اتىراۋدا 20 توننا گۋمانيتارلىق جۇك جينالدى. ونىڭ ىشىنە ازىق-تۇلىكتەر، جەكە گيگيەنا قۇرالدارى جانە ءبىرىنشى كەزەكتە قاجەتتى زاتتار كىرەدى.
«دينا» ساۋدا ورتالىعى ديرەكتورىنىڭ ايتۋىنشا، مۇنايلى وڭىردەن العاشقى گۋمانيتارلىق جۇك بۇگىن، ياعني 25 ماۋسىم كۇنى اتتانادى. كومەككە ساۋدا ورتالىعىنان جالعا الىپ وتىرعان 100-دەن استام كاسىپكەر قاتىستى.
- اتىراۋ وبلىسى اكىمى نۇرلان نوعايەۆ ارىس قالاسىنداعى توتەنشە جاعداي سالدارىنان زارداپ شەككەندەردى قولداۋعا جانە تۇرعىندارعا كومەك كورسەتۋگە شاقىردى.  ءبىز "ارىس، ءبىز بىرگەمىز" اتتى جالپى قازاقستاندىق اكسياعا قاتىسۋعا شەشىم قابىلدادىق. وسىنىڭ ارقاسىندا 20 توننا قاجەتتى جۇك جينالدى. ءقازىر ءبىز بارلىق جۇكتەردى تيەپ جاتىرمىز. جاقىن ارادا گۋمانيتارلىق كومەك جونەلتىلەتىن بولادى. بۇدان بولەك، ب ا ق جاريالاعان بانك شوتتارىنا قاراجاتتارىن اۋدارۋدا،- دەيدى «دينا» ساۋدا ورتالىعىنىڭ ديرەكتورى نۇرلان تاۋەكەل.
ايتا كەتەيىك، 24 ماۋسىم كۇنى تاڭەرتەڭ ارىس قالاسىندا اسكەري ءبولىمنىڭ قويماسىندا جارىلىس ورىن العان بولاتىن. قويمالارىنىڭ بىرىندە ءورت باستالىپ، ارتىنشا جارىلىسقا ۇلاسقان. بارلىق تۇرعىندار ەۆاكۋاسيالانىپ، جاقىن ماڭداعى ەلدى مەكەندەرگە جەتكىزىلدى.