اتىراۋ وبلىسىنىڭ اكىمى نۇرلان نوعايەۆپەن كەزدەسۋدە جاپون كومپانياسىنىڭ وكىلى وسىنى مالىمدەدى.
- تۇركىستان وبلىسىنداعى قايعىلى وقيعا تۋرالى ءبارىمىز دە حاباردارمىز. 40 مىڭنان استام زارداپ شەككەندەر بۇگىندە ۇيىنە ورالا الماي وتىر. جاپونياداعى اتوم ەلەكترستانسياسىنداعى اپات كەزىندە قازاقستان ءبىزدىڭ حالقىمىزعا ولشەۋسىز كومەك، قولداۋ كورسەتتى. ءبىز ونى ۇمىتقان جوقپىز، سوندىقتان زارداپ شەككەندەرگە قولىمىزدان كەلگەنشە كومەكتەسۋگە دەگەن نيەتتەمىز،-دەدى «Tokyo Rope Almaty» ءجشس-نىڭ باس ديرەكتورى تاكەياما توشيو.
ءوڭىر باسشىلىعىمەن كەزدەسۋ كەزىندە جاپون ينۆەستورلارى ەكى جاقتى ىنتىماقتاستىق ماسەلەلەرىن تالقىلادى. كۇنشىعىس ەلىنىڭ بيزنەس – كومپانيالارىنىڭ اتىراۋ وڭىرىنە قىزىعۋشىلىق تانىتۋىنىڭ سەبەبى - قازاقستاننىڭ مۇناي-گاز سالاسىنداعى نەعۇرلىم ءىرى جوبالارى وسىندا شوعىرلانعان. ءوڭىردىڭ ينۆەستيسيالىق مۇمكىندىكتەرىمەن تانىسۋ ءۇشىن اتىراۋعا «Metal One Corporation»، «Metal One Steel Products Corporation» جانە باسقا دا كومپانيالاردىڭ باسشىلىعى كەلدى.
​الەم بويىنشا بولات ونىمدەرىن وڭدەۋمەن شۇعىلداناتىن 160 جاپوندىق جانە شەتەلدىك كومپانيالارىمەن جۇمىس جاسايتىن «Metal One Corporation» كومپانياسى بولات ديستريبيۋسياسى سالاسىنداعى كوشباسشى بولىپ تابىلادى.
«MetalOneSteelProductsCorporation» جالپىۇلتتىق كولەمدە سىم شىبىقتارىن، ارنايى بولات جانە توت باسپايتىن بولات شىعارۋمەن اينالىسادى.
وبلىس اكىمى نۇرلان نوعايەۆ ينۆەستورلاردى ءوڭىردىڭ ينۆەستيسيالىق مۇمكىندىكتەرىمەن تانىستىرىپ، ەلباسىنىڭ، پرەزيدەنتتىڭ ەل ەكونوميكاسىنا ينۆەستيسيالار تارتۋعا زور ماڭىز بەرىپ وتىرعانىن اتاپ ءوتتى. «ءبىز ءتيىمدى قارىم-قاتىناس ءۇشىن قاجەتتى بارلىق جاعدايدى جاسايمىز، ەكىجاقتى ىنتىماقتاستىڭ الەۋەتى زور»،-دەپ ءوڭىر باسشىسى اتاپ ايتتى.
​جاپوندىق ينۆەستورلار ءونىم وندىرەتىن ءوز زاۋىتىن سالۋدى جوسپارلاپ وتىر. جۇمىس ساپارى كەزىندە ولار بولاشاق قۇرىلىستىڭ الاڭشاسىن قارايدى. سونداي-اق، يندۋستريالدىق مۇناي حيمياسى تەحنوپاركىنىڭ جۇمىسىمەن تانىسادى.