كارانتيننەن زارداپ شەككەن كاسىپكەرلەرگە وسى جىلدىڭ قازانىنا دەيىن كرەديت تولەمدەرىن كەيىنگە شەگەرۋ مۇمكىندىگى بەرىلەدى. بۇل تۋرالى پرەمەر-مينيستر اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا ايتىلدى، دەپ حابارلادى primeminister.kz.
جيىندا پرەزيدەنتتىڭ كارانتيندى ۇزارتۋ جانە ودان كەيىنگى كەزەڭگە دايىندالۋعا قاتىستى بەرگەن تاپسىرمالارىن ورىنداۋ ماسەلەلەرى قارالدى.
ۇكىمەت باسشىسى الداعى ەكى اپتا ىشىندە ءوز قىزمەتىن ۋاقىتشا توقتاتقان ەكونوميكا سالالارىنىڭ قىزمەتىن قالپىنا كەلتىرۋ بويىنشا جۇيەلى دايىندىق جۇمىستارىن جۇرگىزۋدى تاپسىردى. ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن، "اتامەكەن" پالاتاسىمەن بىرلەسىپ، كاسىپكەرلەرگە قولداۋ كورسەتۋ شارالارىن ازىرلەيدى.
ەڭ كوپ زارداپ شەككەن سالالارداعى شاعىن جانە ورتا بيزنەس سۋبەكتىلەرىنە مەملەكەتتىك قولداۋ شاراسى رەتىندە نەسيە تولەمدەرىن وسى جىلدىڭ 1 قازانىنا دەيىنگى مەرزىمگە كەيىنگە قالدىرۋ مۇمكىندىگى ۇسىنىلادى.
پرەمەر بيزنەس سۋبەكتىلەرىنىڭ قىزمەتىنە قويىلاتىن سانيتارلىق-ەپيدەميولوگيالىق تالاپتاردى بەكىتۋدى، سونداي-اق، ازاماتتار مەن كاسىپكەرلىك سۋبەكتىلەرىنىڭ سانيتارلىق ەرەجەلەردى ساقتاۋىنا ءتيىستى باقىلاۋ جاساۋدى تاپسىردى.
كاسىپورىننىڭ جۇمىسىنا سالىنعان تىيىمدى الىپ تاستاۋ الگوريتمى كاسىپكەرلەردى تىركەۋدى جانە "Info Kazakhstan" ەلەكتروندى پلاتفورماسىندا قىزمەتتى قايتا باستاۋعا وتىنىمدەر قابىلداۋدى قامتيدى. اكىمدىك، سەق، وڭىرلىك كاسىپكەرلەر پالاتاسىنىڭ قىزمەتكەرلەرى مەن جۇرتشىلىق وكىلدەرىنەن قۇرالعان كوميسسيا تەكسەرىس جۇرگىزگەننەن كەيىن، بيزنەس سۋبەكتىلەرىنە قىزمەتىن قايتا باستاۋعا ەلەكتروندى رۇقسات بەرىلەدى.
سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە ىندەتتىڭ الدىن الۋ جانە اقپاراتتاندىرۋدى ارتتىرۋ بويىنشا ءموبيلدى قوسىمشالار ەنگىزۋ تاپسىرىلدى.
پىكىر قالدىرۋ