ازاتتىق راديوسىنىڭ ءتىلشىسى اسىلحان ماماش ۇلىنىڭ «قاريا مەن تەڭىز» ءفيلمى قازاقستان جۋرناليستەر وداعىنىڭ جۇلدەسىنە يە بولدى دەپ جازادى Qamshy.kz اقپارات اگەنتتىگى قازتاگ-تىڭ دەرەگىن نەگىزگە الىپ.

قازتاگ-تىڭ جازۋىنشا، اسىلحان ماماشۇلىنا «ساياسي شولۋ» نوميناسياسى بويىنشا جۇلدە «ارال تەڭىزىنىڭ قالىپقا كەلەرىنە سەنەتىن اۆتورلىق پوزيسياسى ءۇشىن» بەرىلگەن.

وداق جۇلدەسى 10 جۋرناليسكە بەرىلگەن. «ءتىلشى قىزمەتى» نوميناسياسى بويىنشا جۇلدە - Informburo.kz ءجۋرناليسى ەۆگەنيا بودروۆاعا، «ەكونوميكالىق شولۋ» نوميناسياسى - «ەگەمەن قازاقستان» گازەتىنىڭ ماڭعىستاۋ وبلىسى بويىنشا ءتىلشىسى گۇلايىم شىنتەمىرقىزىنا، «ىزدەنىس ماتەريالى» جۇلدەسى – «اق جايىق» ءتىلشىسى فارحات ابىلوۆكە، «تەليەۆيزيالىق جۇمىس» نوميناسياسى – «الاۋ» تەلەارناسىنىڭ ءجۋرناليسى تاتيانا موروزعا، «جۋرناليستىك زەرتتەۋ» جۇلدەسى «سپۋتنيك-قازاقستان» ءتىلشىسى الەكساندر ميروگلوۆعا بەرىلگەن.

بۇدان بولەك، «زەرتتەۋ ەڭبەگى» جۇلدەسىن - «قازاق ءۇنى» گازەتى باس رەداكتورىنىڭ ورىنباسارى زەينوللا اباجان، «عىلىمي-تانىمدىق ەڭبەك» نوميناسياسىن - «كۋرسيۆ» ءتىلشىسى يرينا وسيپوۆا، «فوتوەڭبەك» سىيلىعىن – «قوستاناي جاڭالىقتارى» گازەتىنىڭ ءفوتوتىلشىسى كونستانتين ۆيشنيچەنكو، «ينتەرنەت-جوبا» جۇلدەسىن Vlast.kz ينتەرنەت-جۋرنالىنىڭ باس ديرەكتورى ۆياچەسلاۆ ابراموۆ العان.

جۋرناليستەر وداعى مەن «اق جايىق» گازەتىنىڭ ءابدىلدا مۇقاشيەۆ اتىنداعى بىرلەسكەن جۇلدەسى «ۋرالسكايا نەدەليا» گازەتىنىڭ باس رەداكتورى لۇقپان احمەدياروۆكە بەرىلگەن. قازاقستان قورعانىس مينيسترلىگى باسپا ءسوز قىزمەتىنىڭ ءفوتوتىلشىسى دۋمان قۇرمانعالييەۆ ءفوتوتىلشى راحىمباي ءحانالى اتىنداعى ارناۋلى سىيلىقتى العان.

جۋرناليستەردى ماراپاتتاۋ ءراسىمى 26 ماۋسىم كۇنى 11.00-دە «ەۋرازيا» ساۋدا ورتالىعىنىڭ باسپا ءسوز زالىندا وتەدى.