ەڭ كەرەمەت تۇسى – يۋمور. سول ساتتە كوز الدىما كەرەمەت ءبىر كادر ەلەستەدى. اقساقال دا قارسى بولمادى، گالوشىمەن بىرگە مۇزعا شىقتى. قۋانىشىمىزعا قاراي، باقىلاۋشىلار دا ەشتەڭەنى كورمەدى. اتام الەنانىڭ قۇلشىنا قۇشاقتاپ الدى، قىز دا قارسىلىق تانىتپاي، مايىسىپ سالا بەردى. ال مەن فوتوپلەنكامدى ۇنەمدەۋ ءۇشىن سۋرەتكە ءبىر رەت قانا ءتۇسىرىپپىن. ءارى قاراي الەنا ءوز جونىمەن كەتتى، اقساقال ەكسكۋرسياسىن جالعاستىرۋعا اتتاندى.

سۋرەتتى بىرنەشە سۋرەت كورمەسىنە ۇسىنعانىممەن، ەشقايدا جاريالانباعان ەدى. 25 جىلدان سوڭ الگى سۋرەتكە جاڭا لەپ ءبىتتى، ءبىر قىزىعى، وعان مەنىڭ قاتىسىم جوق ەدى. ايتەۋىر ينتەرنەتتە ءجۇر ەكەن. ينتەرنەتكە كىمنىڭ جاريالاعانىنان ءالى بەيحابارمىن. سۋرەتتى كورگەن ايەلىم الەنانى ۋايىمدادى. سەبەبى كەشەگى جاس جۋرناليست بۇگىن امەريكادا اتاقتى سۋكەربەرگتەرمەن كورشى تۇرادى ءارى مىقتى پروگرامميستىڭ ايەلى. وعان ءدال وسىنداي اتاق كەرەك پە ەدى؟

الەنا وستروۆسكايا

2015 جىلى الەنا الماتىعا كەلىپ، ەسكى ارىپتەستەر بولىپ باس قوسقان ەدىك. سوندا الەنا جايدارلى جۇزىمەن سۋرەتتىڭ ەرەكشە ەستەلىككە تۇنىپ تۇرعانىن ءارى جۇرتتىڭ نە ويلايتىنىندا، نە دەيتىنىندە شارۋاسى جوق ەكەنىن ايتقان. 

اۋدارعان: گۇلىم جاقان