XVIII عاسىر – قازاق حالقى ءۇشىن اۋمالى-توكپەلى كەزەڭدەردىڭ ءبىرى. تاريحي دەرەكتەرگە سۇيەنسەك، ءدال وسى ءجۇز جىلدىقتا قازاق حالقى ءوزىنىڭ تاريحىنداعى ەڭ اۋىر كەزەڭدەردىڭ ءبىرىن باستان كەشىردى. تاريح بەتتەرىندە "اقتانبان شۇبىرىندى، القاكول سۇلاما" دەپ اتالعان قازاق حالقىنىڭ جوڭعارلاردان جەڭىلىپ، بوسىپ كەتۋ ءدال وسى XVIII عاسىردىڭ العاشقى شيرەگىندە ورىن العان. وسى جاۋگەرشىلىك زاماندا قازاقتىڭ تالاي باتىرلارىنىڭ داڭقى شىعىپ، ەسىمدەرى بۇگىنگە دەيىن ەل اۋزىندا ءجۇر. سونداي باتىرلاردىڭ ءبىرى – وتەگەن وتەعۇل ۇلى.
1699 جىلى تۋعان وتەگەن باتىردىڭ بيىل 320 جىلدىعى. وسىعان وراي، جامبىل وبلىسى قورداي اۋدانىندا باتىردى ەسكە الۋ اسى كەڭ كولەمدە اتالىپ ءوتتى. ونى سول اۋدانداعى باتىردىڭ اتىمەن اتالعان اۋىلدىڭ تۇرعىندارى – وتەگەن باتىردىڭ ۇرپاقتارى ۇيىمداستىردى.
باتىردى ەسكە الۋعا ارنالعان اس-جيىن الدىمەن ەلدىڭ ءبىرقاتار وڭىرىنەن كەلگەن قوناقتاردىڭ اۋدان ورتالىعىندا ورنالاسقان باتىر ەسكەرتكىشىنىڭ الدىنا گۇل شوقتارىن قويىپ، رۋحىنا تاعزىم ەتۋدەن باستالدى.
سوندان كەيىن وتەگەن باتىر اتىنداعى اۋداندىق مادەنيەت ۇيىندە سالتاناتتى جيىن ءوتتى. جيىن بارىسىندا جينالعان كوپشىلىك وتەگەن باتىردىڭ ابىلاي حاننان ەستەلىككە العان شۇبار تەگەنەسىنەن ءدام اۋىز ءتيدى.
بۇگىندە بۇل تەگەنە باتىردىڭ سەگىزىنشى ۇرپاعى باقىتجان بەكباتىروۆتىڭ قولىندا ساقتاۋلى ەكەن. باتىر تاعىلىمىنا ارنالعان جيىندا بەلگىلى جازۋشى مارال ىسقاقباي ءسوز الىپ، وتەگەن باتىر ومىرىنە توقتالدى.
پىكىر قالدىرۋ