قوستاناي وبلىسىنىڭ تۇرعىنى جۇمىس كولىگىندە ۇيىقتاپ جاتقان پوليسەيدى ۆيدەوعا ءتۇسىرىپ، بالاعاتتاعانى ءۇشىن كەشىرىم سۇرادى. بۇل تۋرالى Tengrinews.kz سايتى جازدى.

قوستانايلىق سەرگەي زينچەنكو قالانىڭ ورتالىعىنداعى كوشەنىڭ شەتىندە پاترۋل كولىگىندە ۇيىقتاپ جاتقان پوليسەيدى ۆيدەوعا ءتۇسىرىپ، جەلىگە جاريالاعان. بيلىك وكىلى ءوزىن ۆيدەوعا ءتۇسىرىپ جاتقانىن بايقاپ قويادى دا ءوزىنىڭ ۇيالى تەلەفونىن قاراي باستايدى. سەرگەي پوليسەيدەن ءوزىن تانىستىرىپ، قۇجات كورسەتۋىن تالاپ ەتەدى، جاۋاپ الا الماعان سوڭ روليك اۆتورى بەيادەپ سوزدەر ايتىپ، پوليسەيدى بالاعاتتايدى. كەيىن ۆيدەو توقتاپ قالىپ، ءارى قاراي ەكەۋى كولىككە وتىرعان ساتتە بەينەجازبا جالعاسادى.

"دوسىم، كوزىمە قاراشى، سەنىڭشە ىستەپ وتىرعانىڭ دۇرىس پا؟ سىزدەر زەينەتكە 45 جاستا شىعاسىزدار، جەڭىلدىكتەر الاسىزدار، ءار جارتى جىل سايىن جالاقىلارىڭىز كوتەرەدى. سونىڭ ءبارى سوندا ۇيىقتاۋ ءۇشىن بە؟ سەن ۇيىقتاپ جاتقان جوقپىن دەگىڭ كەلە مە؟ كولىكتەگى ورىندىقتاردىڭ ەكەۋى دە جاتقىزىلعان، دەمەك ەكەۋىدە ۇيىقتاپ جاتىر" دەيدى روليك اۆتورى.

پوليسيا دەپارتامەنتىندەگىلەر اتالعان فاكت بويىنشا قىزمەتتىك تەرگەۋ باستالعانىن مالىمدەدى.

"پوليسيا دەپارتامەنتىندە ۆيدەومەن تانىسقاننان كەيىن پوليسەيگە قاتىستى قىزمەتتىك تەرگەۋ باستاۋ تۋرالى شەشىم شىعارىلدى. 33 جاستاعى قوستانايلىققا قاتىستى بيلىك وكىلىنە ءتىل تيگىزگەنى ءۇشىن سوتقا دەيىنگى تەرگەۋ باستالدى" دەپ حابارلادى قوستاناي وبلىسى پوليسيا دەپارتامەنتىندەگىلەر.

ۇيىقتاپ جاتقان قىزمەتكەردى ۆيدەوعا تۇسىرگەن سەرگەي زينچەنكو ءوزىنىڭ قىلىعى ءۇشىن كەشىرىم سۇراپ بەينەجازبا ءتۇسىردى.

"1 تامىز كۇنى جولدا كەتىپ بارا جاتىپ ۇيىقتاپ جاتقان قىزمەتكەردى كوردىم. توقتاپ "سوگىس" جاريالاۋ ءۇشىن ۆيدەو ءتۇسىردىم. سودان كەيىن كەتىپ قالدىم. ول مەنىڭ ارتىمنان قۋىپ جەتتى. سويلەسەيىك، دەپ كولىككە وتىردىق. مەن الكوگول ءىشىپ، ماس كۇيدە بولعاندىقتان ارتىق سويلەپ قويدىم، ماي قىزمەتكەرى جانە جۇيەگە قاتىستى بەيادەپ سوزدەر ايتتىم، اشۋلانىپ ايتىپ قويدىم، سوعان وكىنەمىن" دەيدى قوستانايلىق جىگىت.