سوڭعى بىرنەشە جىلدان بەرى ەگەر قاراماعىنداعى قىزمەتكەرلەر پارا الىپ نەمەسە جەمقورلىقپەن ۇستالسا، باسشىسى مىندەتتى تۇردە قىزمەتتەن كەتۋ كەرەكتىگى جونىندە پىكىرلەر ايتىلىپ ءجۇر. ءبىراق ول ماسەلە قۇجات تۇرىندە زاڭداستىرىلدى ما؟ بۇل ماسەلەگى قاتىستى اڭگىمەنى ورتالىق كوممۋنيكاسيالار قىزمەتىندە وتكەن بريفينگتە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ولجاس بەكتەنوۆ ءمالىم ەتتى.

بەكتەنوۆتىڭ مالىمەتىنشە، ءبىرىنشى باسشى ونىڭ تىكەلەي باعىنىشتى تۇلعاسىنا قاتىستى سوتتىڭ ايىپتاۋ ۇكىمى كۇشىنە ەنگەننەن سوڭ كۇنتىزبەلىك 10 كۇن ىشىندە نەمەسە اقتالمايتىن نەگىزدەر بويىنشا قىلمىستىق ءىس توقتاتىلعاننان كەيىن وتستاۆكاعا كەتۋگە مىندەتتى.

سونىمەن، باسشىنىڭ قاراماعىنداعى باعىنىشتىلار كىمدەر بولىپ سانالادى؟

— ورتالىق مەملەكەتتىك ورگاننىڭ باسشىسى (مينيستر) ءۇشىن – بۇل ونىڭ ورىنباسارلارى، جاۋاپتى حاتشى نەمەسە اپپارات باسشىسى، ايماقتىق بولىمشەلەردىڭ باسشىلارى؛

— وبلىس، رەسپۋبليكالىق ماڭىزى بار قالالار، استانا اكىمى ءۇشىن – ونىڭ ورىنباسارلارى، اپپارات باسشىسى، اۋداننىڭ (وبلىستىق ماڭىزى بار قالانىڭ) اكىمى؛

— ورتالىق مەملەكەتتىك ورگان باسشىسىنىڭ ورىنباسارى (ۆيسە-مينيستر) ونىڭ قاراماعىنداعى بولىمشە نەمەسە تاۋەلسىز قۇرىلىمدىق بولىمشە باسشىسى سىبايلاس جەمقورلىق قىلمىس جاساعان كەزدە قىزمەتىنەن كەتەدى؛

— وبلىس اكىمىنىڭ ورىنباسارى جەرگىلىكتى بيۋدجەتتەن قارجىلاندىرىلاتىن اتقارۋشى ورگانداردىڭ باسشىلارىنا جاۋاپ بەرەدى؛

— اۋدان اكىمى ءوزىنىڭ ورىنباسارلارىنا، اپپارات باسشىسىنا، جەتەكشىلىك ەتەتىن اۋداندىق اتقارۋشى ورگانداردىڭ باسشىلارىنا، اۋىل، كەنت، اۋىلدىق وكرۋگتەردىڭ اكىمدەرىنە جاۋاپ بەرەدى.

قىسقاسى، قۇرمەتتى باسشىلار، ءسىزدىڭ باعىنىشتى قىزمەتكەرلەرىڭىز نە ىستەپ ءجۇر؟ ويلانىڭىز، «ساقتانعاندى عانا قۇداي ساقتايدى»!

نەگىزى ادال جولمەن قىزمەت ەتىپ، توق جۇرگەنگە ەشتەڭە جەتپەيدى عوي.