بيىلعى جىلدىڭ سەگىز ايىندا قازاقستاننان 31 مىڭ 287 ادام كوشىپ كەتسە، ەلگە 7 مىڭ 420 ادام قونىس اۋدارعان. بۇل تۋرالى قازاقستاننىڭ ۇلتتىق ەكونوميكا مينيسترلىگىنىڭ ستاتيستيكا كوميتەتى حابارلادى.

كوميتەتەتتىڭ دەرەگىنشە، 2019 جىلعى قاڭتار-تامىز ايلارىندا رەسپۋبليكادا كوشى-قوننىڭ تەرىس سالدوسى 23 مىڭ 867 ادامدى قۇرادى. وتكەن جىلدىڭ وسى مەرزىمىندە (قاڭتار-تامىز ايلارىندا) بۇل كورسەتكىش 27 مىڭ 737 ادام ەدى.

2019 جىلعى تامىزدا قازاقستان حالقى 18،6 مىڭ ادامعا كوبەيدى جانە 1 قىركۇيەكتەگى جاعداي بويىنشا، 18 ملن 547،5 مىڭ ادامدى قۇرادى. قازاقستان حالقىنىڭ تابيعي ءوسىمى قاڭتار-تامىز ايلارىندا 175 مىڭ 776 ادامعا تەڭ بولدى. (2018 جىلعى قاڭتار-تامىزدا - 173 مىڭ 709 ادام).

العاشقى سەگىز ايدا ەلدە 265 مىڭ 286 بالا تۋسا، (2018 جىلدىڭ 8 ايىندا 261 مىڭ 723) 89 مىڭ 510 ادام (2018 جىلدىڭ 8 ايىندا 88 مىڭ 14) قايتىس بولعان. سونىمەن قاتار، ستاتيستيكا كوميتەتى قاڭتار-تامىز ايلارىندا 89 510 نەكە قيىلىپ، 40 مىڭ 21 وتباسى رەسمي تۇردە اجىراسقانىن حابارلادى.