جۇما، 30 قازان كۇنى اقتوبە وبلىسىنىڭ اكىمى وڭداسىن ورازالين “اقتوبە مەديسينالىق ورتالىعى”، مارتوك، قارعالى اۋداندىق اۋرۋحانالارىنىڭ باس دارىگەرلەرىنە ءموبيلدى دياگنوستيكالىق كەشەندى 6 كولىكتىڭ كىلتىن تابىستادى. ايماق باسشىسى وڭىرىمىزگە العاش رەت جەتكىزىلىپ وتىرعان كەشەن ءىشىن ارالاپ، جابدىقتارمەن تانىستى. 
كوشپەلى جاعدايداعى زەرتتەۋلەردىڭ كەڭ سپەكترىن جۇرگىزۋگە ارنالعان مەدكەشەن زاماناۋي رەنتگەن جانە فليۋروگرافيا ءبولىمى، ەكگ-12 ارنالى اپپارات، گينەكولوگيالىق تەكسەرۋگە ارنالعان كرەسلو، قان ساقتاۋعا ارنالعان توڭازىتقىشپەن قامتىلعان. سونداي-اق، شۇعىل جاعدايدا بوساندىرىپ الۋ مۇمكىنشىلىگى قاراستىرىلىپ، مۇگەدەك ازاماتتاردىڭ كىرۋىنە ارنالعان اۆتوماتتى تۇردە كوتەرىلەتىن پاندۋس ورناتىلعان. 
زاماناۋي جىلجىمالى كەشەن قوستاناي قالاسىندا “سارىارقااۆتوپروم” جشس-دە قۇراستىرىلعان. دەنساۋلىق ساقتاۋ باسقارماسىنىڭ باسشىلىعى الداعى ۋاقىتتا مۇنداي كولىكتەردىڭ سانىن ارتتىرۋ قاجەتتىلىگى تۋىنداعان جاعدايدا مينيسترلىككە ۇسىنىس ازىرلەمەك.
بۇدان سوڭ وڭداسىن ورازالين قالاداعى مەديسينالىق مەكەمەلەردىڭ جاي-كۇيىن باقىلاپ، دارىلىك قوردىڭ جەتكىلىكتىلىگىن تەكسەردى.
اقتوبە وبلىستىق جۇقپالى كلينيكالىق اۋرۋحاناسىندا بولدى. 
سونداي-اق، “مامانداندىرىلعان ەمدەۋ - الدىن الۋ كاسىپورنى" مكك- دە جۇرگىزىلگەن كۇردەلى جوندەۋدىڭ ساپاسىن باقىلادى. 130 ورىنعا ارنالعان مەديسينالىق مەكەمە عيماراتى بيىل كۇردەلى جوندەۋدەن وتكەن. اۋرۋحانا پاندەميا ءورشۋ ءقاۋپى تۋىنداعان جاعدايعا تولىق ءازىر. بەتپەردە، دارى-دارمەك، زالالسىزداندىرعىش قۇرالدارمەن تولىق قامتاماسىز ەتىلگەن. 
وبلىس اكىمى “سك فارماسيا” كومپانياسىنا قاراستى دارى-دارمەك ساقتاۋ لوگيستيكالىق قويماسىندا بولدى. قويمادا قۇنى 3 ملرد-قا جۋىق تگ قاراجاتقا الىنعان ءدارى قورلارى ساقتاۋلى. مۇندا Covid-19 كۇرەسۋگە ارنالعان پرەپاراتتار تولىعىمەن جەتكىلىكتى. اقتوبە وبلىسى بويىنشا “سك فارماسيانىڭ" وكىلى نۇرلان جۇبانىشوۆ وبلىس اكىمىنە ءدارى- دارمەك قورىنىڭ جەتكىلىكتى ەكەندىگىن ايتتى. قويما اقتوبە وبلىسىنان وزگە باتىس ءوڭىرىن دارىلىك پرەپاراتتارمەن قامتاماسىز ەتە الادى. 
پىكىر قالدىرۋ