الماتىداعى تولە بي جانە اۋەزوۆ كوشەلەرىنىڭ قيىلىسىنداعى "Sulpak" ساۋدا ءۇيىنىڭ الدىنداعى اعاشتاردى كەسۋ وقيعاسىنا بايلانىستى كومپانيا رەسمي مالىمدەمە جاسادى.
"Sulpak" كومپانياسى تاراتقان مالىمدەمەدە برەند سوڭعى كۇندەرى قوعام تاراپىنان ۇلكەن قىسىمعا الىنعانى، كومپانيا الەۋمەتتىك جاۋاپكەرشىلىكتى سەزىنەتىن مەكەمە رەتىندە الماتى ءۇشىن الاڭدايتىنى اتاپ وتىلگەن.
"تەرگەۋ بارىسىندا مەردىگەر قىزمەتكەرلەرى ءوز بەتىمەن اۋماقتاعى اعاشتاردى كەسكەنى بەلگىلى بولدى. بۇل اۋماق Sulpak كومپانياسىنا تيەسىلى ەمەس، كومپانيا اۋماقتى جالعا الىپ وتىرعان جوق. سالالىق ورگاندار كىنالىلەرگە قاتىستى زاڭ شەڭبەرىندە ءتيىستى شارا قولداناتىنىنا سەنىمدىمىز. ءبىز تۇرعىندار مەن كليەنتتەرىمىزدىڭ سەزىمىن تۇسىنەمىز ءارى قۋاتتايمىز. قالامىزدىڭ ەكولوگياسىن جاقسارتۋ جولىندا اكىمشىلىكپەن ىنتىماقتاسا جۇمىس ىستەۋگە ءازىرمىز. كومپانيا باسشىلىعى قالا اكىمدىگىمەن كەلىسە وتىرىپ بەلگىلەنگەن اۋماققا 500 ۇلكەن اعاش ەگۋ تۋرالى شەشىم قابىلدادى" دەلىنگەن اقپاراتتىق حابارلامادا.
23 قاراشاعا قاراعان ءتۇنى "Sulpak" ساۋدا ءۇيى ماڭىندا 13 اعاش زاڭسىز كەسىلگەن. ماسەلە الەۋمەتتىك جەلىدە قىزۋ تالقىلانىپ، داۋعا پرەزيدەنت نازار اۋدارعان. كىنالىلەردى تاۋىپ، ءتيىستى شارا قولدانۋ قاجەتتىگىن ايتقان.
ارتىنشا الماتى قالاسى اكىمدىگى مەن قالانىڭ قۇقىق قورعاۋ ورگاندارىنىڭ وكىلدەرى كەسىلگەن اعاشتاردىڭ ىشىندە توعىزى ەمەن، ەكەۋى قاراعاش جانە ەكى اكاسيا اعاشى بارىن، ءاكىمدىككە كاسىپكەرلەر تاراپىنان اعاش كەسۋگە ءوتىنىش تۇسپەگەنىن ءمالىم ەتتى.
ۇزاماي ەمەندەر سيرەك كەزدەسەتىن اعاش رەتىندە قازاقستاننىڭ قىزىل كىتابىنا ەنگەنى انىقتالىپ، قىلمىستىق كودەكسىنىڭ 2ء-بولىمىنىڭ "سيرەك كەزدەسەتىن جانە قۇرىپ كەتۋ ءقاۋپى تونگەن، سونداي-اق وسىمدىكتەر مەن جانۋارلاردىڭ تۇرلەرىن، ولاردىڭ بولىكتەرىن نەمەسە تۋىندىلارىن پايدالانۋعا تىيىم سالىنعان زاڭسىز اينالىم" 339-بابىنا سايكەس قىلمىستىق ءىس قوزعالدى.
كەلتىرىلگەن شىعىننىڭ مولشەرى انىقتالعاننان كەيىن، الماتىنىڭ جاسىل ەكونوميكا باسقارماسى كەسىلگەن اعاشتاردىڭ ورنىنا وتەمە وتىرعىزۋدى تالاپ ەتەتىنىن، جاڭا ۇلگىدەگى ەرەجەلەر بويىنشا سەرىكتەستىك 260 اعاش وتىرعىزىپ، ولاردى ەكى جىل بويى كۇتىپ-باپتاۋى كەرەكتىگىن حابارلادى.
سونىمەن قاتار 1 جەلتوقسانىنان باستاپ جاسىل ەكونوميكا باسقارماسى جاسىل جەلەكتەردى كەسۋمەن اينالىساتىن كومپانيالاردىڭ رەيتينگىن جاريالاماق.
