1 ماۋسىمنان باستاپ قىسقى دوڭگەلەكپەن جۇرۋگە تىيىم سالىنادى

2025 جىلدىڭ 1 ماۋسىمىنان باستاپ اۆتوكولىك جۇرگىزۋشىلەرىنە قىسقى، سونىڭ ىشىندە تىكەنەكتى دوڭگەلەكتەرمەن جۇرۋگە زاڭ جۇزىندە تىيىم سالىنادى. بۇل تالاپ اكىمشىلىك قۇقىقبۇزۋشىلىق تۋرالى كودەكستىڭ 590-بابى، 5-تارماعىنا سايكەس جۇزەگە اسىرىلادى. وندا تەحنيكالىق رەگلامەنتتەر مەن ۇلتتىق ستاندارتتارعا سايكەس كەلمەيتىن كولىك قۇرالدارىن باسقارۋعا تىيىم سالىناتىنى كورسەتىلگەن.

قىسقى دوڭگەلەكپەن جۇرگەنى ءۇشىن ايىپپۇل قاراستىرىلعان:

• العاشقى قۇقىقبۇزۋشىلىق ءۇشىن — 5 ايلىق ەسەپتىك كورسەتكىش (اەك) كولەمىندە، ياعني 19 145 تەڭگە ايىپپۇل سالىنادى؛

• قايتالانعان جاعدايدا — ايىپپۇل مولشەرى 20 اەك-كە دەيىن ءوسىپ، 76 580 تەڭگەگە جەتەدى.

نەگە تىيىم سالىنعان؟

جاز مەزگىلىندە قىسقى جانە تىكەنەكتى دوڭگەلەكتەردى پايدالانۋ:

• جول جابىندىسىن زاقىمدايدى؛

• ىستىق اۋا رايىندا جول بەتىنە ارتىق قىسىم تۇسىرەدى؛

• اۆتوكولىكتىڭ باسقارۋ مۇمكىندىگىن ناشارلاتادى؛

• جانارماي شىعىنىن ارتتىرادى؛

• دوڭگەلەك تەز توزادى.

قىسقى دوڭگەلەكتى قاشان اۋىستىرۋ كەرەك؟

قولدانىستاعى تالاپتارعا سايكەس، تىكەنەكتى قىسقى دوڭگەلەكتەردى پايدالانۋ مەرزىمى — 1 جەلتوقساننان 1 ناۋرىزعا دەيىن. ءبىراق ناقتى مەرزىم وڭىرلەردەگى اۋا رايىنىڭ جاعدايىنا بايلانىستى وزگەرۋى مۇمكىن.

جازعى دوڭگەلەككە اۋىسۋ ءۇشىن سىرتقى اۋا تەمپەراتۋراسى ورتا ەسەپپەن +5 °C جانە ودان جوعارى دەڭگەيدە تۇراقتى بولۋى ءتيىس. سەبەبى قىسقى دوڭگەلەك جىلى اۋا رايىندا جۇمسارىپ، ءوز قاسيەتىن جوعالتادى.