ءار ۋاقىت، ءار كەزەڭ ءوز جۇيەسىن، ءوز "اۋا رايىن" قالىپتاستىرادى. ال ءقازىر الەم حالىقتارىنىڭ ابىر-سابىر كەزەڭدى باستان كەشىپ وتىرعانى جاسىرىن ەمەس. جاپپاي حالىقتى جالماپ جاتقان اتى جامان ۆيرۋسپەن دۇنيەجۇزى ەلدەرى كارانتين جاريالاپ، كۇرەس جۇرگىزىپ كەلەدى. الايدا ۇزىلىسكە دە، داعدارىسقا دا قارامايتىن، كەزەك كۇتتىرمەيتىن ماسەلەلەر بولادى. دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىندەگى رولىنە نازار اۋدارساق، قازاقستاننىڭ باستامالارى كوڭىل قۋانتادى. سولارعا توقتالىپ وتەيىك.
ق ر تاۋەلسىزدىك العالى بەرى كوپتەگەن حالىقارالىق تاريحي ماڭىزى بار شەشىمدەر قابىلداعانى بەلگىلى. بىرىنشىدەن، 1991 جىلدىڭ 29 تامىزىندا قابىلدانعان يادرولىق قارۋدى تاراتپاۋ مەن قارۋسىزداندىرۋ باستاماسى. بۇل – قازاقستاندىقتار اراسىندا عانا ەمەس، بۇكىلالەمدىك قوعامداستىق تاراپىنان كەڭ قولداۋ تاپقان تاريحي ءارى باتىل شەشىم. ەكىنشىدەن، 1992 جىلى قۇرىلعان ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك)، ياعني قۇرلىقتاعى ءمانى زور قاۋىپسىزدىك قۇرىلىمى. ازياداعى بەيبىتشىلىك پەن قاۋىپسىزدىككە ءۇنقاتىسۋ جانە ىنتىماقتاستىق ارقىلى عانا قول جەتكىزۋگە بولاتىنىن جاريا ەتكەن بۇل باستاما ازيا ەلدەرى باسشىلارى تاراپىنان ۇلكەن قولداۋعا يە بولدى. ۇشىنشىدەن، باتىس پەن شىعىستىڭ زاماناۋي ناقتى جاعدايلارىن ەسەپكە الا وتىرىپ، سولتۇستىك ەۋرازيا مەن ورتالىق ازيا ەلدەرىنىڭ ءبىرتۇتاس ەكونوميكالىق، ساياسي كەڭىستىگىن بىرىكتىرۋدى ماقسات ەتكەن ەۋرازيالىق وداقتىڭ قۇرىلۋى. سونداي-اق، بۇۇ-نىڭ 100 جىلدىعىنا ۇسىنعان 2045 جىلعا دەيىنگى ستراتەگيالىق باستامانى ۇلكەن جەتىستىكتەر قاتارىنا قوسۋعا بولادى. مۇندا بارلىق ۇلتتاردىڭ الەمدىك رەسۋرستارعا جانە نارىققا قولجەتىمدىلىگىن قامتاماسىز ەتۋگە تيىستىگى، ادامزاتتىڭ دامۋىنا سەپتىگىن تيگىزەتىن ۇلكەن جاۋاپكەرشىلىك كورىنىس تابۋى كەرەكتىگى باستى نازارعا الىنعان.
ارينە، كەنجەلەپ دامۋ كەمشىلىككە جاتپايدى. 29 جىل – سالىستىرمالى تۇردە، ۇزاق مەرزىم ەمەس. وسى ۋاقىت ارالىعىندا قازاقستان الەمنىڭ دامىعان الپاۋىت ەلدەرىمەن يىق تىرەستىرەتىن دەڭگەيگە جەتتى. حالىقارالىق پروبلەمالاردى شەشۋدە ۇلكەن ءرول اتقارىپ كەلەدى. بەدەلدى ۇيىمدارعا ءتوراعالىق ەتۋ دە ەلىمىزدىڭ بەدەلىن ارتتىردى. جەتىستىكتەر قاتارىنا الەمنىڭ ساراپشىلار قاۋىمداستىعىنا الەم ەكونوميكاسى ماسەلەلەرى جونىندە اشىق جانە بۇقارالىق پىكىرتالاستاردى جۇرگىزۋگە جاعداي جاسايتىن كوپفۋنكسيالى G-Global پلاتفورماسىن، الەم نازارىنا ىلىككەن EXPO-2017 كورمەسىن قوسامىز. بيىل عانا استانا قالالىق تۋريزم بويىنشا، سەگىزىنشى جاھاندىق ءسامميتتى وتكىزۋ مۇمكىندىگەن يە بولعانىمىز تۋرالى قۋانىشپەن حابارلاعان بولاتىنبىز.
قازاقستاننىڭ ەكونوميكادا، ساياساتتا، مادەنيەت جانە سپورتتا جەتكەن جەتىستىكتەرى سان الۋان. ەۋرازيا قۇرلىعىنداعى باستى شارانىڭ ءبىرى سانالاتىن استانا ەكونوميكالىق فورۋمىنا 2019 جىلى الەمنىڭ 74 ەلىنەن ساراپشى، كاسىپكەر، ساياساتكەر مەن عالىمدار قاتىسقانى بەلگىلى. راسىندا، جاھاندىق ماسەلەلەردى شەشۋدە بەلسەندى ىنتىماقتاستىق اسا ماڭىزدى. بۇكىلالەمدە جاسىل ەكونوميكاعا ارنالعان ەكوجۇيە جوق. ءبىزدىڭ ەلىمىزدە وتكەن فورۋمدا وسى ماسەلە تالقىلانىپ، قازاقستان مەن ساۋد ارابياسى ءتيىستى كەلىسىمگە قول قويعان بولاتىن.
الەمدىك ماسەلەلەردى كوتەرەتىن شارالاردىڭ باستاماشىسى بولۋ – ەلىمىزدىڭ جەتىستىگى. ەلىمىز تاۋ قوزعالسا دا قوزعالمايتىن، داۋ ىزدەسە دە جاۋ ىزدەمەيتىن، داراقىلانسا دا داندايسىمايتىن حالىق. تاريح كورسەتكەندەي، قازاقستاننىڭ جاھاندىق يدەيالارى مەن باستامالارى بۇكىلالەم وكىلدەرىنىڭ جۇرەكتەرى مەن سانالارىنان ورىن تاۋىپ، بىرتىندەپ ىسكە اسۋ ۇستىندە.
پىكىر قالدىرۋ