دۇيسەنبى، 30 قاراشا كۇنى اقتوبە وبلىسىنىڭ اكىمى وڭداسىن ورازالين اقتوبە قالاسىنىڭ نۇر-اقتوبە تۇرعىن ءۇي الابىنداعى جاڭا ءۇيدىڭ اشىلۋىنا قاتىستى. 

«ق ر تۇڭعىش پرەزيدەنتى كۇنىنە» وراي ۇيىمداستىرىلعان شارادا ايماق باسشىسى 256 پاتەرلىك جاڭا تۇرعىن ۇيدەن ۇوس ارداگەرلەرى، كوپ بالالى، جەتىم جانە از قامتىلعان 30 وتباسىنا پاتەر كىلتتەرىن تابىستادى.  

«ءار ادام ءۇشىن ءومىردىڭ قىزىعى سانالاتىن، وتباسىمەن بىرگە وسىپ-ونەتىن جەكە شاڭىراعى، قونىسى. بۇگىنگى بولىپ جاتقان قۋانىشتى جايتتىڭ ءبارى دە مەملەكەتىمىزدىڭ كۇننەن-كۇنگە دامىپ، ءال-اۋقاتىنىڭ ءوسىپ، مەملەكەت باسشىسىنىڭ جۇرگىزىپ وتىرعان سارابدال ساياساتى مەن ەل ازاماتتارىنىڭ اۋىزبىرلىگىنىڭ ارقاسىندا بولىپ وتىر. جىل وتكەن سايىن قالامىزدىڭ اۋماعى كەڭەيىپ، ءۇي العىسى كەلەتىن تۇرعىنداردىڭ سۇرانىسى ارتىپ كەلەدى. ءبىز بار كۇش-جىگەرىمىزدى جۇمىلدىرىپ، قالا تۇرعىندارىنىڭ جىلى ءارى جايلى ۇيدە الاڭسىز ءومىر سۇرۋىنە قولايلى جاعداي جاساۋعا جۇمىستانىپ جاتىرمىز. بۇگىنگى الىپ وتىرعان شاڭىراقتارىڭىزدى ءىشى قۇت-بەرەكەلى بولىپ، ءوسىپ كەلە جاتقان جاس بالالارىمىز ءبىلىمدى ءارى بىلىكتى ۇرپاق بولىپ، ەلىن سۇيەتىن پاتريوتى بولىپ ءوسسىن. ۋاقىتپەن ساناسپاي، ازعانا ۋاقىت ىشىندە وسىنداي ساپالى ءۇيدى تۇرعىزعان قۇرىلىسشىلارعا دا العىسىمدى بىلدىرەمىن» - دەدى وبلىس اكىمى جاڭا قونىس يەلەرىن قۇتتىقتاپ.  

ايتا كەتەيىك، قازىرگى تاڭدا اقتوبە قالاسىندا تۇرعىن ءۇي كەزەگىنە 24 مىڭنان استام ادام تىركەلگەن. «باقىتتى وتباسى» - «2-10-20» باعدارلاماسى اياسىندا 3 ملرد تەڭگەگە 302 جولداما بەرىلىپ وتىر. بۇگىنگى كۇنى جالپى سوماسى 2،37 ملرد تەڭگەگە 276 وتباسىنا نەسيە بەرىلدى.    سودان كەيىن ايماق باسشىسى ۇلى وتان سوعىسىنىڭ ارداگەرى، اقتوبە قالاسىنىڭ 96 جاستاعى تۇرعىنى ءانۋار ساف ۇلى احمەتزيانوۆتىڭ وتباسىنا ارنايى بارىپ، ارداگەرگە سىي-قۇرمەت كورسەتىپ، ءبىر بولمەلى پاتەردىڭ كىلتىن تابىستادى. ۇلى وتان سوعىسىنىڭ ارداگەرى ءانۋار احمەتزيانوۆ كوپ جىلدار بويى ايماقتىڭ وسىپ-وركەندەۋى مەن الەۋمەتتىك-ەكنونوميكالىق دامۋىنا زور ۇلەسىن قوسقان باتاگوي اقساقالدىڭ ءبىرى. ايماق باسشىسىنىڭ جاز ايىندا تەمىر اۋدانىنىڭ كەڭقياق اۋىلىنا جاساعان ءىسساپارى بارىسىندا بولعان كەزدەسۋىن ەسكە الىپ، قارتتارىن قادىرلەيتىن قاسيەتىنە ريزالىعىن ءبىلدىرىپ، راحمەتىن ايتتى.    

كەزدەسۋ سوڭىندا ارداگەر قاريا ءوزىنىڭ العىسىن ءبىلدىرىپ، ەلىمىزدىڭ تىنىشتىعى باستى بايلىق ەكەنىن اتاپ ءوتىپ، وبلىسى اكىمىنە جانە قالا باسشىسىنا جاساپ جاتقان جۇمىستارىنا وڭ باعاسىن بەردى.