قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى پرەزيدەنت جانىنداعى ورتالىق كوممۋنيكاسيالار قىزمەتىنىڭ الاڭىندا وتكەن ونلاين باسپا ءسوز ماسليحاتىندا توتەنشە جاعداي كەزىندە ءدىني ءىس-شارالاردى وتكىزۋ ءتارتىبى تۋرالى باياندادى، دەپ جازادى muftyat.kz.

باس ءمۇفتي ەلدەگى توتەنشە جاعدايعا بايلانىستى رامازان ايىندا ىندەتتىڭ تارالۋىنىڭ الدىن الۋ ماقساتىندا  تاراۋىق نامازى مەشىتتەردە جاماعاتپەن وقىلمايتىنىن مالىمدەدى. 

– تاراۋىق نامازى مەشىتتەردە جاماعاتپەن وقىلمايدى. اركىم تاراۋىق نامازىن ءوز شاڭىراعىندا وتباسى مۇشەلەرىمەن وقۋىنا كەڭەس بەرەمىز. ءبىز وسىلاي وقشاۋلانۋ ارقىلى جۇقپالى ىندەتتى جەڭەمىز. جۇقپالى ىندەتتىڭ تارالۋىنىڭ الدىن الۋ ماقساتىندا مەشىتتەردە، ءدامحانالاردا، قوعامدىق ورىنداردا ت.ب. مەكەمەلەردە جينالىپ اۋىزاشار بەرۋدى ۋاقىتشا توقتاتۋعا شاقىرامىز. سوندىقتان كارانتين كۇندەرى: 1. اركىم ءوز شاڭىراعىندا وتباسى مۇشەلەرىمەن اۋىزاشار وتكىزۋگە؛ 2. كوپشىلىك ورىنداردا (ءدامحانا، مەيرامحانا ت.ب.) جينالماۋعا ۇندەيمىز. قازىرگى جاعدايعا قاراي ورازا ۇستاعان ادامدارعا اۋىزاشار بەرۋدە مىناداي قايىرلى امالداردى جۇزەگە اسىرۋعا شاقىرامىز: ا) مەيرامحانالارعا تاپسىرىس بەرىپ، اۋىزى بەرىك ادامدارعا تاماق تاراتۋ؛ ءا) الەۋمەتتىك جاعدايى تومەن وتباسىلارعا ازىق-تۇلىك تاراتۋ ارقىلى اۋىز اشتىرۋ؛ب) اۋىزاشارعا جۇمسالاتىن شىعىنداردى ورازا ۇستاعان ادامدارعا قارجىلاي بەرۋ، ت.ب، – دەپ اتاپ ءوتتى ناۋرىزباي قاجى تاعان ۇلى.