الەمدە قازاقتاي ولەڭدەتىپ، ۇيقاسپەن، ويمەن، ماقاممەن سويلەسەتىن ۇلت جوقتا شىعار-اۋ، بۇل ونەر قازاقتىڭ ەرەكشە تالانتتى ۇلت ەكەندىگىن جەر بەتىنە دالەلدەيتىن جالعىز قاسيەتى. ايتىستى ءتۇسىنىۋ مەن تۇسىنبەۋ ءوز الدىنا ءبىر اقىرەت، سەبى ايتىس بەتپە-بەپ، سۋرىپ سالىپ بەتىڭ ءجۇزىڭ دەمەي ارقالانىپ شاباتپەن جىر توگەدى، شىن مانىندە ارقالى اقىنداردى تۇگەلدەي ءتۇسىنۋ قيىننىڭ قيىنى، اۋزىمەن قۇس تىستەگەن جۇيرىكتەر ءسوز سايىسىندا، ويىن وي قۋىپ ايتايىن دەگەنىن ايتپاي، ايتپايىن دەگەنىن ايتىپ جىبەرەدى، سول كەزدە ىشىندە قالعان ءسوزدى وقۋ، ءۇندى تىڭداۋ، بۇلقىنىستى جۇرەكپەن سەزىنۋ ءادىل قازىنىڭ موينىداعى ۇلكەن شارۋا بولماق. ايتسە وسى ۇلىق ونەردى سوڭعى جىلدارى بيلىك پارتياسىنىڭ ءوزى باس بولىپ ۇيمداستىرىپ، قارجىلاندىرىپ وتىرۋى بيلىكتىڭ حالىقپەن تىعىز بايلانىستا ەكەنىنىڭ دالەلى، بۇل «اقشا اقاش جانە اقاش» دەگەن ماتەريالدىق بايلىقتى ەمەس، رۋحاني بايلىعىمىزدى تىرىلتە باستاعانىنىڭ جاندى كورىنىسى. 2-3 مامىر كۇندەرى «نۇر وتان» پارتياسى مەن اتىراۋ وبلىستىق اكىمدىگىنىڭ قولداۋىمەن اتىراۋ قالاسى ماحامبەت اتىنداعى وبلىستىق قازاق دراما تەاترىندا رەسپۋبليكالىق «ۇرپاققا ۇران بولعان ۇلى جەڭىس!» اتتى الامان ايتىس ءوتىپ 24 ءسوز قۋعان جۇيرىك ب ا ق سىنادى. بۇل ايتىستى بىزدەر 10-11 مامىردا قازاقستان ۇلتتىق تەلە ارناسىندا تۇسكى ساعات 12 دەن باستاپ ەكى كۇن تماشالاپ تامساندىق...
تامساناتىن ءجونىمىز بار بولاتبەك پەن اسپانبەكتىڭ ايتىسى ءبىرىنشى كۇنىگى ايتىستىڭ شىڭى بولدى. ءاۋ، دەگەندە ولەڭدەتە سوزباقتاپ، سوزبەرمەي اسپاندا كوپ ۇشتى اسپانبەك اقىن، كەزەگى زورعا كەلگەن بولاتبەك قارسىلاسىنىڭ باسىنداعى ورامالىننا بايلانىستى ءسوز قوزعاپ، باياعىنىڭ بارىمتاشىلارى كيەتىن، بۇگىننىڭ قىزتەكەلەرى ورايتىن قازاققا جات تىرلىك دەپ ءبىر قايىرىپ، باتىرلار ەلىنە بارىمتاعا كەلدىڭ بە دەپ ءوزىنىڭ قازاقي دۇنيە تانىمدا تامىرىنىڭ تەرەڭ ەكەندىگىن بىردەن بايقاتتى، كەركۋلىك قىزۋقاندى اسپانبەك تەكقانا «كوكەرمەي» ورەلى وي ايتا ءبىلدى، ول «قىزجىبەك» كينوسىن العا تارتىپ شەگەنىڭ باس كيمىن كورمەدىڭ بە دەي كەلە، «مىڭبالا» كينوسىنداعى سارتايدىڭ كيمىنە ەلىكتەگەنىن دە جاسىرمادى، كوك جاشىكتىڭ الدىندا كوپ تەلمىرگەن مىناۋ ءبىر قۋىس كەۋدە ەكەن دەگەن بولاتبەكتىڭ ۇزستازىم دەپ قۇراننان باستاپ ورازالىگە اكەلىپ توقتاتا توكپەلەگەن جىرى اسپانبەكتىڭ توبەسىنەن ءجاي تۇسكەندەي جاسادى، وسىلاي جالعاسقان بولاتبەكتىڭ «ەتنو ايتىسى» قارسىلاسىن جەل قوپارعان تەرەكتەي تەرەيتتى.
سول كۇننىڭ تاعى ءبىر تاماشا ايتىسىن مەيىربەك جاسادى، ول اكەدەن بالاعا ميراس بولىپ وتىرعان بولاشاق ءمۇعالىم ەكەنىن ايتا وتىرىپ، بۇگىنگى قاعازعا تۇنشىققان وقىتۋشىنىڭ شىن كەيىپ-كەسپىرىن ءتاتتى جىرمەن قوعام شىندىعىن تاماشا جەتكىزدى حالىققا، وتىرعاننان قول سوقپاعاندار بولمادى سول ساتتە. امال نەشىك قارسىلاسى تارازىلىق اقىنىڭ قارىمى تومەن بولىپ، تالانتتى اقىن ءبىر قاناتى جوق قىرانداي كوپ نارسەنى قىسقا قايىردى. عالامات ايتىس كۇتكەن حالىققا باۋىرجان تاتىمدى جىر ايتا المادى، ءاۋ، دەگەننەن جاڭىلىپ ايتىس ارستانى بەكارىس سەنىڭ ازۋىڭدى قاعىپ الامىن دەپ سەس كورسەتتى، ال بەكارىس بەلدەن باسا تىستەگەن جەردەن باۋىرجانعا ازىۋ سالىپ ءبۇرىپ-بۇرىپ جىبەردى، دەسەدە جۇرت سۋىق قابىلدادى، وندا ءبىر ءتۇرلى «سىرىڭكەلىك پەن سىرعىماللىق» قاتار شاپتى. قولىمداعى جازىپ جاتقان جۇمىسىمدى تاستىپ «باكىسىن جوعالتقان شالداي» شەكە تامىرىم تىرىسىپ ءبىر سوتكە كۇتىپ، ەرتەسى تاعى تەلە جاشىككە تەلمىردىك، اقتىق سايىسقا وزا شاپقانداردان قىزىقتى ايتىس جاساعاندار شالقارباي مەن ەركەبۇلان بولدى، استانالىق ەركەبۇلان جاڭىلتباش ولەڭدى توگىپ-توگىپ شالقاربايعا بەرگەنلدە ولدا توسىلمادى، دەسەدە ءتىسقاقتى اقىننىڭ دەسى باسىم ءتۇسىپ وتىردى. الايدا اۋىلدا جۇرگەن تالانتتى اقىن شالقاربايعا قازىلار القاسى وڭ كوزبەن قاراپ وڭ باعاسىن بەردى. قاي ايتىستا بولسىن شىن شابىتتى شارىقتاتقان اتاقتى اقىن بەكارىس قارسىلاسىن وتكىر ويىمەن، توتياىن ءتىلىمىن ميىنىڭ ىڭعى- دىڭعىسىن شىعارار ادەتى بار ەدى. بۇل جولى بولاتبەكتىڭ ءتورت اياعىن تەڭ باسقان «قارتتار جايلى» ايتقان توپەگەن جاڭبىرداي توككەن ولەڭى جۇرتتى تەبىرەنتتى، ارتىنشا قالا مەن دالا جايلى بۇحارشا تولعادى، سول كۇنگى ايتىستىڭ اقباس شىڭدارىنداي ورەسى بيىك بولدى. بولاتبەكتىڭ بولاتتاي ويلارى بەكارىستىڭ جانىنان زۋلادى، اعا اقىن ورازالى ءتىرىلدى دەپ التى الاشقا جار سالىپ جەڭىلگەنىن مويىنداپ تەكتىلىگىن بايقاتتى.
باتىستاعى بۇل رەتكى ايتىس باسقا ايتىستان وزگەشە وتكەنىنىڭ ءبىر بەلگىسى تالاي جىلدان بەرى باعى جانباي جۇرگەن ساباز دا كەربەز تارلان جىرلار توگىپ جۇرگەن امانجول التايەۆتىڭ شاكىرتى ماقسات اقانوۆتىڭ ءبىرىنشى ورىندى الۋى ايتىس سۇيەر قاۋىمدى ءبىر كوتەرىپ تاستادى. سونىمەن بىرگە جاڭا شىققان جاس اقىن قىز تاۋشەنوۆاعا ءوز جۇلدەسىن بەرىپ ەكى كۇن بويى تاپجىلماي وتىرعان اكىم ىزمۇقامبەت اعامىز اسقان ەرلىك جاساپ ايتىستىڭ ءجاي ءسوز ەمەس ەكەندىگىن بايقاتتى. سوڭعى ءسوزدى العان «نۇر وتان» پارتياسى ءتوراعاسىنىڭ ءبىرىنشى ورىنباسارى باۋبەك مىرزانىڭ ءبىزدىڭ پارتيا سياقتى ايتىستا حالىق پەن بيلىك ورتاسىنداعى التىن كوپىر دەيكەلە، ەلباسى رۋحانيتقا ءمان بەر دەپ پارمەن بەرۋدە دەۋى جۇرتتى جۇباتتى.
بارلىعىنا وندىق بالمەن توعىزدىقتى بەرىپ وتىرعان ءادىل قازىلار القاسى ارتىنان قاتەسىن تۇزەپ، شىنايى باعالارىن اقىلداسا وتىرىپ كوكپاردى تەك سوڭىندا عانا قالعاندارمەن بولىسەتىن قازاقتارداي ءادىل تورەلىك جاسادى. ناتيجەسىندە باس جۇلدەنى بولاتبەك ورازبايەۆ قانجىعالاسا، ءبىرىنشى ورىندى ماقسات اقانوۆ يەلەندى. ەكىنشى ورىندى بەكارىس شويبەك پەن شالقارباي ءىزباساروۆ ءوزارا ءبولىستى. ءۇشىنشى وارىندى باۋىرجان حاليوللا، ەركەبۇلان قاينازار، مەيىربەك سۇلتانحان قاتارلى اقىندار قاناعات تۇتتى.
قازۇۋ شىعىستانۋ فاكۋلتەتىنىڭ اعا وقىتۋشىسى نۇرحالىق ابدىراقىن
