الماتى. قامشى پورتالى - دۇنيەجۇزىلىك ساۋدا ۇيىمىنا مۇشە بولۋ - ەلىمىزدىڭ ساۋدا-ساتتىق الەمىندەگى كوكجيەگىن كەڭەيتە تۇسەتىن قادام. ماڭعىستاۋ وبلىسىنداعى ش.ەسەنوۆ اتىنداعى كمتجيۋ پرورەكتورى تەحنيكا عىلىمدارىنىڭ دوكتورى، پروفەسسور سەمبىعالي زاكەنوۆ رەسپۋبليكالىق «ەگەمەن قازاقستان» گازەتىنە بەرگەن سۇحباتىندا وسىنداي ءوز پىكىرىن ءبىلدىردى.

جۋىردا ەلىمىزدىڭ ىشكى بەرىكتىگىن تۇراقتاندىرىپ، قاۋىپسىزدىگىن قامتاماسىز ەتەتىن «100 ناقتى قادام» مىندەتتەمەلىك باعدارلاماسىن قابىلداپ، بارار بولاشاعىمىزعا قاجەتتى ەڭ ماڭىزدى ءجۇز قادامدى انىقتاعان ەلىمىز ءۇشىن تاعى ءبىر ايتۋلى ءسات ورىن الدى. ول - قازاقستاننىڭ دۇنيەجۇزىلىك ساۋدا ۇيىمى سىندى الەمدەگى ىرگەلى ۇيىمعا مۇشە بولىپ، الەۋمەتتىك-ەكونوميكالىق دامۋدىڭ جاڭا قىرىنا قادام باسۋى بولىپ وتىر.  

الەمنىڭ 161 ەلى مۇشە بولىپ تابىلاتىن اتالمىش ۇيىم­نىڭ قاتارىنا ەنۋ بۇل بىر-ەكى جىل­عى جۇمىستاردىڭ جەمىسى ەمەس. بۇل - مەملەكەت باسشىسى ن.نازار­بايەۆتىڭ مەملەكەتىمىزدىڭ الەمنىڭ الدىڭعى قاتارلى ەلدەرى ساناتىنا قوسىلۋى ءۇشىن الدىن الا جوس­پارلاپ، ءىس جۇرگىزۋ تەتىكتەرىن ءاۋ باس­تان ورايلاستىرا جۇرگىزگەن ساياسا­تىنىڭ ناتيجەسى. ون توعىز جىل بويى ءارى پىسىپ-جەتىلگەن، ءارى سىنا­لىپ-شىڭدالعان جوسپار-جوبا­نىڭ ناقتى سيپاتقا يە بولۋى. بەيبىتشىلىكسۇيگىش ۇستانىمى جاعىنان ۇقساس شۆەيساريا ەلىندە، جە­نيەۆانىڭ تورىندە قازاقستاننىڭ دۇنيەجۇزىلىك ساۋدا ۇيىمىنا مۇشە بولۋى ەلىمىزدىڭ داڭقى مەن بەدەلىن تورتكىل الەمگە تاعى ءبىر تانىتىپ، تاۋەلسىزدىگىن جاريالاعانىنا شيرەك عاسىرعا جەتەعابىل ۋاقىت بول­عان ەلدىڭ الىپ ارماندارى مەن اسقار مۇراتتارىن، قانداي ىرگەلى، اۋقىم­­دى قادامداردان باس تارتپاي، وزىنە سە­ءنىمدى تۇردە الپاۋىت جوبالار مەن قادامدارعا قايمىقپاي بارا الا­تىن تەگەۋرىندىلىگىنە ءتانتى ەتە ءتۇستى.

اتالمىش ۇيىمنىڭ ەلدەردى مۇشەلىككە قابىلداۋ جونىندەگى دەپارتامەنتى ديرەكتورى چ.وساكۆەنىڭ جۋرناليستەرمەن وتكىزگەن باسپا ءسوز ءماسليحاتىندا قازاقستاننىڭ ۇستانعان ساياساتىن، ەل تىزگىنىن ۇستاعان ەلباسى ن.نازاربايەۆتىڭ كورەگەندىگىن جانە قازاقستاننىڭ الەۋمەتتىك-ەكونوميكالىق دامۋ قارقىنىن زور ىقىلاسپەن اتاپ ءوتىپ، قازاقستان سىندى توقىراۋ جىلدارىنداعى ەكونوميكالىق قيىندىقتاردى ەڭسەرىپ، الىس بولاشاققا سەنىممەن ۇمتىلعان ەلدىڭ دسۇ-نىڭ دا قۋاتىن ارتتىرا تۇسەتىندىگىنە سەنىم ءبىلدىرۋى - ءبىزدىڭ ەلىمىزدىڭ ۇستانعان دامۋ باعىتى الىستاعى ايبىندى ەلدەردىڭ قولداۋ-قۋاتتاۋىنا يە ەكەندىگىن، ءتىپتى، ءبىزدىڭ ەلمەن ارىپتەس بولۋعا ىقىلاستى ەكەندىگىن تانىتتى.

پرەزيدەنت ن.نازاربايەۆ سوڭعى جىلدارداعى ەكونوميكالىق الەۋەتتىڭ قارقىندىلىققا يە بولىپ، ەلەۋلى وڭ وزگەرىستەردىڭ ورىن العاندىعىن ايتا كەلىپ، دسۇ-عا مۇشە بولعاننان كەيىن­گى قولعا الىنۋى ءتيىس باسىم باعىتتارعا شولۋ جاساپ ءوتتى. ول قارجى قىزمەتىن ىرىق­تاندىرۋ، تەلەكوممۋنيكاسيا سالاسىنىڭ قىزمەت ساپاسىن ارتتىرىپ، قىزمەت باعاسىن تومەندەتۋ ماسەلەلەرى. تابىستى بولىپ سانالاتىن اتالمىش باعىتتارعا شەتەلدىك ينۆەستورلاردىڭ تارتىلۋىن قامتاماسىز ەتۋ ماسەلەسىن دە ورتاعا سالىپ، قازاقستاندا ينۆەستورلارعا جاسالاتىن جاعداي مەن بەرىلەتىن جەڭىلدىك-مۇمكىندىكتەردى اتاپ ءوتتى.

دۇنيەجۇزىلىك ساۋدا ۇيىمىنا مۇشە بولۋ قازاقستاننىڭ ساۋدا-ساتتىق الەمىندەگى كوكجيەگىن كەڭەيتە تۇسەدى. وتاندىق ءونىم وندىرۋشىلەرگە باسەكەلەستىك پەن وعان قابىلەتتىلىك قاجەتتىلىگى تۋىنداپ تۇر. جاڭا جۇمىس ورىندارىن اشىپ، تۇتىنۋشىنىڭ تاڭداۋ جانە ساپالى دا ارزان تاۋارعا قولجەتىمدىلىگىن قامتاماسىز ەتەتىن، سول ارقىلى وتانداستارىمىزدىڭ الەۋمەتتىك-تۇرمىستىق احۋالىن ارتتىرۋعا ىقپال ەتەتىن قادام بولۋىمەن دە قۇندى.

زامان تالابى جالقى بولىپ وقشاۋلانۋدى ەمەس، جالپىعا قاراي وڭتايلانۋدى، وزىندىك ماقسات-مۇددەلەرىن ۇستانا وتىرىپ بىرىگۋ مەن كىرىگۋدى، الەم حالىقتارىنىڭ جەر شالعايلىعىنا نەمەسە باسقا دا ءارتۇرلى سەبەپتەرگە قاراي سان مىڭداعان بولشەكتەرگە ءبولىنۋى مەن ءوزارا جۇتىلۋىنا ەمەس، جۇدىرىقتاي جۇمىلىپ، ءوزارا ىقپالداسا ارەكەت ەتۋىن قاجەت ەتۋدە. قازاقستاننىڭ ايتۋلى ۇيىمعا مۇشە بولۋى - مەملەكەتىمىزدىڭ نىعايۋى، وزگەلەرمەن تەڭ دارەجەدە ىقپالداسىپ، وزگەنى تىڭداي، ءوزىن تىڭداتا بىلەتىن بەلدى مەملەكەتكە اينالۋ جولىنداعى ءساتتى قادامى. بۇل جەتىستىككە ءبىزدىڭ ەلىمىزدە بۇعان دەيىنگى جۇرگىزىلگەن ىزگى باستامالار مەن قۇتتى قادامداردىڭ جالعاسى، بولاشاق باياندى ومىرىمىزگە باس­تار جاڭالىقتاردىڭ ءبىرى رەتىندە سەنىممەن قارايمىز. 

دەرەككوزى: قازاقپارات