توسىننان كەلگەن ىندەت بۇكىل الەم جۇرتشىلىعىن ابىگەرگە سالعانىن كۇندەلىكتى بۇقارالىق اقپارات قۇرالدارىنان وقىپ، كورىپ وتىرمىز. كەز كەلگەن ەلدىڭ بيلىگى دە وسىناۋ قيىن-قىستاۋ ساتتە ىندەتتىڭ حالىق اراسىندا دەندەپ تارالماۋىنا، ناۋقاسقا شالدىققانداردى ەمدەۋگە بارىن سالۋمەن قاتار ازاماتتارىنىڭ ءال-اۋقاتى تۇرالاپ قالماۋى ءۇشىن دە تىرىسىپ باعىپ جاتقان جايى بار. ولاردىڭ قاتارىندا قازاقستان دا بار. ىندەت ۋشىعا باستاعان ساتتەن-اق ەل بيلىگى ناقتى شارالاردى قولعا الىپ، ازاماتتارىنىڭ تۇرمىس جاعدايىنىڭ تومەندەپ كەتپەۋى ءۇشىن بارىن سالۋدا. ونى بىرەۋ بىلەر، بىرەۋ بىلمەس. سوندىقتان وقىرمان نازارىنا مەملەكەت تاراپىنان كورسەتىلىپ جاتقان ناقتى قولداۋ شارالارىنا شولۋدى تاعى ءبىر مارتە ۇسىنباقپىز.
42 500 تەڭگە
كوروناۆيرۋس ىندەتىنىڭ العاشقى دەرەگى تىركەلگەننەن كەيىن-اق شاعىن جانە ورتا بيزنەس قيىندىققا تاپ بولدى. حالىققا قىزمەت كورسەتەتىن اسحانالار، ءدامحانالار مەن مەيرامحانالار، شاشتارازدار، بازارلار، گۇل ساتاتىن دۇكەندەر، كولىك جۋۋ ورىندارى، ءىرى بازارلار جابىلدى. وندا جۇمىس ىستەيتىن ادامدار كۇندەلىكتى تابىسىنان قاعىلدى. «ەكى قولعا ءبىر كۇرەك» دەپ ءناپاقا تاۋىپ جۇرگەندەر دە كارانتين رەجيمىنىڭ جاريالانۋىنا بايلانىستى ۇيىنەن شىعا الماي، كۇندەلىكتى كىرىسىنەن ايىرىلدى. مىنە، وسىنداي قيىن ساتتە، 23 ناۋرىز كۇنى توتەنشە جاعداي جونىندەگى مەملەكەتتىك كوميسسيانىڭ وتىرىسىن وتكىزگەن مەملەكەت باسشىسى قاسىم-جومارت توقايەۆ العاش رەت تابىس كوزىنەن ايىرىلعان قازاقستاندىقتارعا اي سايىن 1 ايلىق ەڭ تومەنگى جالاقى، ياعني، 42 500 تەڭگە كولەمىندە الەۋمەتتىك تولەم تولەي باستاۋدى تاپسىرعان ەدى. ول كەزدە مۇنداي كومەككە كەمىندە 1،5 ميلليون ادام ىلىنەتىنى ايتىلعان بولاتىن. الايدا ءقازىردىڭ وزىندە مۇنداي كومەكتى 4 ميلليونعا جۋىق ازامات الىپ ۇلگەردى. الداعى ۋاقىتتا ولاردىڭ قاتارى ارتا ءتۇسۋى دە مۇمكىن. سەبەبى، بۇگىنگى كۇننىڭ وزىندە 3 ميلليوننان استام ادامعا الەۋمەتتىك تولەم تولەۋدەن باس تارتىلعانى بەلگىلى. ءيا، ولاردىڭ اراسىندا جۇمىس ىستەپ جۇرسە دە ءوتىنىش بەرگەندەر، شەتەلگە تۇرعىلىقتى تۇرۋ ءۇشىن تۇپكىلىكتى كوشىپ كەتكەن نە بولماسا ومىردەن وزعان ادامدار اتىنان بەرىلگەن وتىنىشتەر دە بار. ءبىراق ولاردىڭ سانى كوپ دەپ تە ايتا المايمىز. ال 42 500 تەڭگە مولشەرىندەگى الەۋمەتتىك تولەم الۋشىلاردىڭ قاتارى تاعى 1 ميلليونعا جۋىق ازاماتقا كوبەيەدى دەۋگە تولىق نەگىز بار سياقتى. ويتكەنى، بۇگىن ورتالىق كوممۋنيكاسيالار قىزمەتىندە ءدال وسى ماسەلەگە بايلانىستى جەتىنشى رەت بريفينگ بەرۋگە ءماجبۇر بولعان ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ دەرەگىنشە، الەۋمەتتىك تولەمگە ءوتىنىش بەرگەن 160 مىڭ ازامات جەكە سايكەستەندىرۋ ءنومىرىن، 800 مىڭ ادام بانكتەگى ەسەپشوتىن قاتە جىبەرگەنى بەلگىلى بولىپ وتىر.
جالپى، باستاپقىدا 42 500 تەڭگە مولشەرىندەگى الەۋمەتتىك تولەمدى توتەنشە جاعداي رەجيمىنىڭ ەنگىزىلۋىنە بايلانىستى تابىسىنان ايىرىلعان ادامدارعا عانا بەرىلۋى ءتيىس بولاتىن. ناقتى ايتقاندا، رەجيمنىڭ ەنگىزىلۋىنە بايلانىستى جۇمىس بەرۋشىسى اقىسىز دەمالىسقا جىبەرگەندەر عانا الۋى ءتيىس ەدى. ءبىراق قازاقستان پرەزيدەنتى بۇل ءتىزىمدى كەڭەيتىپ، وعان رەسمي جانە بەيرەسمي جۇمىس ىستەگەندەر دە قوسىلىپ وتىر. سوندىقتان دا بيلىكتىڭ باستاپقى ساتتەگى جاريا ەتكەن الەۋمەتتىك تولەم الا الاتىن 1،5 ملن. ادامنىڭ ەسەلەپ كوبەيىپ وتىرعانى تۇسىنىكتى. وسىدان-اق مەملەكەتتىڭ ءوز ازاماتتارىن قيىن جاعدايدا قالدىرمايتىنىن بايقاۋعا بولادى.
دەگەنمەن، سوڭعى ۋاقىتتا الەۋمەتتىك جەلىلەردە، كەيبىر اقپارات قۇرالدارىنىڭ بەتتەرىندە زاڭسىز 42 500 تەڭگە العانداردىڭ قىلمىستىق جازاعا تارتىلاتىنى تۋرالى اڭگىلەمەلەر تاراي باستاعانى بەلگىلى. وسى سۋىت اقپارات تاراعاننان كەيىن-اق تولەمدى الىپ العان ادامداردىڭ كوڭىلى كۇپتى بولعانى دا جاسىرىن ەمەس. ءتىپتى، مۇنداي تولەمدى الۋعا قۇقىلى بولسا دا، ونى قايتا مەملەكەتكە قايتارۋعا تىرىسقاندار دا بار. ماسەلەنىڭ بىردەن بەتىن اشىپ الايىق، مۇنداي تولەمگە جۇمىس بەرۋشىسى اقىسىز دەمالىسقا جىبەرمەگەن، ياعني كۇندەلىكتى جۇمىسىنا بارىپ، ايلىعىن ۋاقىتىندا الىپ جۇرگەندەر ءۇمىتتى بولا المايدى. ءبىراق مۇنداي ازاماتتاردىڭ ءبىرازى ءوتىنىش بەرىپ قويعان سىڭايلى. ەگەر وسى ساناتتاعى ازاماتتار الەۋمەتتىك تولەم الىپ ۇلگەرسە، وندا ونى قايتارعانى ءجون. سەبەبى 42 500 تەڭگە مەملەكەتتىك ساقتاندىرۋ قورىنان تولەنەدى. ال قور مۇنان بولەك زەينەتاقىلار مەن جاردەماقىلاردى، 1 جاسقا دەيىنگى بالا كۇتىمىنە قاتىستى بەرىلەتىن جاردەماقىلاردى تولەپ كەلەدى. ياعني ءار تولەنگەن تيىنعا جاۋاپ بەرەدى. سوندىقتان قور جۇمىس ورنىن اقىسىز دەمالىسقا جىبەرمەسە دە، الەۋمەتتىك تولەم العانداردان قاراجاتتى قايتارۋدى تالاپ ەتۋى زاڭدى. ال جەكە تۇلعالار، جەكە كاسىپكەرلەر، ءوز بەتىنشە رەسمي نە بەيرەسمي جۇمىس ىستەپ جۇرگەندەر ەسەپشوتىنا تۇسكەن قاراجاتتى ۋايىمداماي-اق قاجەتىنە جاراتا الادى.
زەينەتاقى مەن جاردەماقى يندەكساسيالاندى
31 ناۋرىزدا رەسپۋبليكالىق تەلەارنالاردىڭ ەفيرىنەن ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى مالىمدەمە جاساعان پرەزيدەنت قاسىم-جومارت توقايەۆ ينفلياسيانىڭ ارتۋىنا بايلانىستى زەينەتاقى، مەملەكەتتىك جاردەماقى جانە اتاۋلى الەۋمەتتىك كومەك مولشەرىن 10 پايىزعا يندەكساسيالاۋدى تاپسىرعانىن، وسىعان وراي، اتالعان ساناتتاعى ازاماتتاردىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەتىنىن ايتقان ەدى. مەملەكەت باسشىسىنىڭ وسى تاپسىرماسىنا سايكەس، ەڭبەك جانە حالىقتى الەۋمەتتىك قورعاۋ مينيسترلىگى زەينەتاقىلار مەن مەملەكەتتىك جاردەماقىلاردى جىلدىق تۇرعىدا 10 پايىزعا يندەكساسيالاۋدى جۇرگىزدى. وسىلايشا 2020 جىلدىڭ 1 ساۋىرىنەن باستاپ زەينەتاقىنىڭ ەڭ تومەنگى مولشەرى 40 441 تەڭگەنى قۇرايتىن بولدى. دەگەنمەن، ەل ازاماتتارى كوتەرىلگەن زەينەتاقى مەن جاردەماقىنى الىپ ۇلگەرگەن جوق. سەبەبى، مەملەكەت باسشىسى تاپسىرما بەرگەن كەزدە ازاماتتارعا ءساۋىردىڭ اقشاسى ءتۇسىپ قويعان بولاتىن. ەندى ولار ۇستەمە اقشالارىن مامىردىڭ تولەمدەرىمەن قوسىپ بىرگە الادى.
ىندەتپەن كۇرەستىڭ العى شەبىندەگى دارىگەرگە قانداي قولداۋ بار
مەملەكەتتىڭ الەۋەتى سىنالار ساتتە الەۋمەتىنە جان-جاقتى قولداۋ كورسەتۋى وتە ورىندى. ال ىندەتپەن كۇرەستىڭ الدىڭعى شەپتە جۇرگەن دارىگەرلەردىڭ جاعدايى نە بولماق؟ مۇنى دا مەملەكەت قاپەردەن شىعارعان ەمەس. قازاقستان پرەزيدەنتى قاسىم-جومارت توقايەۆ دارىگەرلەردى قولداۋدىڭ ارنايى توپتاماسى جايىندا ءسوز قوزعاعاننان كوپ وتپەي-اق ۇكىمەت ارنايى شەشىم قابىلدادى. وعان سايكەس، مەديسينا قىزمەتكەرلەرى جۇمىسىنىڭ قاۋىپتىلىگىنە قاراي 3 توپقا بولىنگەن. ءبىرىنشى توپ – رەانيماسيا بولىمدەرىمەن قوسا العاندا جۇقپالى اۋرۋلار ستانسيونارلارىنىڭ دارىگەرلەرى، ورتا جانە كىشى مەديسينا قىزمەتكەرلەرى. ولاردىڭ جالاقىسىنا ۇستەماقى ايىنا 850 مىڭ تەڭگەنى قۇرايدى. ياعني ورتاشا ايلىعىن قوسقاندا، ولار ايىنا شامامەن 1 ملن. تەڭگەنىڭ ۇستىندە الادى. ەكىنشى توپ – پروۆيزورلىق ستاسيونار مەن جەدەل جاردەم قىزمەتتەرىنىڭ دارىگەرلەرى، ورتا جانە كىشى مەديسينا قىزمەتكەرلەرى. ولاردىڭ ۇستەماقىسى ايىنا 425 مىڭ تەڭگە بولادى. ورتاشا ايلىعىن قوسقاندا ولار ايىنا شامامەن 600 مىڭ تەڭگە الادى. ءۇشىنشى توپقا كارانتيندىك ستاسيونار دارىگەرلەرى، ورتا جانە كىشى مەديسينا قىزمەتكەرلەرى، سانيتارلىق دارىگەرلەر، جەدەل جاردەم جۇرگىزۋشىلەرى جانە تاعى باسقالارى كىرەدى. ولار ايىنا 212 مىڭ تەڭگە ۇستەماقىنى قوسقاندا، شامامەن 380 مىڭ تەڭگە الادى.
مەديسينا قىزمەتكەرلەرىنىڭ دەنساۋلىعى مەن ءومىرىن ساقتاندىرۋ ماسەلەسى دە پىسىقتالعان. ولار اۋىرىپ قالعان جاعدايدا 2 ميلليون تەڭگە مولشەرىندە ساقتاندىرۋ تولەمى بەرىلەدى. قۇداي ساقتاسىن، ءبىراق ەگەر مەديسينالىق قىزمەتكەر قايتىس بولعان جاعدايدا 10 ميلليون تەڭگە مولشەرىندە تولەماقى بەرىلەدى. وكىنىشكە وراي، قازىرگى ۋاقىتتا 100-دەن استام مەديسينا قىزمەتكەرىنىڭ ءقاۋىپتى ىندەتتى جۇقتىرىپ العانى بەلگىلى بولىپ تۇر.
كوممۋنالدىق قىزمەتتەردى تولەۋگە 15 مىڭ تەڭگە
ءقازىر قازاقستاننىڭ بارلىق قالاسى كارانتينگە جابىلعان. اي سايىن تابىستان قاعىلعان وتباسىلاردىڭ لەگى دە قالىڭ. جوعارىدا ولارعا مەملەكەت تاراپىنان 42 500 تەڭگە الەۋمەتتىك تولەمنىڭ بەرىلەتىندىگىن ايتتىق. مۇنان بولەك تە مەملەكەت تاراپىنان بەرىلەتىن تاعى ءبىر كومەك بار. ول – كوممۋنالدىق تولەمدەرگە اي سايىن تولەنەتىن 15 مىڭ تەڭگە. ءبىراق بۇل تولەم دە بارلىق ازاماتقا بىردەي بەرىلمەيدى. ەندەشە، مۇنداي كومەكتى كىم الا الادى؟
ق ر يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، كارانتين ەنگىزىلگەن وڭىرلەردە اكىمدىكتەر تۇتىنۋشىلاردىڭ دەربەس (ابونەنتتىك) شوتتارىنا 2 اي بويى 15 مىڭ تەڭگەدەن اۋدارىپ وتىرادى. مەملەكەتتىك ورگانداردىڭ ۇسىنىسى نەگىزىندە تولەم الۋشىلاردىڭ كەلەسى ساناتتارى ايقىندالعان. ولار: 1، 2، 3 توپ مۇگەدەكتەرى؛ مۇگەدەك بالالاردى تاربيەلەپ وتىرعان وتباسىلار؛ كوپبالالى وتباسىلار؛ ۇوس مۇگەدەكتەرى مەن قاتىسۋشىلارى، ۇوس مۇگەدەكتەرى مەن قاتىسۋشىلارىنا تەڭەستىرىلگەن تۇلعالار؛ مەملەكەتتىك نەمەسە قوعامدىق مىندەتتەرىن، اسكەري قىزمەتىن ورىنداۋ بارىسىندا، عارىش كەڭىستىگىنە ۇشۋعا دايىندىق بارىسىندا نەمەسە ۇشۋ كەزىندە، ادام ءومىرىن قۇتقارۋ جانە قۇقىق ءتارتىبىن ساقتاۋ كەزىندە قازا تاپقان تۇلعالاردىڭ وتباسىلارى؛ تومەن جانە ودان از زەينەتاقى الاتىن زەينەتكەرلەر؛ اتاۋلى الەۋمەتتىك كومەك الاتىن ازاماتتار، ونىڭ ىشىندە جالعىزباستى زەينەتكەرلەر.
اتالعان ساناتقا كىرەتىن ازاماتتار تولەمدى الۋ ءۇشىن اقپاراتتىق جۇيەلەر نەمەسە call-ورتالىقتار ارقىلى جەكە سايكەستىندىرۋ ءنومىرىن، الەۋمەتتىك دارەجەسىن جانە دەربەس شوت دەرەكتەرىن كورسەتە وتىرىپ، اكىمدىككە ءوتىنىم بەرۋى كەرەك. اكىمدىك ۇسىنىلعان دەرەكتەردى تەكسەرىپ، مالىمەتتەر راس بولعان جاعدايدا كوممۋنالدىق قىزمەتتەر تۇتىنۋشىسىنىڭ دەربەس (ابونەنتتىك) شوتىنا قارجى اۋداراتىن بولادى.
ازىق-تۇلىك سەبەتى نەمەسە 4 اەك
ءدال قازىرگى جاعدايدا تۇرمىستىق قيىندىققا تاپ بولعان ازاماتتارعا بەرىلەتىن كومەكتىڭ تاعى ءبىر ءتۇرى بار. ول - ازىق-تۇلىك جيىنتىعى. جالپى ەلىمىزدە توتەنشە جاعداي جاريالانعانعا دەيىن بيۋدجەت قاراجاتى ەسەبىنەن ازىق-تۇلىك سەبەتى باستاپقىدا 460 مىڭ ادامعا بەرىلگەن ەدى. دەگەنمەن، 31 ناۋرىزدا پرەزيدەنت ونى كەڭەيتۋدى تاپسىردى جانە رەسپۋبليكالىق بيۋدجەتتى سوڭعى ناقتىلاۋ بارىسىندا قوسىمشا قاراجات قاراستىرىلدى. بۇگىندە مۇنداي كومەك الاتىن ادامداردىڭ سانى 1،243 ميلليونعا جەتىپ وتىر. ياعني، كوپ بالالى وتباسىلاردى، بارلىق توپتاعى جانە جاستاعى مۇگەدەكتەردى قوسا العاندا، اتاۋلى الەۋمەتتىك كومەك الاتىن از قامتىلعان ازاماتتار، مۇگەدەك بالانىڭ كۇتىمىمەن وتىرعان اتا-انالار، سونىمەن قاتار جۇمىسپەن قامتۋ ورگاندارىندا جۇمىسسىز رەتىندە رەسمي تىركەلگەن تۇلعالار وسى كومەكتى الىپ جاتىر. ولارعا بارلىق وڭىردە ازىق-تۇلىك جيىنتىعى نەمەسە ازىق-تۇلىك جيىنتىعىنا ارنالعان قاراجات تۇرىندە (4 ايلىق ەسەپتىك كورسەتكىش كولەمىندە) بەرىلىپ جاتىر.
مۇنان بولەك، «ءبىز بىرگەمىز» قورى، ەلىمىزدىڭ پاتريوتتارى دا ومىرلىك قيىندىققا دۋشار بولعان وتباسىلارعا قولدارىنان كەلگەنشە كومەك كورسەتىپ جاتقانى بەلگىلى. ماسەلەن، ەلوردانىڭ وزىندە از قامتىلعان وتباسىلارعا قولداۋ كورسەتۋگە باعىتتالعان اكسيانىڭ العاشقى كەزەڭىندە 5 مىڭ وتباسىعا قولداۋ جاسالدى. قازىرگى ۋاقىتتا اكسيانىڭ ەكىنشى كەزەڭى باستالعان. ونىڭ اياسىندا 6 مىڭ ادامدى ازىق-تۇلىك سەبەتىمەن قامتاماسىز ەتۋ جوسپارلانعان. ءبىر وتباسىنا بەرىلەتىن مۇنداي ءبىر سەبەتكە 5 كەلى قانت پەن كۇرىش، 2،5 كەلى پەچەنە، 1 كەلى ۇن، 5 كەلى ماي مەن ماكارون ءونىمى، سونىمەن قاتار 50 مەديسينالىق ماسكا كىرەدى.
شاعىن ورتا بيزنەس پەن ديقانعا قولداۋ
23 ناۋرىزدا توتەنشە جاعداي جونىندەگى مەملەكەتتىك كوميسسيانىڭ وتىرىسىن وتكىزگەن مەملەكەت باسشىسى قاسىم-جومارت توقايەۆ كاسىپكەرلىكتى قورعاۋعا باسا نازار اۋدارتقان بولاتىن.
«قازىرگى كۇردەلى جاعدايدان زارداپ شەككەن شاعىن جانە ورتا كاسىپكەرلىكتىڭ بارلىق نەسيەلەرى بويىنشا نەگىزگى قارىزدارى مەن سىياقىلارىن تولەۋدى توقتاتا تۇرۋ – ولاردى ناقتى قولداۋ مەحانيزمدەرىنىڭ ءبىرى. ىسكەرلىك بەلسەندىلىكتى سالىق تۇرعىسىنان ىنتالاندىرۋ جانە باعانىڭ تۇراقتىلىعىن قامتاماسىز ەتۋ ءۇشىن كەشەندى شارالار ازىرلەۋدى، شاعىن جانە ورتا كاسىپكەرلىكتى بارلىق سالىق جانە مىندەتتى تولەمدەردەن 3 اي مەرزىمگە بوساتۋدى تاپسىرامىن. وسى كەزەڭدە ولارعا ايىپپۇلدار مەن ءوسىمپۇل جۇرمەۋى كەرەك»، – دەگەن ەدى مەملەكەت باسشىسى.
سونىمەن قاتار قازاقستان پرەزيدەنتى كوكتەمگى ەگىس ناۋقانىن ۋاقىتىندا جانە ساپالى اتقارۋ قاجەتتىگىنە دە نازار اۋدارتقان بولاتىن. بۇل رەتتە شارۋاشىلىقتاردى پەستيسيدتەر مەن تىڭايتقىشتار، ساپالى تۇقىمدار جانە جانار-جاعار ماي ساتىپ الۋمەن قامتاماسىز ەتۋ كەرەك. وسىعان وراي كوكتەمگى ەگىس جۇمىستارىن قارجىلاندىرۋ كولەمى 3 ەسەگە جۋىق، ياعني، 170 ميلليارد تەڭگەگە دەيىن ارتتىرىلدى.
«جاڭا تىيىمدارعا، كۆوتالارعا بايلانىستى اۋىل شارۋاشىلىعى ونىمدەرىن وندىرۋشىلەردىڭ سۇراقتارى كوپ. اۋىل شارۋاشىلىعى مينيسترلىگى ولارعا جەدەل جاۋاپ بەرۋى كەرەك. ءبىرىڭعاي call-ورتالىق قاجەت. كوكتەمگى ەگىس جۇمىستارىن قولداۋعا بولىنگەن قاراجاتتى ءتيىستى جەرلەرگە ۋاقىتىندا جەتكىزۋ كەرەك»، – دەدى قاسىم-جومارت توقايەۆ.
مەملەكەت باسشىسىنىڭ تاپسىرماسىنا سايكەس، 2020 جىلعى كوكتەمگى ەگىس جۇمىستارىن جۇرگىزۋ ءۇشىن ديزەل وتىنىنىڭ ۇسىنىلاتىن باعاسى 1 تونناسى ءۇشىن 194 مىڭ تەڭگەدەن (161 تەڭگە/ليتر) 1 تونناسى ءۇشىن 174 مىڭ تەڭگەگە (144 تەڭگە/ليتر) (ققس قوسا العاندا) (FCA-تيەۋ ستانسياسى شارتتارىندا) دەيىن 1 ساۋىردەن باستاپ تومەندەتىلدى. ساۋىردە جەتكىزۋدى، ساقتاۋدى جانە وپەراتوردىڭ مارجاسىن ەسكەرە وتىرىپ، باعا 1 ليتر ءۇشىن 165 تەڭگەنى قۇرادى.
قورىتا ايتقاندا، بۇگىنگى كۇنى كارانتين رەجيمىنە بايلانىستى تابىسسىز قالعان ازاماتتار، ىندەتپەن كۇرەسۋگە جۇمىلدىرىلعان دارىگەرلەر، شاعىن جانە ورتا بيزنەس وكىلدەرى، قاۋىرت جۇمىسى باستالاتىن ديقانشىلار دا مەملەكەت قامقورلىعىنان تىس قالىپ وتىرعان جوق. بىرلىگى بەكەم ەلدىڭ بولاشاعى جارقىن! ءبىز بىرگە بولساق، بارلىق قيىندىقتاردى ەڭسەرە الامىز.
پىكىر قالدىرۋ