كاسىپوداق دەگەنىمىز نە؟ ءبىز ونىڭ قانداي قۇقىقتارى بارىن بىلەمىز بە؟ ول نەمەن اينالىسادى؟

ارينە، بۇگىنگى تاڭدا ءار ۇيىمدا كاسىپوداق بار. ونىڭ مۇشەلەرى نەگىزىنەن ۇجىمدا جۇمىس ىستەيتىندەر. ءبىراق كۇندەلىكتى كۇيبەڭ تىرلىكپەن ءجۇرىپ، ءبىز وعان ءمان بەرە بەرمەيتىنىمىز اقيقات. ءبىراق ەسكە ساقتايتىن ءبىر نارسە بار: كاسىپوداق سەنىڭ قۇقىڭدى قورعايدى جانە ساعان قامقورلىق جاساپ، قاجەتتى جاعدايلاردا ماتەريالدىق جانە باسقا دا كومەك كورسەتىپ وتىراتىنى  دا جاسىرىن ەمەس.

كاسىپوداق سالالىق بولىپ بولىنگەنىمەن، ولاردىڭ دا ءوز مەرەكەسى بار. ءار جىلدىڭ 10 قازان كۇنى كاسىپوداقتار وزدەرىنىڭ مەرەكەسى اتاپ وتەدى. كاسىپوداق پرەزيدەنت تاپسىرعان مىندەتتەمەلەردى ادال ورىنداپ جاتىر دەسەك، بۇل اقيقات. مەملەكەت ساياساتىن جۇرگىزىپ وتىرعان كاسىپوداقتىڭ جۇمىسى اتاپ ايتقاندا، بۇگىندە ەلباسىنىڭ تاپسىرمالارى، پرەزيدەنتتىڭ  جولداۋلارىمەن تولىققاندى ۇندەسىپ وتىر. ويتكەنى كاسىپوداقتىڭ باستى مىندەتى–ەڭبەك ادامىنىڭ قۇقىن قورعاۋ جانە ولاردى قولداۋ.  

ەڭ باستىسى، رەسپۋبليكالىق باستى ۇيىمنىڭ ءبىرى بولىپ وتىرعان ءبىز ءسوز ەتكەلى وتىرعان كاسىپوداقتار فەدەراسياسىنىڭ بۇگىندە جۇمىس بەرۋشىلەرمەن جۇمىسى جاندانىپ كەلەدى. اتالعان فەدەراسيانىڭ  جۇمىس بەرۋشىلەرمەن ورتاق كەلىسىمى بار. اتالعان قۇجات «2018-2020 جىلدارعا ارنالعان باس كەلىسىم» دەپ اتالادى. مۇنىڭ اياسىنا نە كىرەدى؟ اتاپ ايتار بولساق، 23 سالالىق، 16 جەرگىلىكتى كەلىسىمنىڭ اياسىندا ەڭبەك ادامىنىڭ قۇقىن بۇزباۋ ماسەلەسى تۇر، ەڭبەك ادامىنا  جاعداي جاساۋ ماسەلەسى كوتەرىلىپ، ەكى جاق مامىلەگە كەلىپ، قول قويعان.

الايدا ايتا كەتەتىن ءبىر نارسە بار، كوپتەگەن ەڭبەك ۇجىمدارىندا جۇمىسقا تۇرعان ادام كەلىسىمشارتقا وتىرماي جۇمىس ىستەي بەرەدى. سوندىقتان قانداي دا ءبىر سالاعا جۇمىسقا تۇرساڭىز، ەڭ الدىمەن جۇمىسشى نەمەسە قىزمەتكەر بولسىن، جۇمىس بەرۋشىمەن كەلىسىمشارتقا وتىرۋىڭىز كەرەك. ول ءبىر جىلعا بولا ما، جوق التى ايعا ما، ونىڭ بارلىعى دا كەلىسىمشارتتا اتاپ كورسەتىلگەنى دۇرىس . سوندا عانا جۇمىسقا تۇرۋشى ازامات ەش ۇتىلمايدى. سوتتا دا قۇقىن قورعاي الادى.

بۇگىنگى تاڭدا وسىعان بايلانىستى كاسىپوداقتار فەدەراسياسى ەڭبەك ادامىنىڭ قۇقىن قورعاۋ جانە ولاردىڭ قۇقىقتىق ساۋاتتىلىعىن اشۋ ءۇشىن نە ىستەلىنىپ جاتىر.؟ بۇل ساۋالمەن  كاسىپوداقتار فەلەراسياسىنا شىققان بولاتىنبىز. كاسىپوداقتار فەدەراسياسىنىڭ باسپا ءسوز وكىلى بىزگە مىنانداي اقپاراتتار بەردى. بىرىنشىدەن، اتالعان جاعدايدى جۇيەگە كەلتىرۋ ماقساتىندا كاسىپوداقتار فەلەراسياسى ەڭبەك جانە الەۋمەتتىك قورعاۋ مينيسترلىگىمەن 2018 جىلدىڭ كوكتەمىنەن بەرى رەسپۋبليكالىق ءىس-شارا وتكىزۋدى باستاعان كورىنەدى. اتالعان اكسيا «ەڭبەك شارتىن باستاڭىز!» دەپ اتالادى. ۇستىمىزدەگى جىلدىڭ العاشقى التى ايىندا رەسپۋبليكا كولەمىندە 110 مىڭ ۇجىمدىق شارت جاسالعان ەكەن. ۇجىمدىق شارتپەن جۇمىس ىستەۋ بۇگىنگى تاڭدا 98 پايىزدى قۇراپ وتىر ەكەن. بۇل ارينە جاقسى كورسەتكىش. ازىرگە بۇل كاسىپوداق ۇيىمدارى بار ءوندىرىس نەمەسە كاسىپورىنداعى  ەڭبەكشىلەرمەن جاسالعان ۇجىمدىق شارت كەلىسىمى.

كاسىپوداقتار فەدەراسياسى سونداي-اق جوعارى سوتپەن دە مەموراندۋمعا وتىرعان. مۇنىڭ دا سەبەبى بار. ويتكەنى كوپتەگەن ۇجىمداردا   ەڭبەك داۋلارى ارا-تۇرا كەزدەسىپ قالادى. مۇنداي جاعدايدا ماسەلەنى سوتقا دەيىن شەشۋ ماسەلەسى دە قاراستىرىلعان. ءقازىردىڭ وزىندە كاسىپوداقتار عيماراتىندا 17 تاتۋلاسۋ ورتالىقتارى جۇمىس ىستەيدى. ارينە، سوتتىڭ دا شارۋاسى شاش ەتەكتەن. ال ءىستى ناسىرعا شاپتىرماي، ماسەلەنىڭ الدىن الۋ ارقىلى شەشۋ بۇل جاعدايدى اسا كۇردەلەندىرمەيدى. سوندىقتان بۇل ورايدا جوعارى سوتپەن بىرلەسىپ قۇرىلعان مەدياسيالىق ورتالىقتاردىڭ جۇمىسى بۇگىنگى تاڭدا وڭدى بولىپ وتىر. مۇنداي ورتالىقتار ەكى تاراپتى تاتۋلاستىرادى، مامىلەگە كەلتىرەدى. ءسويتىپ جاعدايدىڭ الدىن الادى.

قازىرگىدەي قىم-قۋىت، تەحنولوگيانىڭ دامىپ، جۇمىستىڭ اۆتوماتتاندىرىلىپ وتىرعان ۋاقىتىندا جۇمىس ورنىن ساقتاۋ ۇلكەن مارتەبە. سوندىقتان دا كاسىپوداقتار فەدەراسياسى ءاربىر ازاماتتىڭ قۇقىن قورعاۋ ماقساتىندا ولاردىڭ جۇمىس ورنىن ساقتاۋ ءۇشىن 122 مىڭنان اسا جۇمىس بەرۋشىلەرمەن كەلىسىمگە كەلگەن. بۇل ۇلكەن ناتيجە جانە كاسىپوداقتاردىڭ بۇگىنگى تاڭدا تياناقتى جۇمىس ىستەپ جاتقانىن كورسەتەدى.

راسىن ايتۋ كەرەك، ەلىمىزدەگى كاسىپوداقتار فەدەراسياسى جالاقىسى تومەن جۇمىسشىلاردىڭ ەڭبەك اقىسىن كوتەرۋ تۇرعىسىندا پرەزيدەنتتىڭ بەرىلگەن تاپسىرماسىن قاتاڭ باقىلاۋعا الىپ كەلەدى. سوندىقتان الدىمەن وزىڭە، سوسىن كاسىپوداقتىڭ قولداۋىن سەزىن دەپ قاداپ ايتقىمىز كەلەدى. ويتكەنى قانداي دا ءبىر جاعداي بولماسىن، ەڭ الدىمەن سەنىڭ قۇقىڭدى قورعاپ، قولداۋىن كورسەتەتىن وسى ءبىز ايتىپ وتىرعان – كاسىپوداق ۇيىمى. بۇگىندە 2 ميلليوننان اسا مۇشەسى بار كاسىپوداق ۇيىمىنىڭ جۇمىسى شىندىعىندا بۇگىندە جاندانعان جانە مەملەكەت ساياساتىن حالىقپەن بىرگە ورتاق ماقسات ءۇشىن، بولاشاعىمىز ءۇشىن ادال اتقارىپ  كەلەدى.