ءار جىلدىڭ باسىندا ءاربىر مينيسترلىكتە القالى جيىن وتەتىنى بىرنەشە جىلدان بەرى داستۇرگە اينالىپ كەلەدى. بۇل جولعى دەنساۋلىق ساقتاۋ مينيسترلىگىنىڭ القا ماجىلىسىندە وتكەن 2018 جىلدىڭ جۇمىستارىنا قورىتىندى جاسالىندى، سونىمەن قاتار، الداعى مىندەتتەر ايقىندالىپ، جوسپارلار بەكىتىلدى.

داستۇرگە اينالعان جيىننان ءبىز نە بايقادىق؟  قىسقاسى، دەنساۋلىق سالاسىندا العا جىلجۋ بار. مينيستر ەلجان ءبىرتانوۆتىڭ بايانداماسىنان تۇيسىنگەنىمىز، ەلباسى جولداۋىندا ايتىلعان ماسەلەلەر جۇيەلى تۇردە جۇزەگە اسىرىلىپ  كەلەدى.  2016-219 جىلدارعا ارنالعان «دەنساۋلىق»  باعدارلاماسىندا ايتىلعان مىندەتتەر ورىندالۋدا. اتاپ ايتار بولساق، مەديسينالىق-سانيتاريالىق العاشقى كومەكتى (مساك) جۇزەگە اسىرۋ بارىسىندا جۇمىستار جەمىستى جۇرگىزىلىپ جاتىر. سونىمەن كەڭەيتىلگەن القا ماجىلىسىندە نەندەي جۇمىستار جۇزەگە اسىرىلدى؟

1. رەسپۋبليكا بويىنشا جاڭادان مەديسينالىق ۋچاسكەلەر اشىلدى.
2. ءبىر جالپى پراكتيكالىق دارىگەرگە جۇكتەمەلەر ازايدى. بۇل كورسەتكىش 2016 جىلى ءبىر دارىگەرگە – 2074 تۇرعىننان بولسا، 2017 جىلى - 1984، 2018 جىلى – 1773 بولىپ وتىر.
3. 40 جاستان 70 جاسقا دەيىنگى  جاس توپتارىندا سكرينينگتەردى قامتۋ دەڭگەيى كەڭەيتىلدى.
4. مساك قارجىلاندىرۋ شەڭبەرىندە كەشەندى جان باسىنا شاققانداعى نورماتيۆ 1 تۇرعىنعا شاققاندا 683-دەن 819 تەڭگەگە  (20 پايىزعا) ارتتى.
5. مەديسينالىق-سانيتاريالىق العاشقى كومەكتىڭ (مساك) سيفرلاندىرۋ اياسىندا دارىگەر قابىلداۋىنا ونلاين جازبا ەنگىزىلدى، وسىعان بايلانىستى ادامداردىڭ كەزەگى 2 ەسەگە قىسقارعان.
6. قازىرگى كۇنگە دەيىن 5،3 مىڭنان استام مەديسينا قىزمەتكەرى وقىتىلدى جانە 2019 جىلدىڭ سوڭىنا دەيىن 100 پايىز مەديسينا قىزمەتكەرلەرىن وقىتۋ جوسپارلانىپ وتىر،
7. 2019 جىلى مساك قىزمەتكەرلەرىنىڭ جالاقىسىن كوتەرۋ ءۇشىن 5،3 ميلليارد تەڭگە، جالاقىسى تومەن مەديسينالىق ۇيىم قىزمەتكەرلەرىنىڭ جالاقىسىن ارتتىرۋعا 27،1 ميلليارد تەڭگە بولىنەتىن بولدى.
8. «جەدەل كومەك دارىگەرى» ماماندىعى بويىنشا 340 ادامدى وقىتۋ باعدارلاماسى ەنگىزىلدى.
9. پرەزيدەنت تاپسىرماسى بويىنشا «حالىق دەنساۋلىعى جانە دەنساۋلىق ساقتاۋ جۇيەسى» قازاقستان رەسپۋبليكاسى كودەكسىنىڭ جاڭا رەداكسياسىن قابىلداۋعا قاتىستى تالقىلاۋلار ءجۇرىپ جاتىر. بۇگىنگى دەيىن 500-دەن استام ۇسىنىس تۇسكەن.
10. جىل سايىن دارىگەرلەردىڭ دە، مەدبيكەلەردىڭ دە جالاقىسى ءوسىپ كەلەدى. 2018 جىلى دارىگەرلەردىڭ قولىنا تيەتىن ورتاشا جالاقىسى 142 مىڭ تەڭگەنى قۇرادى.
11. 2018 جىلى دارىلىك زاتتار مەن مەديسينالىق بۇيىمدارعا 6537 ساراپتاما جاسالدى، بۇل 2017 جىلمەن سالىستىرعاندا 18 پايىزعا ارتىق.  سونداي-اق 63 مىڭعا جۋىق مەديسينالىق ءونىمنىڭ قاۋىپسىزدىگى مەن ساپاسى تۋرالى قورىتىندى بەرىلدى.
12. سالاۋاتتى ءومىر سالتىن قالىپتاستىرۋ جانە «دەنساۋلىق» باعدارلاماسىنىڭ  ناتيجەسىندە  ادامداردىڭ ەمحاناعا بارۋ سانى 2 ەسە ازايدى، كەزەك كۇتۋ 2 ەسە تومەندەدى.
13. «قاعازسىز اۋرۋحانا» مەن ەلەكتروندى قىزمەتتىڭ ناتيجەسىندە دارىگەرلەر مەن پاسيەنتتەردىڭ ۋاقىتى 50 پايىزعا ۇنەمدەلدى.
14. سمارتفوندار ارقىلى زەرتتەۋلەر ناتيجەلەرىن الۋ ەسەبىنەن ولاردى الۋ ۋاقىتى  دا 2،5 ەسە ازايدى.
15. «قاعازسىز اۋرۋحانا» جوباسىنىڭ ناتيجەسىندە جىلىنا 3 200 توننا قاعازدى ۇنەمدەلدى.
16. ستاسيونارلاردىڭ قابىلداۋ بولىمشەلەرىندەگى 18 مەديسينالىق ۇيىمدا پيلوت جۇيەسىنىڭ ترياجى ەنگىزىلدى.
17. جولداۋداعى قوعامدىق دەنساۋلىقتى باسقارۋدى كۇشەيتۋ تۋرالى ەلباسى تاپسىرماسىنا بايلانىستى قوعامدىق دەنساۋلىق ساقتاۋ ۇلتتىق ورتالىعى  قۇرىلدى.

مىنە، بۇل قازاقستاندا دەنساۋلىقتى ساقتاۋدىڭ 2016-2019 جىلدارعا ارنالعان باعدارلاماسىنىڭ اياسىندا جۇزەگە اسىرىلعان جۇمىستاردىڭ ءبىرقاتارى عانا. قالاي ايتقاندا دا، مەديسينا سالاسىندا العا جىلجۋ بار. مۇنى حالىق تا سەزىنىپ وتىر.

 ەڭ باستىسى،  پرەزيدەنتتىڭ حالىققا ارناعان  جولداۋىنداعى «قازىرگى دەنساۋلىق ساقتاۋ ءىسى قىمباتقا تۇسەتىن ستاسيونارلىق ەمگە ەمەس، نەگىزىنەن اۋرۋدىڭ الدىن الۋعا باعىتتالۋعا ءتيىس. سالاماتتى ءومىر سالتىن ناسيحاتتاي وتىرىپ، قوعامدىق دەنساۋلىقتى باسقارۋ ءىسىن  كۇشەيتۋ كەرەك. تيىمدىلىگى از جانە مەملەكەت ءۇشىن شىعىنى كوپ ديسپانسەرلىك ەم قولدانۋدان نەگىزگى  سوزىلمالى اۋرۋلارعا الىستان دياگنوستيكا جاساپ، سونداي-اق وسى سالانى امبۋلاتورلىق ەمدەۋ ارقىلى باسقارۋعا كوشۋ قاجەت»  دەگەن تاپسىرمالارى تياناقتى ورىندالىپ جاتىر.  دەمەك،  مۇنى ۇكىمەت پەن ءتيىستى مينيسترلىكتەردىڭ  دۇرىس جۇمىس ىستەپ جاتقانىنىڭ  ناتيجەسى دەپ ءتۇسىنۋ كەرەك.