اۋليەاتا ءوڭىرى تۋريستىك الەۋەتى زور ايماق. وبلىسىمىزدىڭ تاريحي-مادەني ورىندارىمەن قاتار، تارتىمدى تابيعاتىمىزدى الەمگە تانىتا بىلسەك، بۇل ءبىز ءۇشىن ايتارلىقتاي تابىس اكەلەتىنى ءسوزسىز. وسى تۇرعىدا جامبىل وبلىسى اكىمدىگىنىڭ تۋريزم باسقارماسى تاراپىنان قولعا الىنعان شارۋالار از ەمەس. سونىڭ ءبىرى – ەكولوگيالىق ءتۋريزمدى دامىتۋ دەپ جازادى Qamshy.kz اقپارات اگەنتتىگى. 

ەكوتۋريزمدى دامىتۋ ارقىلى ەكونوميكالىق احۋالدى ارتتىرۋعا باعىتتالعان جۇمىس جوسپارى نەگىزىندە اتالعان باسقارمانىڭ باستاماسىمەن جاقىندا جۋالى اۋدانىندا ەكوتۋريستەردى قابىلداۋ ماقساتىندا قوناقجايلار اشۋ جونىندە وقىتۋ ترەنينگى وتكىزىلدى. «قازاقستاننىڭ تۋريستىك قاۋىمداستىعىمەن» بىرلەسە وتكىزىلگەن ءىس-شارا ماقساتى – حالىقارالىق نارىقتا قازاقستاننىڭ تۋريستىك كلاستەرىن، سونىمەن قاتار، «Community Based Tourism (CBT)»، ەكو جانە اگروتۋريزمدى دامىتۋ.

جۋالى اۋداندىقىنداعى مادەنيەت ۇيىندە وتكەن جيىندا شاعىن جانە ورتا بيزنەسپەن اينالىساتىن كاسىپكەرلەرگە ەكوتۋريستەردى قابىلداۋ مەن قوناقجايلار اشۋدىڭ ماڭىزدىلىعى جانە ءقوناق-ۇي قىزمەتىنىڭ تابىس قۇپياسى ءتۇسىندىرىلدى. گەرمانياداعى اۋىلدىق تۋريزم بويىنشا وقىتۋ تۋرىنىڭ قاتىسۋشىسى، «Travelife» ەۋروپالىق تۇراقتى دامۋ تۋريزم جەلىسىنىڭ مۇشەسى كسەنيا شيەۆسوۆا جانە قازاقستان تۋريستىك قاۋىمداستىعىنىڭ ەكوتۋريزم اقپاراتتىق رەسۋرستىق ورتالىعىنىڭ ۇيلەستىرۋشىسى، ورتالىق ازيا وڭىرلەرىندە اۋىل ءتۋريزمىن دامىتۋ جونىندەگى ەو جوباسىنىڭ مەنەدجەرى، اۋىل ءتۋريزمىنىڭ ءادىسناماسى بويىنشا جاتتىقتىرۋشى الينا داۋلەتباكوۆا قاتىسۋشىلارعا ءدارىس وقىدى.«Prestarted»، «Basic»، «Advanced» دەڭگەيلەرى بويىنشا جۇرگىزىلگەن وقىتۋ ترەنينگىنە جۋالى اۋدانىنان 20 كاسىپكەر قاتىستى.

سەميناردا، تۋريستكە جوعارى دارەجەدە قىزمەت كورسەتۋدىڭ وزىق ۇلگىلەرى، استاندىرۋ جانە اس ءمازىرىن ازىرلەۋ سىندى باستى ماسەلەلەر قامتىلدى. قوناق ءۇي بيزنەسىنىڭ تابىسى مەن تيىمدىلىگى باسا كورسەتىلدى.

مۇنان سوڭ تۋريزم باسقارماسىنىڭ باسشىسى قارلىعاش ارالبەكوۆا قاتىسۋشىلاردى وبلىستاعى تەڭدەسسىز جوبا: «قارالما تاۋ-شاڭعى بازاسىنىڭ» قۇرىلىمىمەن تانىستىردى. جىلىنا 40 مىڭنان اسا تۋريستەردى قابىلداۋعا قاۋقارلى جوبانىڭ تۋريستىك سالادا بولاشاعى زور. سوندىقتان دا وسىنداي تۋريستىك كەشەندەردىڭ تۋريستەر اعىمىنا قىزمەت كورسەتەتىن ورىن رەتىندە ماڭىزدىلىعى جوعارى. باسقارما باسشىسى وسى تۇستا كاسىپكەرلەردى بىرىگە جۇمىس ىستەۋگە شاقىردى.

قازىرگى تاڭدا جۋالى اۋدانىندا قاۋىمداستىقتارعا نەگىزدەلگەن اۋىلدىق ءتۋريزمدى دامىتۋ بويىنشا بارلىق العىشارتتار جاسالعان. ويتكەنى، اۋداننىڭ ەكولوگيالىق جاعدايى مەن تابيعاتى بۇل باعىتتا جۇمىس جۇمىس جۇرگىزۋگە وتە قولايلى.