وقۋشى ءمۇعالىمنىڭ ار-نامىسىنا نۇقسان كەلتىرسە، اتا-اناسى 252 مىڭ 500 تەڭگە ايىپپۇل تولەۋى مۇمكىن دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ.

اكىمشىلىك قۇقىقبۇزۋشىلىق تۋرالى كودەكسكە وسىنداي وزگەرىس ەنگىزىلمەك. 

جاڭا زاڭ جوباسى بويىنشا، ءمۇعالىمنىڭ كاسىبي جۇمىسىنا نەگىزسىز ارالاساتىندار نەمەسە كەدەرگى كەلتىرەتىندەر 7.275 تەڭگە ايىپپۇل تولەيدى. وقۋ-تاربيە جۇمىستارىنا قاجەتتى قۇرال-جابدىق الۋدى پەداگوگتىڭ موينىنا ارتىپ قوياتىندارعا دا وسىنداي جازا قاراستىرىلعان.

ال ءوز مىندەتىنە قاتىسى جوق جۇمىسقا جەگەتىندەر 25 250 تەڭگە ايىپپۇل ارقالايدى. ەڭ ۇلكەن اكىمشىلىك جازا وقۋشىلارعا كەلىپ تۇر. كامەلەتكە تولماعان بالا ءمۇعالىمنىڭ ار-نامىسىن تيسە، 252 مىڭ 500 تەڭگە ايىپپۇل اتا-اناسىنا نەمەسە ولاردىڭ ورنىن الماستىرعان كىسىلەرگە سالىنادى.