اقپارات جانە قوعامدىق دامۋ ءمينيسترى داۋرەن ابايەۆ شىمكەنت قالاسىنا ەۆاكۋاسيالانعان ارىستىقتاردىڭ شەرۋى تۋرالى پىكىر ءبىلدىردى دەپ جازادى Qamshy.kz اقپارات اگەنتتىگى.

ايتا كەتۋ كەرەك، بۇگىن ءتۇس الەتىندە ارىس قالاسىنان ەۆاكۋاسيالانعان تۇرعىندار بيلىكتەن ءۇي مەن جەر تەلىمىن تالاپ ەتىپ، رۇقسات ەتىلمەگەن ميتينگكە شىققان-دى.

–مەنىڭ ويىمشا، بۇل – ەموسيانىڭ العا شىعۋىنىڭ جەمىسى. ساناسى اشىق ازاماتتار بارلىعىن باسىنان باعامدايدى. وبلىس اكىمى مەن قالا اكىمى جيىلعاندارمەن جەدەل كەزدەسىپ، جاعدايدى ءتۇسىندىردى. ولار ەرتەڭ-اق، ءوز قالالارىنا قايتادى. ۇيلەرىن جاڭادان سالىپ، جوندەپ بەرەدى. مەنىڭ ويىمشا، بۇل قالا بۇرىنعىسىنان الدەقايدا جاقسارادى، - دەدى مينيستر "حابار" ارناسىنا بەرگەن سۇحباتىندا.

ونىڭ ايتۋىنشا، ارانداتۋشىلار مەن ارام نيەتتىلەر اشىنعان حالىقتىڭ اشۋ-ىزاسىن ءوز مۇددەلەرىنە پايدالانىپ وتىر. قازىرگى ۋاقىتتا بۇل ىسپەن قۇقىق قورعاۋ ورگاندارىنىڭ قىزمەتكەرلەرى اينالىسۋدا.

–تىنىشتىق پەن اشىق سانانى ساقتاپ قالۋىمىز كەرەك. جەدەل ارادا ءبارى قالپىنا كەلەتىنىنە مەن كامىل سەنەمىن، - دەدى مينيستر.

ابايەۆتىڭ ايتۋىنشا، ارىس قالاسىندا ورىن العان توتەنشە جاعدايدىڭ شىعۋ سەبەبى انىقتالىپ، كىنالىلەر جازاسىنە الادى.

–ايتاتىنى جوق، بەيبىت كۇندە توبەڭنەن ىسىلداعان سنارىيادتىڭ ۇشۋى – جىبەرىلمەۋى ءتيىس قاتەلىك. بيلىك مۇنى ءسوزسىز تۇسىنەدى. ءبىز – مۇنداي توتەنشە جاعدايلار ورىن العان العاشقى ەل ەمەسپىز، - دەدى ابايەۆ.

بەلگىلى دەرەككوزدەردەگى اقپاراتتارعا سەنسەك، ارىس قالاسىنىڭ تۇرعىندارى ەرتەڭنەن باستاپ ءوز ۇيلەرىنە ورالادى. ال قالاعا كىرۋگە رۇقسات بەرىلگەن كۇننەن-اق قامكوڭىل ەلدىڭ قامى ءۇشىن ىسكە كىرىسۋگە بىلەك سىبانىپ وتىرعانداردىڭ قاراسى قالىڭ.