ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ 42500 تەڭگە جاردەماقى تۋرالى ارۋجان سايننىڭ ۇسىنىسىنا جاۋاپ بەردى.

ارۋجان ساين 42500 تەڭگەنى وتباسىنداعى بالا سانىنا قاراي تاعايىنداۋ قاجەتتىگىن ايتقان ەدى. 

مينيستر تابىسى تومەن وتباسىلاردىڭ ادام سانىنا قاراي تاعايىندالاتىن اتاۋلى الەۋمەتتىك كومەك الاتىنىن ايتتى. 

– قازىرگى ۋاقىتتا 128 مىڭ وتباسى نەمەسە 660 مىڭ ادام اتاۋلى الەۋمەتتىك كومەك الادى، ونىڭ ىشىندە 442 مىڭ بالا بار. ولار دا مەملەكەتتىڭ كەپىلدەندىرىلگەن الەۋمەتتىك پاكەتىن الادى. سوندىقتان، بالالى وتباسىلارعا الەۋمەتتىك تولەم ساياساتى جۇزەگە اسىرىلىپ كەلەدى. دەگەنمەن، ءار تولەمنىڭ نەگىزدەمەسى بولاتىنىن ءتۇسىنۋ كەرەك. 42 500 تەڭگە – مەملەكەتتىڭ جۇمىس ىستەيتىن ازاماتتارعا دەگەن از دا بولسا كومەگى. ەگەر ءبىر وتباسىندا بىرنەشە ادام جۇمىس ىستەسە، تيىسىنشە ءارقايسىسىنا 42 500 تەڭگەدەن بەرىلەدى، – دەدى ءبىرجان نۇرىمبەتوۆ.

سونداي-اق، ول 42 500 تەڭگە – ەلىمىزدەگى جالعىز الەۋمەتتىك تولەم ەمەس ەكەنىن ايتتى.

– بىزدە بيۋدجەتتەن 39 الەۋمەتتىك تولەم، اي سايىن شامامەن 300 ملرد تەڭگە تولەنەدى. ونىڭ ىشىندە 8 جاردەماقى مەن 3 تولەم – بالالى وتباسىلارعا قولداۋ كورسەتۋگە باعىتتالعان. بالا تۋعاندا بەرىلەتىن تولەم، بالا كۇتىمى جانە بيىل بالا سانىنا قاراي تاعايىندالاتىن جاڭا مەملەكەتتىك الەۋمەتتىك جاردەماقى ەنگىزدىك. بۇگىندە 1 ملن 700 مىڭنان استام بالا تاربيەلەپ وتىرعان 390 مىڭ كوپبالالى وتباسى وسى جاردەماقىنى الىپ وتىر، – دەپ اتاپ ءوتتى مينيستر ورتالىق كوممۋنيكاسيالار قىزمەتىندە.