ازىرگە ورتاق اقشاعا قاتىستى ساراپتامانى رەسەيدىڭ ماماندارى تاراپىنان وقىپ وتىرمىز. ولاردىڭ ايتۋىنشا وداقتاس ەلدەرگە ورتاق ۆاليۋتانىڭ قاجەت ەكەنىن ۋاقىتتىڭ ءوزى كورسەتتى-مىس. انىعىندا وداق دەگەن ءسوز قوزعالا سالعان كۇننىڭ ەرتەسى-اق ورتاق ۆاليۋتا دەگەن سوزدەر قۇلاعىمىزعا جەتە باستاعان. دەمەك حالىقتىڭ پسيحيكاسىن ورتاق ۆاليۋتاعى دايىنداعالى ءبىراز ۋاقىت بولىپ قالدى. تەك وسى ەكونوميكالىق تولقۋ كەزىندە ۇرەيلى حالىققا تاعى دا ورتاق اقشا تۋرالى ايتىپ قالۋدىڭ وڭتايلى ءساتى تۋىپ تۇر. ەۋروپانىڭ ورتاق اينالىمداعى ءتاسىلى بىزگە ساباق بولا الا ما؟ ول راس ەۋروپادا ەۋرودان بولەك، مەملەكەتتەردىڭ وزىڭدىك ءتول ۆاليۋتالارى بار. ءبىراق ورتاق اقشا اينالىمى كەزىندە ءبىز ءوزىمىزدىڭ تەڭگەمىزگە دەگەن قۇرمەتتى ساقتاي الامىز با؟ ماسەلەن، پولشادا ەۋرونى مىندەتتى تۇردە زلوتاعا ايىرباستاۋ كەرەك بولادى. كۇندەلىكتى ساۋدا-ساتتىقتا ولار ەۋرونى قابىلدامايدى. ءتىپتى جوعارى كلاستتى برەندتى دۇكەندەردىڭ وزىندە كيىمنىڭ باعاسى ەۋرومەن كورسەتىلىپ تۇرسا دا، اقشانى زلوتامەن تالاپ ەتەدى. ال تۋريستەر كوپ بارعىشتايتىن يتاليا، اۆستريا، گەرمانيا مەملەكەتتەرىندە ەۋرومەن «تىنىستاي» بەرۋگە بولادى. ءبىراق ودان ۇتىلىپ وتىرعان يتاليا جوق. ولار باياعىدا-اق وزدەرىن مويىنداتىپ قويعان. ولاردىڭ مادەنيەتى، ۇلتتىق تانىمى ورتاق اقشا اينالىمىنا جۇتىلىپ كەتپەيدى. كەرىسىنشە ولار جاساعان مادەنيەت پەن وركەنيەتتى كورۋ ءۇشىن سان مىڭداعان ادام جىلدىق تابىسىن سول مەملەكەتتەرگە تاستاپ كەتۋگە دايىن. ال ءبىز ورتاق ۆاليۋتادان نە ۇتامىز؟ ءبىزدىڭ ۇلتتىق ۆاليۋتامىزدىڭ جاعدايى –مەملەكەتتىك ءتىلىمىزدىڭ كۇيىن كەشەيىن دەپ تۇر. بۇل كۇندە قازاقتىڭ تويىن دومبىراسىز وتكەرە بەرۋگە بولادى. ءداستۇرلى ءانىمىز بەن ونەرىمىزدى ۇمىتىپ بارا جاتقان ءبىز ءۇشىن ءتول تەڭگەنى ۇمىتا سالۋ تۇك تە قيىن ەمەس. سىرتتان كەلگەن اقپاراتتىق سوققىلاردىڭ ۇلتتىق بولمىستى ۇمىتتىرۋعا نەگىزدەلگەنى سونشالىقتى ءبىز عالامدانىپ بارا جاتىرمىز دەپ ماقتانۋعا ءماجبۇرمىز. ال عالامداننعان ادامعا ءتول ۆاليۋتانىڭ قاجەتى قانشا؟ مەن ءۇشىن تەڭگەنىڭ قۇنى تۇسكەن سايىن، قازاقتىڭ قۇنى ءتۇسىپ بارا جاتقانداي كورىنەدى. استىنا باسقانى التىن، اسپانعا شاشقانى التىن قازاق- الەم ءۇشىن تىم قۇنسىز. ولاردى بىر-بىرىنە ايداپ سالىپ، وتىرىك ماقتاپ قويۋعا بولادى. يا، مۇناي باعاسى تومەندەدى. الىپتار ايقاسى ءۇشىن مۇنايدىڭ باعاسىنىڭ قۇلدىراۋى قاجەت بولاتىن. مۇندايدىڭ باعاسىن قۇلدىراتپاي، يسلام الەمىنە اۋىر سوققى جاساۋ قيىن بولدى. ساياساتتىڭ الەمدىك سالقىنى ءبىزدىڭ ەكونوميكاعا دا تۇماۋ بولىپ جارماستى. ادەتتەگىدەي، ءدارى وندىرە المايتىن مىنەزىمىزبەن ءبىز تۇماۋدان ايىعۋدا دا رەسەي جاققا جالتاقتايمىز. ال رەسەي ورتاق ۆاليۋتاعا كوشەتىن كەز كەلدى دەپ وتىر. ورتاق ۆاليۋتاعا كوشكەندە دە ءبىزدىڭ ۇلتتىق رۋحىمىز مىقتى بولۋى ءتيىس. تەڭگەمىزدى ءوزىمىز مەنسىنبەي تۇرساق، ول قولدانىستان شىعىپ قالادى.
اينۇر تولەۋ
