– سلەديۋششيي...
– مەنشى؟
– كەلە-سسى-ى...
ارتىنداعى دا ازەر تۇرعان ەكەن، كيمەلەپ كەلىپ ءبۇنىڭ ىيىعىنان اسىرا ءبىر قالتا قاعازدى ۇستاتا قويدى. اناۋ قالتانى اشىپ، ءبىرىنشى پاراقتى قارار-قاراماستان:
– ماشينكامەن باستىرىپ اكەلىڭىز،–دەپ شولاق قايىردى دا، قالتانى جابار-جاپپاستان قايتا ۇسىندى.
– وتكەندە وسىندا وتىرعان قىز قولمەن جازىپ اكەلە بەرسەڭ بولادى،-دەگەن ەدى-عوي...
– وندا سول قىزعا وتكىزىڭىز.
بۇل ەندى شىن ساسايىن دەدى.
– مە-ەن نە ىستەيمىن؟-- داۋىسى سۇراۋدان كورى جالىنىشقا بەيىم اۋەزدە جارقىشاقتانا شىقتى.
– مەن سىزگە قازاقشا ايتىپ تۇرمىنعوي. نە قىتايىڭىزعا بارىپ دۇرىستاتىپ اكەلىڭىز، نە وسى فاميليامەن جۇرە بەرىڭىز، نەسى بار، قازاقتا قانداي فاميليا جوق.
وسىنى ايتقاندا انانىڭ اۋەنىنەن سىزدى كەكەسىن، دۇرىسى كەكەسىننەن كورى كەلەمەجگە جاقىن بىردەڭە سەزىلىپ تۇرعانداي بولدى.
–- ءتۇسىندىردى-عوي ەندى، ورىن بوساتساڭىزشى!
–- قاعازىڭىزدى دۇرىستاپ ءبىراق اكەلمەدىڭىز بە؟
–- اسىعىپ تۇرمىز ءبارىمىز، جول بەرىڭىزشى بىزگە دە.
قاي ءبىر اڭساعاندارىنان كەلىپ تۇر دەيسىز ءبارى دە، بۇنىڭ ارتىندا تۇرعاندار بىردەن شۋلاپ قويا بەردى.
كورگەن ازدى-كوپتى تاربيەسى بار، ونىڭ ۇستىنە انانداي جاۋاپتان كەيىن اۋىز اۋىرتۋدىڭ ارتىق ەكەنىن وسىندا كەلگەلى بەرگى جىلدارداعى تاجىريبەسىنەن باعامدايتىن بۇل قالىڭ ءنوپىر كەزەكتەن سىتىلىپ شىقتى. شىعۋىن شىقتى-اۋ، ەندىگى بەتالىسى بەيمالىم بايعۇس دالىزدە ارلى-بەرلى ءجۇردى دە قويدى. نە ىستەسە ەكەن؟ تاۋەكەل وسى فاميليامەن جۇرە بەرە مە، ءاي، بولماس! قايدا بارسا الدىنان شىعادى-عوي “بوربايلاپ”. جوق، “قىتايعا بارىپ وزگەرتتىرۋگە تالپىنسا ما ەكەن؟” بەتىن ارى قىلسىن، ناعىز قيامەت سول-عوي! امبە قازاقستان ازاماتتىعىن الاردان بۇرىن كورمەگەنىم وسى بولسىن دەگەندەي بارلىق قۇجاتتارىن قىتايدىڭ ءتيىستى ورىندارىنا اتى-كوتىمەن وتكىزىپ تىنعان. ەندى بارىپ ونى اشتىرىپ كور! ىزدەنگەن كۇندە ول جوق-قوي، “كەشە عانا قولىمىزدا تۋىلىپ ءوسىپ، ءدام تارتىپ اتاقونىسىنا كەتكەن ءبىر تۋمامىز ەدى، قاعازدارىن كوزىندەي كورىپ ساقتاپ قويايىق” دەپ قانتتاي قىلىپ قاتتاپ قويدى دەيسىز بە.
دەمەك، ماسەلەنى وسىندا شەشۋ ءلازىم.
بۇل باستىققا كىرەتىن بولىپ شەشتى.
باستىقتىڭ كابينەتىنىڭ ەسىگىنە “N اۋدانى ءىىب كوشى-قون پوليسياسى ءبولىمىنىڭ باستىعى بوتبايەۆ مەلس سوۆەتحان ۇلى” تاڭبالانىپتى. اللا الدىنان جارىلقاعىر اتاسىنىڭ ارداقتى ەسىمىنىڭ ءوزىن ەلگە مازاق ەتەر بەلگى ىسپەتتەس بولعالى بەرى بۇنىڭ ەسىم-سويعا بولعان سەزىمتالدىعى الابوتەن اسقىنىپ الىپ ەدى. “اكەسى سابەتىڭنىڭ قايناپ تۇرعان شاعىندا دۇنيەگە كەلگەن قۋ بولدى” دەپ توپشىلادى، “فاميلياسى قازاقتىڭ دارداي رۋىنىڭ اتىندا ەكەن، ەگەر قىتايدا تۋىلىپ كەلگەندە مۇنىڭ فاميلياسى...” وسى جەرگە كەلگەندە بۇنىڭ قيالىن شاتتىق پا، شابىت پا، جوق، اجۋالاۋما، ايتەۋىر ەلىكتىرگىش ءبىر تۇيسىك بيلەدى دە الدى. “ەگەر قىتايدا تۋىلىپ كەلگەندە مۇنىڭ فاميلياسى بۇتبايەۆ، ءيا، بۇتباي بولۋى كادىك ەدى-عوي ” ، “بۇتباي” دەپ قايتالادى بۇل ماسايراي، مۇنىسىن تاعى ماڭايىنا جار سالا جاريانداعىسى كەلدى.
مۇنىڭ جايى مىنادا ەدى. جۇڭگو ءتىلى فونەتيكاسىنىڭ زاڭدىلىعى بويىنشا
داۋىسسىز دىبىس داۋىستى دىبىسسىز دارا دىبىستالمايدى. بوتبايىڭىز جۇڭگو تىلىنە جوتكەرمەلەنگەندە نە “Bو tە bءاى” نە “Bu tە bءاى” بولۋى كەرەك. زاۋدەعالام “Bu tە bءاى” بولىپ جوتكەرمەلەنگەندە ونى بۇتباي دەپ قانا قازاقشالايسىڭ-عوي.
بۇنىڭ دا اللا الدىنان جارىلقاعىر اتاسىنىڭ ەسىمى ءبورىباي بولاتىن. ونى ءتىلىڭ قايىرىمعا كەلمەي قالعىر قىتايلار كەزىندە “Bو ەr bءاى” دەپ جازعاندا، ەندى مۇندا قۇجاتتاندىراردا ءبىزدىڭ شالا دۇمشەلەر ونى بورباي دەپ قاسقيتقان. ۋاعىندا بۇل دا ايتقان، تۇسىندىرگەن، تاجىكەلەسكەن، الايدا تىڭدارعا قۇلاق بولماعان، نوتاريۋس جىگىت ساڭىلاۋسىز باسىنىڭ ەكەۋ ەمەستىگىن العا تارتىپ بۇنى قۋارمان بولعان.
“حالىقتىڭ كوشى-قونى تۋرالى” زاڭىنىڭ سوڭعى نۇسقاسىنداعى شەتەلدە تۋىلۋىنا بايلانىستى ءاتى-جونى دۇرىس جازىلماعان ورالمانداردىڭ ەسىم-سويىن قازاقي قالىپقا ساي وزگەرتىپ الۋلارىنا قۇقىلى ەكەندىگى مەڭزەلگەن بابىنا سايكەس تەگىن تۇزەتىپ جازعىسى كەلىپ جۇرگەندەگىسى-عوي بۇل پاقىردىڭ.
جاڭاعى ءبىر ارەدىك مىسقىلدى سەزىمگە ەلىتىپ تۇرعان ءساتىن كوپسىندى مە، جايشىلىقتا ساعاتتاپ كۇتكىزەتىن باستىقتىڭ ەسىگى اشىلىپ، ىشتەن شىققاندى شىعارىپ سالعان حاتشى قىز كەزەك سىزدىكى دەگەندەي يشارا جاسادى بۇعان. مۇندايدا از-كەم كۇتتىرەتىن داعدىسىمەن ەمەس، اپىل-قۇپىل كىرگەن بۇعان وڭ قول جاقتاعى ەسىكتى نۇسقادى. باستىقتىڭ مۇنداي جىلدام قولجەتىمدى بولعانىن كۇتپەگەن بۇل ءسال ابدىراپ قالعانىمەن، „اسسالاۋىن„ القىمىنا تولتىرا جيىپ ەسىكتىڭ تۇتقاسىنا جارماستى. باستىعىم تۋرا قارسىمدا ءتوردىڭ قاق باسىندا وتىرار دەپ توپشىلاۋى ءوزىن اقتاماي شىقتى. قايتا “اسسالاۋىن” اڭىراتا كىرمەگەنى دۇرىس بولعان ەكەن، ىشتە اۋىزعى بولمەدەن تىنىستىلاۋ جانە ءبىر بولمەنىڭ سول جاق قاناتىندا باستىق دەۋگە جاس مولشەرى دە، سالاۋاتى دا مۇلدە كەلىڭكىرەمەيتىن اققۇبا قىز وتىر.
بۇل قىزعا ساسقالاقتاي امانداستى، باسى دا ابايسىزدا قىزعا قاراي اجەپتاۋىر بۇرىش جاساي ءيىلىپ بارىپ قايتتى. مۇندايعا ابدەن كوندىككەن بالە مە، قىز بۇعان كوزىن اۋدارماعان بويدا كومپيۋتەرگە بەدىرەيگەن بەتى “كازىر” دەدى. سەزگەنى ونىڭ وڭ قولىنداعى ءتىنتۋىردىڭ باسپاعى مەن تاڭدايىنداعى ساعىز قوسىلا تىرس-تىرس ەتكەندەي بولدى. بۇعان ەشتەڭەنى باعامداپ ۇلگەرتپەستەن ورنىنان شيراق تۇرىپ ۇستەلىنىڭ سول قاناتىنان اينالىپ ءوتىپ، بۇنىڭ قارسىسىنداعى ەسىككە بەتتەدى. قىز بەتتەمەگەندە بۇل وندا ەسىك بارىن بايقاماعان دا بولار ما ەدى-اۋ. وڭ قولىمەن تۇتقانى قىمقىرا ۇستاعان قىز سول قولىمەن كويلەگىنىڭ جاعاسىن رەتتەگەندەي بولدى. ءسويتتى دە ەسىكتى اشتى، اشتى دا جاپتى. اراسى كوز قىسىپ ۇلگەرمەيتىندەي جىلدامدىقتان بۇل سەكەم الا باستادى، ىشتەگىڭ “زانيات” شىعار دەپ. الايدا، بۇل كۇتپەگەندەي، قىز “ءسىزدى” دەدى بۇعان تۇڭعىش رەت تىكە قاراپ، تاپ ءبىر توپ كىسىنىڭ اراسىنان وسىنى عانا قالاپ تۇرعانداي. “اسسالاۋىن” قايتا قاۋىمداپ بۇل ورنىنا كەربەز بەتالعان قىزدى سوعا جازداپ ەسىككە ۇمتىلدى.
بوتبايەۆ مىرزا— مۇنىڭ قالاۋىنداعى “بۇتباي” مىرزا-- بۇنىڭ مەجەلەگەنىنەن الىدە قايدا ارىراقتا وتىرعان بولىپ شىقتى. تاي شاپتىرىم كابينەت دەپ وسىنى ايت، بۇنىڭ باستىقتى كورەمىن دەپ شامالاعان تۇسى ونىڭ ۇستەلىنەن اتبويى بەرى تۇسكەن-دى. دەسەدە سالەمى تولىق جەتكەن بولۋى كەرەك، “اليككىسسالام” دەپ ورنىنان شالا كوتەرىلىپ قولىن ۇسىندى، مۇنىسى بۇنىڭ كۇتپەگەن قىيمىلى ەدى. استاناعا الدەنەندەي وتىنىشپەن بارعان ءبىر تانىسىنىڭ الدەبىر دەپارتامەنت باستىعىنا كىرگەندەگىسىن ايتىپ كۇلدىرگەنى ەسىندە. “كابينەتتىڭ سوناۋ باسىندا جاس شاماسى بالاڭداي بىرەۋ وتىرادى ەكەن، جاس بولعاسىن سالەم بەرەر دەپ ۇمىتتەنگەنىڭە ەش ىڭعاي بايقالماعان سوڭ ءوزىڭ سالەم بەرەدى ەكەنسىڭ، ءبىراق جۇزىندە الدەقانداي يشارانىڭ ءىزى جوق ونىڭ ەرنى عانا بولماشى جىبىرلاعانداي بولادى. ەنتەلەي سوزا ۇسىنعان قولىڭ دا اۋەدە قالقىپ قالادى، سوسىن شاراسىز ۇستەلدە جاتقان انانىڭ مامىق قولىن ءوزىڭ قوسقولداپ جايىمەن كوتەرىپ الىپ سىلكىپ-سىلكىپ ورنىنا قويادى ەكەنسىڭ” دەپ.
- قانداي بۇيىمتاي؟-دەدى سالعان جەردەن ورنىنا جايعاسىپ جاتىپ، بۇعان دا تولىق جايۋلى الاقانىنىڭ ۇشىمەن ءوز ۇستەلىنە تىگىنەن قادالا قويىلعان ۇزىنشا ۇستەلدىڭ الدىنداعى ورىندىقتى نۇسقاپ. ءوتىنىشىن اسا ىلتيپاتپەن ونىڭ الدىنا قويعان سوڭ بارىپ مەڭزەلگەن ورىنعا قونجيدى بۇل.
وتىنىشكە بايىپپەن كوز جۇگىرتكەن “بۇتباي” وڭ قىرىندا تۇرعان ماگنيتافون قۇلاعىن سولعا قاراي بۇراپ ويناپ تۇرعان جەڭىل مۋزىكا ءۇنىن ەستىلەر-ەستىلمەس
شاماعا اپاردى.
– تۇسىنىكتى،–دەدى سوسىن باسىن قاعازدان كوتەرىپ بۇعان قىدىرا قاراپ–ءوتىنىشىڭىز ورىندى، بىلەتىن دە شىعارسىزدار، قازاقستان دۇنيە جۇزىندەگى باۋىرلاستارىن ءوز ەلىنە جيناپ جاتقان ءۇش مەملەكەتتىڭ ءبىرى. ەلباسى، قازاقستاننىڭ تۇڭعىش پرەزيدەنتى،ۇلت كوشباسشىسى، الەمدەگى كۇللى قازاقتىڭ بىردەن-بىر جاناشىرى، دۇنيەجۇزى قازاقتارى قاۋىمداستىعىنىڭ ءتوراعاسى ابىشيەۆيچ ءنۇرسۇلتان نازاربايەۆ انا عاسىردىڭ 90-جىلدارىنىڭ باسىنان-اق الەمگە تارىداي شاشىلعان قانداستاردى وتانعا—قاسيەتتى قازاق جەرىنە شاقىرعان بولاتىن. سويۋز ىدىراپ، ەكونوميكا قۇلاپ، بالاپان باسىنا تۇرىمتاي تۇسىنا دەگەندەي سول قىيىن دا الماعايىپ جىلداردىڭ وزىندە پرەزيدەنتىمىز قازاقتاردى اسقان باۋىرمالدىقپەن ەلگە اكەلە باستادى. ولارعا كۆوتا تاعايىنداپ، باسپانا بولگىزدى، “نۇرلى كوش” باعدارلاماسىن جاساقتاپ قانداستارىمىزدىڭ بىتىراماي شوعىرلى قونىستانۋىنا جاعداي جاسادى، ەلگە كەلىپ وقىعىسى كەلەتىن جاستارعا وقۋ وشاقتارىنان كۆوتا بولگىزدى. پرەزيدەنتتىڭ وسىنداي ساليقالى ساياساتىنىڭ ناتيجەسىندە بۇگىندە وتانعا ورالعان تۋىسقانداردىڭ سانى ميلليونعا جۋىقتادى.
وسى ايتىلعانداردىڭ تىكەلەي كۋاگەرى ەسەبىندە ءبارىن قۇپ كورىپ وتىرعان بۇنى ءىشىن انانىڭ “تۋىسقاندار” دەگەن لەپەسى بىردەن جىلىتىپ سالا بەردى.
–دەسە دە بۇل ءالى دە از،–دەپ ساباقتادى ءسوزىن “بۇتباي”–ءبىز جەر كولەمىمىز جاعىنان دۇنيەدەگى 9 -شى ەلمىز، جەرىمىزدىڭ ءاستى-ۇستى تولعان بايلىق، بىزدە مەندەليەۆ كەستەسىندەگى ەلەمەنتتەردىڭ ءبارى تابىلادى، التىن، مىس، مىرىش، قورعاسىن دەگەندەردىڭ قورى دۇنيەدەگى الدىڭعى وندىقتا،. مۇنايدان 12ء-شى ورىندامىز، استىقتان 6-شىمىز،. ادامزاتتى ايعا ۇشىرىپ جاتقان ۋراننان كوش باستاپ تۇرمىز، سوۆەت زامانىندا قويىمىز 20ميلليوننان اساتىن.....
“بۇتبايدىڭ” دايەكتەرى بۇنىڭ بويىن ءبىر الماعايىپ ماقتانىشتى سەزىمگە بولەدى، ارا-تۇرا جولى تۇسكەندە تۋرا وسى تاقىلەتتەس مىسالدارمەن ماقتانىپ قىتايلارمەن تاجىكەلەسىپ الاتىنى بار-دى بۇنىڭ دا، ءتاتتى تۇيسىكتىڭ كايفىمەن باستىقتىڭ ءسوزىن ارى قاراي ەستىمەي دە قالدى.
–قۇدايعا شۇكىر دەپ ايتايىن،-دەگەن كوتەرىڭكى داۋىستان سەلك ەتۋگە تاياۋ قالىپتا وزىنە كەلدى - ەلباسى، تۇڭعىش پرەزيدەنتىمىز، ۇلت كوشباسشىسى، عاسىر عۇلاماسى، بىزگە نۇرلى باعدار سىلتەر نەشەلەگەن مونوگرافيالاردىڭ ءتول افتورى، ەكونوميكا عىلىمدارىنىڭ دوكتورى ابىشيەۆيچ نۇرسۇلتان نازاربايەۆتىڭ قامقورلىعى جانە تىكەلەي باستاماسىمەن ەكونوميكامىز كۇن ساناپ قۋاتتانىپ، جىلىنا قانشامالاعان يندۋستريالى-يننوۆاسيالىق جوبالار ىسكە قوسىلىپ، زاۋىت-فابريكالار وندىرىسكە كىرىسىپ جاتىر. ەلىمىز بۇگىندە دۇنيەدەگى دامىعان 50 ەلدىڭ بىرەۋى، ەندى وتىزدىقتى مەجەلەپ وتىرمىز، التىن-ۆاليۋتا قورىمىز 100 ميللياردقا جەتتى، سامۇرىق قازىنا قورىنداعى جيناعانىمىز ءوز الدىنا، كىسى باسىنا شاققانداعى ىشكى ءونىمىمىز12000$-دان استى. وسىنىڭ بارلىعى پاتشامىز ايتقانداي قازاقتىڭ ارعى-بەرگى تاريحىندا بۇرىن-سوڭدى بولماعان تابىستارعوي. ءقازىر قازاقستاندى تورتكۇل دۇنيە تانيدى، بۇۇ بەلدى مۇشەسىمىز. الاقانداي جەرگە ءزارۋ وتانسىز قانشا حالىق بار، ارىعا بارماي-اق مىنا ءوزىڭ كەلگەن قىتايداعى ۇيعىرلاردىڭ تاعدىرىنا قاراپ تاۋبە ۇيىرۋگە ءتيىس ەمەسپىزبە!
بۇل شىنداپ ۇيىيىن دەدى.
– جاڭا دا ايتىپ وتىرمىز، الەمگە ايگىلى ساياساتكەر، ءبىزدىڭ ەلباسى، قازاقستاننىڭ تۇڭعىش پرەزيدەنتى، ۇلت كوشباسشىسى، ەۋروازيالىق وداق، G-گلوبال، الەمدىك ءداستۇرلى دىندەر ديالوگى سىندى ءىرى ء-ىرى الەمدىك باستامالاردىڭ اۆتورى، اتاتۇرىك، لي كۋان يوۋ، دەن سياوپيندارمەن قاتار اتالاتىن تانىمال رەفورماتور ابىشيەۆيچ نۇرسۇلتان نازاربايەۆ نەشەمە حالىقارالىق سونداي-اق ايماقتىق ءىس-شارالارعا باستاماشى بولدى. 2017 ەكسپو-نى وتكىزۋدى ۇتىپ الۋىمىزدىڭ ءوزى ۇلكەن سەنىم. ول كىسىنىڭ تىكەلەي قاتىسۋىمەن ورنىعىپ جاتقان ەۋروازيالىق ەكونوميكالىق وداقتىڭ ءوزى نەگە تۇرادى؟ وسىنىڭ ءوزىن تۇسىنبەي “ويباي ءبىز رەسەيدىڭ قولتىعىنا قايتا كىرىپ بارامىز، ارەڭ تاپقان تاۋەلسىزدىگىمىزدەن ايىرىلاتىن بولدىق”دەپ بايبالام سالاتىندار بار، ۇلكەن كىسى ءوزىنىڭ ۇلىتاۋداعى سۇحپاتىندا “وڭاتىمىزعا كەلمەسە ودان كەزكەلگەن ۋاقىتتا شىعىپ كەتەمىز”دەمەدىمە، بۇدان ارتىق نە كەرەك؟ ول كىسى ءوزى باس بولىپ وتكەن عاسىردىڭ وزىندە قازاقستان حالىقتارىنىڭ اسسامبلەياسىن قۇرعان-عوي. ونداعى ماقساتى ءبىزدىڭ قاسيەتتى قازاق توپىراعىندا جاساپ جاتقان 130 ۇلت پەن ۇلىستى ءبىر اتانىڭ بالاسىنداي بەرەكەگە ۇيىتۋ ەدى، بۇگىن بۇل نيەت ورىندالىپ، بارلىعى سەن-مەن دەسپەي ءومىر ءسۇرىپ جاتىر. وسىدان اڭگىمە تاۋىپ، قازاقتىڭ مۇددەسى تاپتالىپ جاتىر دەيتىن پىكىر قالىپتاستىرعىسى كەلەتىندەر بار وزىمىزدە. نەگە كەرەك وسىنداي اڭگىمەنىڭ؟ قۇداي بەتىن ارى قىلسىن، اناۋ ۋكراينا نە بولدى، جاپ-جاقسى ەل ءبىر-اق جىلدا بىت-شىت بولدى، ەكى كوزىنىڭ بىرىندەي قىرىمنان ايىرىلدى، قانشا حالىق بوسىپ كەتتى، ءالى دە نە بولارى بەيمالىم، وسىندايدا اۋەلى ۇلى كورشىمىز رەسەيدىڭ كوزى ءتۇزۋ بولسىن دەيسىڭ.
وسىنى ەستىگەندە بۇنىڭ دا بويى تىتىركەنىپ، ىشىنەن تاۋبەسىن ءۇيىردى.
–الىسقا بارماي-اق قويايىق، مىنە ءوزىڭىز وتان دەپ ، ەلىم دەپ ەكى وكپەڭىزدى قولىڭىزعا ۇستاپ جەتتىڭىز، ءيا. ەندى تەگىمدى قازاقشا جازدىرايىن، ەلگە كۇلكى بولماي ءبورىباي بولىپ كەۋدەمدى كەرىپ جۇرەيىن دەگەن تىلەكپەن كەلىپ وتىرسىز.
وسىنىڭ ءوزى ءبىزدىڭ، قازاق ەلىنىڭ دەموگرافيالىق جاعدايىنىڭ وڭالۋىنا قوسىلىپ وتىرعان ۇلكە-ەن ۇلەس دەپ باعالايمىن ءوز باسىم. سول سياقتى ەلباسى، قازاقستاننىڭ تۇڭعىش پرەزيدەنتى، ۇلت كوشباسشىسى، جاستاردىڭ رۋحاني ۇستازى، وسكەلەڭ ۇرپاقتىڭ تولاعاي ۇلگىسى، يدەالى، كەرەك بولسا ءپىرى دەپ ايتار ەدىم ابىشيەۆيچ نۇرسۇلتان نازاربايەۆتىڭ وراسان قامقورلىعى جانە تىكەلەي تاپسىرماسىمەن جاس كەلىندەرىمىزدىڭ بالا تۋۋ كورسەتكىشى كوتەرىلىپ، ورالماندارسىز ءبىزدىڭ ىشكى ءوسىمىمىزدىڭ وزىمەن-اق دەموگرافيالىق جاعدايىمىز ورگە باسىپ كەلەدى. مىنە شيرەك عاسىرعا جەتپەيتىن مەرزىمدە ءبىز
سويۋز ىدىراعان كەزدەگى سانىمىزدان اسىپ ۇلگەردىك. ءتاۋبا، بۇگىن 17 ميلليون حالىقپىز، جانە ونىڭ باسىم بولىگى ءوزىمىزدىڭ قارا كوزدەر. سوندىقتان، باۋىرىم شۇكىرشىلىك دەيىك، ەلگە كەلگەنىڭە قۋانامىز. ءوتىنىشىڭدى قاراپ شىقتىم، وتە قۇپتارلىق تالاپ، ءبىراق بۇل ءبىزدىڭ قۇزىرىمىزداعى شارۋا ەمەس. كىمنىڭ شەشەتىنىن سول ءتيىستى ورگاندارعا بارىپ جولىعارسىڭ، جولىڭ بولسىن، تاعى سۇراقتارىڭ بولسا كەلىپ تۇر، جاردەمدەسەمىز. سىزدەردى تىڭداۋ، قول ۇشىن بەرۋ، ماسەلەلەرىڭىزدى شەشۋ ءبىزدىڭ بورىشىمىز.–دەپ ورنىنان جايلاپ تۇرەگەلىپ بۇعان قولىن ۇسىندى.
بەرىلە ەلىتىپ وتىرعان بۇعان مىناۋ تىم توسىن سوقتى. دەسەدە، ورنىنان جىلدام تۇرىپ بۇل دا قولىن الا ۇشتى، الاقانى “بۇتبايدىڭ” الەۋەتتى الاقانىنا تيەر-تيمەستە “راحمەت، اعا، راحمەت! جاۋابىڭىز تىم تۇشىمدى بولدى، وتىنىشىمە ءمان بەرىپ قاراپ شىققانىڭىزعا جانە شەشىم بەرگەنىڭىزگە قايتالاي كوپ-كوپ راحمەت” دەپ جىلدام ارتقا بۇرىلدى. “وۋ، مىناۋىڭدى ۇمىتتىڭعوي” دەدى بوتبايەۆ، “وي، كەشىرىڭىز، تولقىعانىمنان...” ءسوزىنىڭ اياعىن ءۇزىپ جىبەردى. ءوتىنىشتى الا ءجىتى باسىپ سىرتقا ۇمتىلدى، اياعى جەڭىلدەپ كەتكەندەي سەزىلەمە قالاي؟
وسى بەتتەسىنە كەدەرگى بولماسا-اق يگى ەدى، پەندەنىڭ تىلەگەنىندەي بولسىن با، ماناعى قارا ءنوپىر كەزەك بۇنىڭ جەڭىلدەپ شىققان ادىمىن اشتىرماي زىعىردانىن قايناتقانى.
قۇرمەت قابىلعازى ۇلى
2015 جىل ماۋسىم
