«Nur Otan» پارتياسىنىڭ قىزىلوردا وبلىستىق فيليالىنىڭ كەزەكتەن تىس كونفەرەنسياسى بارىسىندا گۇلشارا ءابدىقالىقوۆا پارتيانىڭ وبلىستىق فيليالىنىڭ ءتوراعاسى بولىپ سايلاندى. ەلىمىزدە كوروناۆيرۋسپەن كۇرەس جاعدايىنا بايلانىستى شەكتەۋ شارالارى ەنگىزىلگەندىكتەن، پارتيانىڭ بۇل كونفەرەنسياسى العاش رەت ونلاين رەجيمدە وتكىزىلدى.
باس قوسۋعا بەينەكونفەرەنس بايلانىسى ارقىلى قاتىسىپ، ءسوز سويلەگەن باۋىرجان بايبەك قازىرگى كەزدەگى احۋالعا توقتالىپ، پارتيا ليدەرى نۇرسۇلتان نازاربايەۆتىڭ تاپسىرماسىمەن «Nur Otan» پارتياسىنىڭ قىزمەتى قايتا باعدارلانعانىن اتاپ ءوتتى. پارتيانىڭ بۇكىل رەسۋرسى ەل پرەزيدەنتى قاسىم-جومارت توقايەۆتىڭ باستاماسىمەن قولعا الىنعان كوروناۆيرۋسپەن كۇرەس جاعدايىندا مۇقتاج قازاقستاندىقتارعا كومەك ۇيىمداستىرۋ شارالارىن قولداۋعا جۇمىلدىرىلدى.
«ەلباسى بۇگىن جارىق كورگەن ماقالاسىندا «ءار مينيستر، ءاربىر وبلىس، قالا جانە اۋدان باسشىلارى جۇيەمەن، تارتىپپەن، ۇيلەسىممەن، ناقتى جوسپارمەن، نىق سەنىممەن ارەكەت ەتىپ، ۋاقىتشا قيىندىقتان شىعۋعا بارلىق كۇش-قۋاتتى جۇمىلدىرۋى قاجەت. «Nur Otan» پارتياسىنىڭ مۇشەلەرى دە وسى ءبىر ساۋاپتى ءىستىڭ الدىڭعى قاتارىنان تابىلۋعا ءتيىس»، - دەپ قاداپ تۇرىپ تاپسىردى. سوندىقتان پارتيانىڭ وڭىرلىك فيليالى وسى باعىتتاعى جۇمىستاردى كۇشەيتىپ، مەملەكەت باسشىسى جاريالاعان داعدارىسقا قارسى بارلىق شارالاردىڭ ورىندالۋىن قاتاڭ باقىلاۋدا ۇستاۋ كەرەك. 
ەلباسى تاپسىرماسىنا سايكەس، قازىرگى احۋالعا وراي 13 ناۋرىزدان باستاپ پارتيانىڭ بارلىق قوعامدىق قابىلداۋ بولمەلەرىندە ازاماتتاردى قابىلداۋ جۇمىستارى ۋاقىتشا توقتاتىلىپ، ونلاين رەجيمگە كوشىرىلدى. بۇگىنگى تاڭدا پارتياعا ونلاين رەجيمدە ءوتىنىش بەرۋ 2 ەسەگە، Facebook، Instagram الەۋمەتتىك جەلىلەرىندە - 4 ەسە، WhatsApp جەلىسى ارقىلى - 7 ەسەگە ارتتى. اتالعان ماسەلەلەرگە بايلانىستى پارتيانىڭ ايماقتىق فيليالدارىنا الەۋمەتتىك جەلىلەر ارقىلى كەلىپ تۇسكەن بارلىق وتىنىشتەردى تىركەۋ جانە قوعامدىق-ساياسي جاعدايعا مونيتورينگ جاساۋ ءۇشىن ناقتى تاپسىرما بەرىلگەن. پارتيانىڭ ايماقتىق جانە اۋماقتىق فيليالدارى قيىن جاعدايعا تاپ بولعان ازاماتتارعا كومەك كورسەتۋ جانە تۇرعىنداردان تۇسكەن تەلەفون قوڭىراۋلاردى رەتتەۋ ماقساتىندا سەنىم تەلەفوندارى جۇمىستارىن ۇيىمداستىرۋ قاجەت» - دەدى پارتيا ءتوراعاسىنىڭ ءبىرىنشى ورىنباسارى.
ونىڭ ايتۋىنشا، پرەزيدەنت تاپسىرماسىنا سايكەس «حالىق ۇنىنە قۇلاق اساتىن مەملەكەت» كونسەپسياسى اياسىندا پارتيالىق باقىلاۋ كوميسسياسى مەن سىبايلاس جەمقورلىققا قارسى كۇرەس كەڭەستەرىنىڭ جۇمىسى كۇشەيتىلگەن. بارلىق وڭىرلىك «Birgemiz» قورلارىندا جۇمىس قىزۋ جۇرگىزىلۋدە. تەك قىزىلوردا وبلىسىنىڭ وزىندە 2 مىڭداي وتباسى اتاۋلى كومەككە يە بولعان.
باۋىرجان بايبەك جۋىردا قىزىلوردا وبلىسىنىڭ اكىمى بولىپ تاعايىندالعان گۇلشارا ءابدىقالىقوۆانىڭ كانديداتۋراسىن پارتيانىڭ وبلىستىق فيليالىنىڭ ءتوراعالىعىنا ۇسىنا وتىرىپ، ونىڭ مەملەكەتتىك حاتشى، ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتوراعاسى رەتىندە ەلىمىزدە گەندەرلىك ساياساتتىڭ ىسكە اسىرىلۋىنا ەلەۋلى ۇلەس قوسقانىن اتاپ ءوتتى.
«جۋىردا قىزىلوردا وبلىسىنا ەلباسى كەلىسىمىمەن، مەملەكەت باسشىسىنىڭ جارلىعىمەن ءابدىقالىقوۆا گۇلشارا ناۋشا قىزى اكىم بولىپ تاعايىندالدى. ول – ەلىمىزدە وبلىس باسقارۋعا تاعايىندالعان ءبىرىنشى ايەل اكىم. وسى سىر ءوڭىرىنىڭ تۋماسى. ەلباسى ەلىمىزدىڭ سايلانبالى ورگاندارىندا ايەل ازاماتتاردىڭ ۇلەسىن 30%-كە جەتكىزۋدى تاپسىرعانىن بىلەسىزدەر. بۇل قادام وسى ۇردىسكە جاقسى جول اشىپ وتىر. سونىمەن بىرگە ورتالىق اپپارات قازىرگى كەزدە پارتياىشىلىك تاڭداۋ – پرايمەريزدى وتكىزۋدە ونلاين-تەحنولوگيانى پايدالانۋ جولدارىن پىسىقتاۋدا، سول كەزدە وسىنى ەسكەرەتىن بولامىز»، - دەدى ول.
ءوز كەزەگىندە گۇلشارا ءابدىقالىقوۆا پارتيا ليدەرى نۇرسۇلتان نازاربايەۆ پەن پاريتيالاستارعا وزىنە ارتقان سەنىمدەرى ءۇشىن العىسىن ءبىلدىردى.
«ءبىزدىڭ الدىمىزدا ەڭ ءبىرىنشى كەزەكتە، ەلباسى اتاپ وتكەندەي، پارتيانىڭ بارلىق رەسۋرستارىن پرەزيدەنت قاسىم جومارت كەمەل ۇلى توقايەۆتىڭ باسشىلىعىمەن جۇزەگە اسىرىلاتىن جۇمىستارعا باعىتتاۋ مىندەتى تۇر. سوندىقتان پارتيا ءۇشىن ەڭ ماڭىزدى ماسەلە - وسىنداي قيىن كەزەڭدە حالىقپەن بىرگە بولىپ، ولارعا بارىنشا قولداۋ كورسەتۋ» - دەدى ول.
ايتا كەتۋ كەرەك، «Nur Otan» پارتياسى ءبىرشاما ۋاقىت بۇرىن ەلىمىزدەگى ءاربىر وبلىستىڭ، اۋدان مەن قالانىڭ الداعى 5 جىلعا ارنالعان جاڭا دامۋ باعدارلامالارىن ازىرلەۋ بويىنشا اۋقىمدى جۇمىس جۇرگىزدى. اتالعان ايماقتىق دامۋ باعدارلامالارىندا ءاربىر ءوڭىردىڭ جەرگىلىكتى ەرەكشەلىگى ەسكەرىلە وتىرىپ، ءاربىر ازاماتتىڭ ناقتى قاجەتتىلىكتەرى كورىنىس تابادى. ەلباسىنىڭ تاپسىرماسى بويىنشا پارتيا ءتوراعاسىنىڭ ءبىرىنشى ورىنباسارى وسى كەزگە دەيىن اتىراۋ، پاۆلودار، تۇركىستان، جامبىل جانە باسقا دا وبلىستاردىڭ شالعاي اۋىلدارىنا دەيىن ارالاپ، وڭىرلەردىڭ جاي-كۇيىمەن تىكەلەي تانىسىپ شىقتى. تەك سوڭعى جارتى جىلدا ول قىزىلوردا وبلىسىنىڭ ءبىرقاتار اۋداندارىندا ەكى رەت بولىپ، تۇرعىندارمەن كەزدەستى.
پىكىر قالدىرۋ