الماتىدا "Jas Otan" مۇشەلەرى "دارىگەرلەرگە مىڭ العىس" اكسياسىن جالعاستىردى.

ەرىكتىلەر قايىرىمدىلىق اكسياسى اياسىندا 800-دەن استام دەنساۋلىق سەبەتىن دايىندادى. اكسيانىڭ العاشقى كۇنىندە 250 دارىگەرگە دەنساۋلىق سەبەتى تابىس ەتىلدى. دارىگەرلەرگە يممۋنيتەتتى نىعايتۋعا ارنالعان تاعامدار: بال، ليمون، قۇرما، شوكولاد، جەنت بەرىلدى.

– اكسيانىڭ ءمانى – 4 ايعا جۋىق ۋاقىت بويى ءوز ءومىرىن قاتەرگە تىگىپ، بۇگىنگى قوعامنىڭ باتىرلارىنا اينالعان اق حالاتتى ابزال جاندارعا جاستار اتىنان العىس ايتۋ، قولداۋ كورسەتۋ. الەمدى جاۋلاعان COVID-19 كوروناۆيرۋس ينفەكسياسى ەشكىمدى بەيجاي قالدىرمادى. وسىنداي سىن ساعاتتا ءبىرىنشى كەزەكتە اق حالاتتى ابزال جاندار وزگەلەردىڭ ءومىرى ءۇشىن ايانباي كۇرەسۋدە،–دەيدى "Jas Otan" الماتى بولىمشەسىنىڭ ءتوراعاسى ءمادي احمەتوۆ.

– بۇگىنگى تاڭدا قازاقستاندا كوروناۆيرۋستى جۇقتىرعانداردىڭ سانى 65 مىڭنان استى. ءبىراق مەديسينا قىزمەتكەرلەرىنىڭ قاجىرلى ەڭبەگىنىڭ ارقاسىندا كوپ ادامدار اياققا تۇردى. دارىگەرلەر ادام ءومىرى ءۇشىن تاۋلىك بويى كۇرەسۋدە. بۇل قايىرىمدىلىق اكسياسىمەن ءبىز دارىگەرلەرگە جىلۋ سىيلاپ، قولداۋ كورسەتىپ، بىرگە ەكەندىگىمىزدى جەتكىزگىمىز كەلەدى،– دەيدى ەرىكتى ءبيبىنۇر شەربايەۆا.

اكسيانىڭ العاشقى كۇنىندە جاسوتاندىق ۆولونتەرلەر ورتالىق قالالىق كلينيكالىق اۋرۋحاناعا، قالالىق كلينيكالىق جۇقپالى اۋرۋلار اۋرۋحاناسىنا جانە قالالىق جۇقپالى اۋرۋلاردىڭ كلينيكالىق بالالار اۋرۋحاناسىنىڭ قىزمەتكەرلەرىنە دەنساۋلىق جيىنتىعىن تابىستادى.

بۇل شاراعا الماتى قالاسى بويىنشا كوروناۆيرۋستىڭ الدىن الۋ ۆەدومستۆوارالىق كوميسسياسى قولداۋ كورسەتتى. ال دەنساۋلىق سەبەتتەرىن تابىستاۋعا ارنايى دايىندىقتان وتكەن ەرىكتىلەر جۇمىلدىرىلدى.

ولاردىڭ ءارقايسىسى قورعانىش قۇرالدارىمەن قامتاماسىز ەتىلگەن. اكسيا بارىسىندا بارلىق ساقتىق شارالارى ەسكەرىلدى.