ءبىلىم جانە عىلىم ءمينيسترى اسحات ايماعامبەتوۆ ورتالىق كوممۋنيكاسيالار قىزمەتىندەگى بريفينگتە تەحنيكالىق اقاۋلارعا بايلانىستى ونلاين ساباقتار وتىلمەيتىنىن ءمالىم ەتتى.

ونىڭ سوزىنشە، ينتەرنەتپەن ونلاين وقۋ ىڭعايلى بولعانىمەن، بۇل تەتىكتە كەدەرگىلەر بار. بۇل 1 ساۋىردە وتكەن سىناق ساباقتار بارىسىندا انىقتالعان.

– سىناق ساباعىنا تەك قانا ونلاين رەجيمدە 1 ملن 250 بالا شىعىپ، ءدارىس الىپ كوردى. جالپى وسى سىناق ساباققا ءارتۇرلى پلاتفورمادا ەلىمىز بويىنشا 2،5 ميلليون بالا قاتىستى. ناتيجەسىندە جاقسى دايىندىقتى كوردىك. ۇستازدارىمىز قىسقا ۋاقىت ىشىندە قاشىقتان وقىتۋ جۇيەسىنە باعىتتالىپ، شەبەرلىگىن شىڭداپ دايىندالعان ەكەن. بارلىق ۇستازدارعا العىس ايتقىم كەلەدى. سىناق ساباقتار كەزىندە باسقاشا ماسەلەلەردى كوردىك. ونلاين وسىنشاما قوسىلۋدى كوتەرمەيدى، سوعان بايلانىستى كوپ ىڭعايسىزدىقتار بولدى. وعان كوزىمىز جەتىپ وتىر. تەحنيكالىق اقاۋلار جەتكىلىكتى. ينتەرنەت بۇل جۇيەنى كوتەرە المادى. ونلاين وقۋدىڭ ورنىنا، ارنايى پلاتفورمالار ارقىلى قاشىقتان وقىتۋدى جۇرگىزۋىمىز قاجەت،  – دەدى ق ر ءبىلىم جانە عىلىم ءمينيسترى اسحات ايماعامبەتوۆ وقۋشىلاردىڭ ءىV توقساندا قاشىقتان وقۋ جۇيەسىنە ارنالعان ونلاين كونفەرەنسيادا.

ۆەدومستۆو باسشىسى ەلدە Bilimland.kz، «كۇندەلىك»، «دارىن ونلاين» سياقتى ارنايى پلاتفورمالار بار ەكەنىن، ءار مەكتەپ وسى پلاتفورمالاردىڭ بىرىنە توقتالىپ، جۇمىس ىستەيتىنىن ايتتى.

مينيستر قاشىقتان وقىتۋدىڭ ءبارى ونلاين وقىتۋ ەمەس ەكەنىن، قاشىقتان وقىتۋعا پوشتا، تەلەديدار، راديو، تاپسىرمالاردى ينتەرنەت ارقىلى الىپ وقۋ جاتاتىنىن ايتتى. ال ونلاين وقىتۋ –  ينتەرنەت كومەگىمەن جۇرگىزىلەتىن، ۇستاز بەن وقۋشى ءبىرىن-بىرى كورىپ وتىراتىن وقىتۋ ءتۇرى.