حالىقارالىق TURKSOY ۇيىمى جانە قۇرمانعازى اتىنداعى قازاق ۇلتتىق كونسەرۆاتورياسىنىڭ ۇيىمداستىرۋىمەن ونەر-بىلىم ورداسىنىڭ قۇرىلعانىنا 75 جىل تولۋىنا ارنالعان مەرەيتويلىق شارالار اياسىندا كونسەرۆاتوريانىڭ ءماجىلىس زالىندا بەلگىلى ەتنوورگانولوگ-عالىم، ونەرتانۋشى بولات سارىبايەۆتىڭ «عالىم مۇراسى» اتتى كىتابى مەن «بولات سارىبايەۆ جانە تۇركى الەمىندەگى ەتنواسپاپتانۋ ماسەلەلەرى» اتتى جيناقتىڭ تۇساۋكەسەر ءراسىمى ءوتتى.
ەكى جيناق تا حالىقارالىق TURKSOY ۇيىمىنىڭ دەمەۋشىلىگىمەن الماتى قالاسىندا جارىق كورگەن. جيناقتاردى قۇراستىرۋشىلار – ونەرتانۋ عىلىمدارىنىڭ كانديداتى، پروفەسسور سايدا ەلەمانوۆا، ونەرتانۋ عىلىمدارىنىڭ ماگيسترى ساۋلە بورانبايەۆا، ونەرتانۋشى فاتيما نۇرلىبايەۆا.
وتاندىق مۋزىكاتانۋشى عالىمدار، زيالى قاۋىم وكىلدەرى، عالىمنىڭ جاقىن تۋىستارى، ستۋدەنتتەر مەن وقىتۋشىلار قاتىسقان جيىندى حالىقارالىق TURKSOY ۇيىمىنىڭ قازاقستانداعى وكىلى اسقار ابدۋالي ۇلى تۇرعانبايەۆ اشىپ، ءسوز كەزەگىن قۇرمانعازى اتىنداعى قۇك عىلىمي جۇمىس جانە حالىقارالىق ىنتىماقتاستىق جونىندەگى پرورەكتورى، ونەرتانۋ كانديداتى عاليا زايناقۇل قىزى بەگەمبەتوۆا الدى. ءوز كەزەگىندە ءسوز العان پروفەسسور سايدا ەلەمانوۆا، پروفەسسور بازارحان قوسباساروۆ، ءو.ع.د.، پروفەسسور ساۋلە وتەعالييەۆالار بولات سارىبايەۆتىڭ قازاق اسپاپتانۋ عىلىمىنا قوسقان ەرەكشە ۇلەسىن ءسوز ەتسە، عالىمنىڭ قارىنداسى دينا سارىباي ۇيىمداستىرۋشىلارعا العىس سەزىمىن جەتكىزدى. سازسىرنايشىلار، جەتىگەنشىلەر، قىلقوبىزشىلار انسامبلدەرى جانە سىبىزعى اسپابىندا ورىندالعان اسەرلى اۋەندەر وتىرىسقا ەرەكشە ءمان بەرىپ، ءسانىن كىرگىزدى. سونداي-اق تۇساۋكەسەر راسىمىنە بولات سارىبايەۆتىڭ كەلىنى گۇلنار باتىربەكوۆا، نەمەرەلەرى جانە جاقىن تۋىستارى دا قاتىسىپ وتىردى.
بولات شامعالي ۇلى سارىبايەۆ (1927-1984) – كورنەكتى ەتنواسپاپتانۋشى عالىم، قازاق ەتنواسپاپتانۋىنىڭ نەگىزىن قالاۋشى، قازاقتىڭ كونە مۋزىكالىق اسپاپتارىنىڭ تۇڭعىش رەت تولىق عىلىمي سيپاتتاماسىن جاساپ تەرەڭ زەرتتەگەن جانە ولاردى قايتا جاڭعىرتىپ، دىبىستالۋى مەن تارتىلۋ ادىستەرىن قالىپتاستىرعان تۇلعا. ول قۇرمانعازى اتىنداعى الماتى مەملەكەتتىك كونسەرۆاتورياسىن قوبىز كلاسى بويىنشا ءبىتىرىپ، حالىق اسپاپتار كافەدراسىندا بىرنەشە جىل قىزمەت اتقارعان.
«عالىم مۇراسى» اتتى العاشقى جيناققا عالىمنىڭ ماقالالارى مەن قۇجاتتارى، ەڭبەكتەرىنىڭ بيبليوگرافياسى، فوتوماتەريالدارى مەن عالىم تۋرالى ەستەلىكتەر جانە قازاق ەتنومۋزىكاتانۋشىلارىنىڭ بولات سارىبايەۆ تۋرالى زەرتتەۋ ماقالالارى توپتاستىرىلعان. ال، ەكىنشى جيناققا «قورقىت جانە ۇلى دالا سازى» حالىقارالىق فولكلورلىق-مۋزىكالىق ونەر فەستيۆالى اياسىندا وتكىزىلگەن «بولات سارىبايەۆ جانە تۇركى الەمىندەگى ەتنواسپاپتانۋ ماسەلەلەرى» جانە «قورقىت اتا مۇراسى: ەپيكالىق مادەنيەت، حالىق اڭىز اڭگىمەلەرى جانە اۋەندەرى» حالىقارالىق عىلىمي-تەوريالىق كونفەرەنسيالارىنىڭ ماتەريالدارى ەنگىزىلگەن.
«تۇركى الەمىنىڭ يۋنەسكو-سى» دەگەن اتپەن تانىلعان تۇركسوي (تۇركى مادەنيەتىنىڭ حالىقارالىق ۇيىمى) 25 جىلدان استام ۋاقىت بويى تۇركى الەمىنىڭ مادەني مۇراسىن حالىقارالىق دەڭگەيدە ناسيحاتتاۋ، ساقتاۋ جانە زەرتتەۋ جۇمىسىن بەلسەندى تۇردە اتقارىپ كەلەدى. حالىقارالىق ۇيىم جىل سايىن تۇركى الەمىنىڭ مادەنيەتى مەن ونەرىن دامىتۋ ماقساتىندا ءتۇرلى مادەني-شىعارماشىلىق شارالار (كونسەرتتەر، كورمەلەر، پلەنەرلەر، كەزدەسۋلەر، قويىلىمدار، عىلىمي-پراكتيكالىق كونفەرەنسيالار جانە ت.ب.) ۇيىمداستىرىپ وتىرادى.
پىكىر قالدىرۋ