قازاقستان پرەزيدەنتى قاسىم-جومارت توقايەۆ ءبىلىم بەرۋ جۇيەسىندەگى كەدەرگىلەردى اتادى دەپ حابارلايدى Qamshy.kz اقپارات اگەنتتىگى.

بۇل تۋرالى اقوردانىڭ باسپا ءسوز قىزمەتى Twitter جەلىسىندە پرەزيدەنتتىڭ سوزىنەن ءۇزىندى جاريالادى. 

"ءبىلىم بەرۋ جۇيەسىنىڭ ساپاسىنا تەرىس ىقپال ەتەتىن تاعى ءبىر كەدەرگى – ۇسىنىلاتىن رەفورمالاردا پەداگوگتاردىڭ ناقتى قاجەتتىلىكتەرىنىڭ ەسكەرىلمەۋى"، - دەدى پرەزيدەنت.

"ۇلى اباي ۇنەمى سىنعا العان ماسىلدىق قوعامعا ەشقاشان جاقسىلىق اكەلگەن ەمەس. سونى تۇسىنەتىن جاستارىمىز تەك بىلىممەن قارۋلانىپ، ەڭبەككە عانا ارقا سۇيەۋى ءتيىس. ادام كاپيتالىنا، ءبىلىم سالاسىنا قويىلاتىن تالاپتار مۇلدەم وزگەشە. ساپالى ءبىلىم قارقىندى دامۋدىڭ باستى شارتىنا اينالدى. تاربيە – ساپالى ءبىلىمنىڭ نەگىزگى ارقاۋى، دىڭگەگى. ءال-فارابيدىڭ «تاربيەسىز بەرىلگەن ءبىلىم – ادامزاتتىڭ قاس جاۋى» دەگەن ءسوزى بارشا ءبىلىم سالاسى قىزمەتكەرلەرىنىڭ بوي تۇزەر باعدارى بولۋى ءتيىس. ۇستازسىز ادام بولمايدى. ءبارىمىز دە كەزىندە ءمۇعالىمنىڭ ءتالىمىن الىپ، ءبىلىمىن ۇيرەندىك. سوندىقتان، بولاشاققا جول سىلتەيتىن ءمۇعالىمنىڭ ەڭبەگىن لايىقتى باعالاۋ – وتە ماڭىزدى مىندەت"، - دەدى توقايەۆ بايانداماسىندا.

"بۇل ءۇشىن ءبىر ورىندا تۇرىپ قالماي، ىلگەرىلەۋىمىز كەرەك. سوندىقتان ءبىلىمى مەن ويى وزىق ۇرپاقتى تاربيەلەيتىن مۇعالىمدەر قاۋىمىنا زور جاۋاپكەرشىلىك جۇكتەلەدى. سىزدەردىڭ بۇگىنگى شاكىرتتەرىڭىز – قازاقستاننىڭ جارقىن بولاشاعى. ساپالى ءبىلىم – جەتىستىككە جەتۋدىڭ جولى ءارى ەكونوميكانى دامىتۋدىڭ باستى قۇرالى. "جەتى ءتۇرلى ءىلىم بىلەتىن ۇرپاق تاربيەلەۋ – بۇگىنگى كۇننىڭ نەگىزگى مىندەتى"، - دەدى پرەزيدەنت.

"ەلباسى "قازاق ءتىلى ءۇش ءتىلدىڭ بىرەۋى بولىپ قالمايدى. ءۇش ءتىلدىڭ ءبىرىنشىسى، نەگىزگىسى، باستىسى، ماڭىزدىسى بولا بەرەدى" دەپ وتە ونەگەلى وي ايتتى. سوندىقتان، اعىلشىن ءتىلىن وقىتۋدى 2-3-سىنىپتان نەمەسە 5-سىنىپتان باستاۋ ورىندى ءارى ءتيىمدى بولادى دەپ سانايمىن"، - دەدى توقايەۆ.