دانالىعى مەن دارالىعىنا دالەل بولار سيپاتتى وتكەن كۇندەردىڭ سۇلباسىنان ءجيى قالقىپ الاتىن حالىقپىز. ويتكەنى قازاق وتكەن زاماندا ءور ەدى. ويتكەنى قازاق ىلگەرىدە ايباتتى كورىنەتىن. ەلدى بىرلىككە باستاپ، جۇرتتى جۇمىلدىرۋعا ۇندەيتىن اقىن-جىراۋلاردىڭ اۋزىنان شىققان ءار ءسوز قازاقتىڭ قۇلاعىنا قۇيىلعانى بىلاي تۇرسىن، قانىنا ءسىڭىپ كەتەتىن. ەلى مەن جەرىنىڭ بۇتىندىگى ءۇشىن باسىن بايگەگە تىككەن باتىرلاردىڭ ەرلىگى ءان مەن كۇي ارقىلى زاماننان زامانعا كوشىپ وتىردى. قازاق ءومىردىڭ قۇپياسىن ونەر ارقىلى ۇعىندى. بابالار اماناتىن جانىنا ءتۇيىپ ءوستى…
جارايدى، ارىعا بارماي-اق قويايىن. ءوزىڭىز بىلەسىز، ماعجان اقىننىڭ «جاستارعا» دەيتىن عالامات ولەڭى بار. ونىڭ عالاماتتىعى سول، «مەن جاستارعا سەنەمىن» دەگەن تەگەۋرىندى تىركەس ۇران، دابىل سيپاتىندا ءار شۋماق سايىن قايتالانىپ كەلىپ وتىرادى. بۇل ءسوز رۋحتى وياتپاي قويمايدى. جانعا ساۋلە تۇسىرەدى، جۇرەككە جىگەر بەرەدى. سەبەبى اقىن ارتقان سەنىمنىڭ وزەگىندە جاۋاپكەرشىلىك جۇگى دە بار. سوندىقتان دا شىعار، سماعۇل سادۋاقاسوۆتىڭ «ماعجان – قازاق جاستارى وي-ساناسىنىڭ ءامىرشىسى» دەيتىنى.
ءبىز سول داۋىلپاز اقىننىڭ دابىلدى جىرىن جاستاردىڭ بويىنا سىڭىرە الدىق پا؟ جاستاردى وتانشىلدىققا، ەل مەن جەردى سۇيۋگە ۇندەيتىن، وزدەرىن بولاشاق قازاق ەلىنىڭ يەسى رەتىندە سەزىنۋىنە ۇمتىلدىراتىن بۇدان اسقان قانداي ولەڭ كەرەك؟ وسى وي مەنى كوپكە دەيىن مازالادى. ءوزىم ارعى بەتتە تۋىپ، شەكارانىڭ سىرتىندا ءوسىپ، اتامەكەندى اڭساپ جەتكەن قازاقپىن. ەتجاقىندارىم ءالى دە قىتايدا. ەلىمنەن نە الام ەمەس، نە بەرەم دەپ كەلگەن ۇلدىڭ ءبىرى ەدىم. بەرەرىم – بويىمداعى ونەرىم عانا. بۇعان دەيىن جيىرمادان اسا ءانىم جارىققا شىققان ەكەن. ۇزاق تولعانىستان كەيىن ماعجان جۇمابايەۆتىڭ سوزىنە جازىلعان «مەن جاستارعا سەنەمىن» ءانىم ومىرگە كەلدى. تىڭدارماندار (الەۋمەتتىك جەلى ارقىلى) جىلى قابىلداعان ءتارىزدى. ءبىرقاتار زيالىلار باتاسىن بەرىپ، العىسىن ايتتى. «مىناۋىڭ ناعىز «ماعجاننىڭ مارشى» ەكەن دەستى. «الاشتىڭ ارمانىن ورىنداعان ەكەنسىڭ»، «ماعجاندى تىرىلتكەن ەكەنسىڭ» دەستى. ءبىراق...
ءبىراق «مەن جاستارعا سەنەمىندى» ەشبىر تەلەارنا، ەشبىر راديو («قازاقستان» ارناسى مەن «شالقار» راديوسى تۇساۋىن كەسكەنىن قوسپاعاندا) قاجەت ەتپەدى. اسىرەسە «جاستار جىلىنىڭ» تۇسىندا جاستاردىڭ رۋحىن كوتەرەر دۇنيەنىڭ كەرەكسىز بولعانىنا تاڭدانباۋ مۇمكىن بە؟ قازاقستانعا كەلىپ، كوپ نارسەگە تاڭدانعان، كوپ نارسەگە شامدانعان قازاقپىن. تاڭدانىس تۋدىرعان جايتتىڭ ءبىرى – يدەولوگيانىڭ باستى قۇرالى سانالاتىن تەلەارنالارعا جەڭىل-جەلپى، جارقەتپە اندەردىڭ ءوتىمدى كەلەتىنى. كىم بىلەدى، توي-دۋماننىڭ كورىگىن قىزدىراتىن جەڭىل دۇنيەلەر دە كەرەك شىعار... ءبىراق ءومىر تەك تويدان تۇرمايدى عوي... توي ۇرپاقتى تاربيەلەي الا ما؟
قۇرمەتتى اقتوتى راحمەتوللا قىزى! ەگەر مادەنيەت سالاسىنىڭ تىزگىنى ءسىزدىڭ قولىڭىزدا بولماسا، مەن بۇل حاتىمدى جازباۋىم دا مۇمكىن ەدى. سەبەبى ءسىز ونەردىڭ ءتول پەرزەنتىسىز. قۇرمانعازى اتىنداعى الماتى مەملەكەتتىك كونسەرۆاتورياسىن ءتامامداپ، ەڭبەك جولىڭىزدى دا وسى قاسيەتتى شاڭىراقتان باستادىڭىز. قازاقى ناقىشتىڭ ەرەكشەلىگىن قالتقىسىز ۇعىناسىز، دالا سازىنىڭ سيقىرىن سالماقتاي بىلەسىز. ءوتىنىشىم، «مەن جاستارعا سەنەمىندى» ءبىر تىڭداپ كورىڭىز! ۇناماسا، مەنىڭ وسال بولعانىم. وندا شاماما قاراماي، ماعجاننىڭ جىرىنا جارماسقانىم ءۇشىن كوپ الدىندا كەشىرىم سۇراۋعا دا دايىنمىن. ال ەگەر... ەگەر تالعامىڭىزدىڭ ۇدەسىنەن شىقسا، ماعجاننىڭ جىرىن جاڭعىرتىپ، بۇگىنگى قوعامعا «وتكىزە الماي» جۇرگەن وتىزداعى ورالمان قازاقتىڭ مۇڭىن تۇيسىنەتىن شىعارسىز.
ماعجان اقىن «مەن جاستارعا سەنەمىن» دەپ كەتتى. قالتقىسىز سەندى. جاستار ءقازىر سول سەنىم بيىگىندە مە؟ ءسىز جاستارعا سەنەسىز بە؟ مەندەگى ماقسات – اتىمدى شىعارۋ ەمەس. مەندەگى ماقسات – جالعىز، ماعجان ارتقان سەنىمدى بۇگىنگىدەي الاقۇيىن زاماندا جاستاردىڭ ميىنا شەگەلەگىم كەلدى. بار بولعانى وسى!
وزىڭىزگە دەگەن زور قۇرمەتپەن :
پىكىر قالدىرۋ