ەلباسى نۇرسۇلتان نازاربايەۆتىڭ

ق ر پرەزيدەنتى قاسىم-جومارت توقايەۆتىڭ

ق ر ۇقك ءتوراعاسى كارىم ءماسىموۆتىڭ

"وتانداستار" قورىنىڭ پرەزيدەنتى نۇرتاي ابىقايەۆتىڭ

قازاقتاردىڭ دۇنيەجۇزىلىك قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆتىڭ

نازارىنا

بۇگىن قامشى پورتالىنا قابىرعا قايىستىرارلىق اقپارات كەلىپ ءتۇستى. 6 جەلتوقساندا تاڭعا جۋىق الماتى حالىقارالىق اۋەجايىنا قونعان بىرنەشە ەتنيكالىق قازاقتى (جۇڭگو ازاماتى) ۆيزاسىنىڭ، پسر تەستتىڭ تەرىس ناتيجەسى بارىنا قاراماستان ەل اۋماعىنا كىرگىزبەي، سەبەبىن تۇسىندىرمەستەن كەرى قايتارعان. ولار قىتايدان تىكەلەي اۋە رەيسى بولماعاندىقتان، بىرنەشە ەلدى باسىپ، سوڭىندا دۋباي ارقىلى قازاقستانعا جەتكەن. اتالعان ماسەلەگە نازار اۋدارۋلارىڭىز ءۇشىن وسى ماقالانى جازىپ وتىرمىز.

بىرنەشە ەلدى باسىپ ءوتىپ، "ارمانداعان وتانىما ورالدىم با" دەگەندە، ءوزىمىزدىڭ شەكارا قىزمەتىنىڭ ماماندارى قۇجاتتىڭ دۇرىستىعىنا قاراماستان قانداستارىمىزدى تابالدىرىقتان اتتاتپاۋى نە سۇمدىق، نە ماسقارا؟! ەلىم، جەرىم دەپ كەلگەن قازاقتىڭ تاعدىرىنا اراشا بولا المايتىنداي نەندەي كۇيگە تۇستىك؟ ەلباسىنىڭ، مەملەكەت باسشىسىنىڭ "قازاق كوشى توقتاماۋى كەرەك" دەگەن سوزدەرىنىڭ ورىندالۋى قايدا قالدى؟ شەكارا قىزمەتكەرلەرى ءۇشىن بۇل سوزدەردىڭ قۇنى كوك تيىن بولعانى ما؟ وزگە ۇلتتاردى كەمسىتىپ، قورلاعانىمىز ەمەس، ءبىراق قۇجاتتارى دۇرىس، شاقىرۋ حات بولسا دا قازاقستان شەكاراسىنان نەگە ءدال قازاقتار جىبەرىلمەيدى دە، وزگە ۇلتتار جىبەرىلەدى.

وسى ماسەلەگە نازار اۋدارىپ، ونىڭ وڭ شەشىلۋىنە ىقپال ەتۋلەرىڭىزدى سۇرايمىز. قۇجاتى تۇگەل قازاقتى كەرى قايتارىپ، وسى سوراقىلىققا جول بەرگەن تۇلعالار انىقتالىپ، جاۋاپقا تارتىلۋى كەرەك دەپ سانايمىز.

قامشى پورتالى اقپاراتتى راستاۋعا، كەرى قايتارىلعاندار تۋرالى مالىمەتتى ءتيىستى ورگاندارعا ۇسىنۋعا دايىن.

كۇن جەكسەنبى بولعاندىقتان رەسمي ورىندار مەن الماتى اۋەجايىنان تۇسىنىك الۋ مۇمكىن بولمادى. ماسەلەگە بايلانىستى جاڭالىقتار شىعىپ جاتسا، الداعى ۋاقىتتا حابارلانادى.