نۇر-سۇلتان. قازاقپارات – قازاقستان كوممۋنيستىك حالىق پارتياسى اۋعان سوعىسى ارداگەرلەرىنىڭ ماسەلەسىن كوتەرىپ، «ارداگەرلەر تۋرالى» زاڭعا تۇزەتۋلەردى ەنگىزۋدى ۇسىنباق، دەپ حابارلايدى قازاقپارات ءتىلشىسى.
ەلوردادا قازاقستان كوممۋنيستىك حالىق پارتياسى مەن قازاقستاننىڭ ينتەرناسيوناليست-جاۋىنگەرلەرىنىڭ ارداگەرلەر ۇيىمدارى ورتالىق كەڭەسىنىڭ جيىنى ءوتتى. قكحپ وك حاتشىسى، ق ر پارلامەنتىندەگى اتالمىش پارتيا فراكسياسىنىڭ جەتەكشىسى ايقىن قوڭىروۆ جيىننىڭ نە ءۇشىن ۇيىمداستىرىلىپ وتىرعانىن ايتىپ بەردى.
«ەلىمىزدە «ارداگەرلەر تۋرالى» زاڭ قابىلداندى. بۇگىنگى كۇنى وعان قول قويىلىپ، قۇجات نەگىزىندە جۇمىس باستالىپ كەتتى. الايدا وسى جىلدىڭ جازىندا ءبىزدىڭ وبلىستىق قۇرىلىمدارعا ينتەرناسيوناليست-جاۋىنگەرلەر جۇگىنىپ، اتالمىش زاڭعا تۇزەتۋلەر ەنگىزۋ تۋرالى ۇسىنىستارىن جەتكىزدى. تالداۋ بارىسىندا قازاقستان كوممۋنيستىك حالىق پارتياسى وسى تۇزەتۋلەردى قولداۋ تۋرالى شەشىم قابىلدادى. تيىسىنشە ءبىز ارداگەرلەردىڭ الەۋمەتتىك قورعالۋىن، باسپانامەن قامتۋ، قوسىمشا جاردەماقىمەن (اۋعان سوعىسى ارداگەرلەرىن) قولداۋ، تۇپتەپ كەلگەندە مارتەبەسىن ايقىنداۋ باستاماسىن كوتەرۋدى ءجون كوردىك»، - دەدى ول قكحپ نۇر-سۇلتان قالالىق كوميتەتىنىڭ كەڭسەسىندە وتكەن وتىرىستا.
اۋعان سوعىسى ارداگەرلەرى ورتالىق كەڭەسىنىڭ مۇشەسى قايرات ەلۋبايەۆتىڭ ايتۋىنشا «ارداگەرلەر تۋرالى» زاڭ بويىنشا اۋعان سوعىسىنىڭ ارداگەرلەرى ۇكىمەتپەن بىرگە 2007 جىلدان بەرى جۇمىس جۇرگىزىلىپ جاتىر.
«2020 جىلى زاڭدى تالقىلاۋ كەزىندە اۋعان سوعىسى ارداگەرلەرى ۇيىمدارىنىڭ مۇشەلەرى شاقىرىلماعان. ول زاڭدا ءبىزدىڭ ۇسىنىستار قابىلدانبادى. سول سەبەپتى ءبىزدىڭ ورتالىق كەڭەستىڭ شەشىمىمەن بۇل زاڭدى جەتىلدىرۋ كەرەك دەپ سانايمىز. جالپى اۋعان سوعىسى ارداگەرلەرىنىڭ مارتەبەسىن دۇرىستاپ ايقىنداۋ كەرەك. زاڭدى تالقىلاۋ كەزىندە اۋعان سوعىسىنىڭ ارداگەرلەرى الەۋمەتتىك جەلى بولسىن، ۆيدەووتىنىم بولسىن وزدەرىنىڭ نارازىلىقتارىن ايتىپ كەلە جاتىر»، - دەيدى ول.
قايرات ەلۋبايەۆ اۋعان سوعىسىنا 22 مىڭنان استام قازاقستاندىق قاتىسقانىن، سونىڭ بۇگىن دە 16-17 مىڭ ادامى قالعانىن ايتادى.
«18-20 جاس ارالىعىنداعى جاستار سول ۋاقىتتا سوعىسقا باردى. 30 جىل بويى بىزگە ناقتى «سوعىسقا قاتىسۋشى» دەگەن مارتەبە بەرۋدى سۇرادىق. ءبىراق ۇسىنىستارىمىز ەسكەرىلمەي كەلەدى. حالىقتىڭ، پرەزيدەنتتىڭ جانە پارلامەنتتىڭ الدىنا وسى ماسەلەنى قايتا كوتەرەيىك دەپ جاتىرمىز»، - دەيدى ول.
بارلىق قۇقىقتار قورعالعان. inform.kz بەلسەندى سىلتەمەنى پايدالانىڭىز https://www.inform.kz/kz/kommunistik-partiya-augan-sogysy-ardagerlerinin-maselesin-koterdi_a3693020
پىكىر قالدىرۋ